मुंबई दि. ६ (रामदास धो. गमरे) “पालघर, ठाणे, बोरिवली, महाड, रायगड, रत्नागिरी, सिंधुदुर्ग जिल्ह्यातील विविध ठिकाणी आपल्याला बौद्ध लेण्या आढळतात, या लेण्यांची ठेवण, मांडणी, शिल्प, स्थापत्य बघून डोळे दिपून जातात व त्यावरून त्याकाळातील स्थापत्य, शिल्प आणि वास्तू कला किती प्रगत होती हे लक्षात येते, सदर लेण्यांची सखोल चौकशी आणि पाहणी केल्यानंतर लक्षात येते की तिथून लोहमार्ग, वाहतूक मार्ग, जोडरस्ते यांचे दर्शन होते म्हणजेच याच्या आसपास त्याकाळी व्यापारी केंद्रे असावीत, कारण सागरी किनारे ही या लेण्यांपासून काही अंतरावर आहेत म्हणजेच सागरी मार्गातून दळणवळण केले जात असणार, या बुद्ध लेण्यांमध्ये असणाऱ्या लिपीचे वाचन केलं तर आपल्याला समता, स्वतंत्र, विश्व बंधुता या वैभवशाली बुद्ध विचारधारेचे दर्शन होते, त्यामुळे ज्या ज्या ठिकाणी उत्खनन होते त्या त्या ठिकाणी बुद्धच सापडतात” असे प्रतिपादन कोकणातील अपरिचित लेण्या या विषयावर बोलत असताना प्रफुल पुरळकर यांनी वर्षावास धम्म प्रवचन मालिकेचे दहावे पुष्प गुंफत असताना केले.
बौद्धजन पंचायत समिती संलग्न संस्कार समिती यांच्या संयुक्त विद्यमाने सालाबादप्रमाणे याही वर्षी आषाढ पौर्णिमा ते आश्विन पौर्णिमा या कालावधीत वर्षावास धम्म प्रवचन मालिकेचे आयोजन करण्यात आले आहे या प्रवचन मालिकेचे दहावे पुष्प उपसभापती विनोद मोरे यांच्या अध्यक्षतेखाली डॉ. बाबासाहेब आंबेडकर स्मारक सभागृह, भोईवाडा, परेल, मुंबई – १२ येथे मोठ्या उत्साहात पार पडले सदर प्रसंगी गौतम बुद्धांच्या आणि महापुरुषांच्या प्रतिमेस पुष्पहार अर्पण करून ज्योत प्रज्वलित करण्यात आली तद्नंतर मंजू उत्तम कदम यांनी आपल्या सुमधुर वाणीने सूत्तपठण व पूजापठण केले. कार्यक्रमाचे सूत्रसंचालन संस्कार समितीचे सरचिटणीस मनोहर बा. मोरे यांनी आपल्या भारदस्त आवाजात लाघवी भाषाशैलीत केले तर संस्कार समितीचे अध्यक्ष मंगेश पवार यांनी कार्यक्रमाचे प्रास्ताविक सादर केले.
अध्यक्षीय भाषणात बोलत असताना विनोद मोरे यांनी “कोकणातील अपरिचित लेणी या कोकणातील वैभवशाली इतिहासाची साक्ष देतात याबद्दल प्रफुल्ल विश्वनाथ पुरळकर यांनी सर्वांना सहज समजेल अशा साध्या भाषेत विषयाची मांडणी केली त्याबद्दल त्यांचे कौतुक करावे तितके कमी आहे.” असे नमूद केले.
सदर कार्यक्रमास सरचिटणीस राजेश घाडगे, खजिनदार नागसेन गमरे, उपकार्याध्यक्ष मनोहर सखाराम मोरे, विवाह मंडळाचे अध्यक्ष राजाभाऊ तथा रामदास धो. गमरे, कमलाकर वाणी, राजेश गमरे, भगवान साळवी, मनोहर मोरे, प्रमोद जाधव, विजय साळवी, संतोष कांबळे, दयानंद धोत्रे, महिला मंडळाच्या विठाबाई कदम, लतिका गमरे, मालती कदम, तुळसा गायकवाड, रेश्मा साळवी, स्नेहा धोत्रे, उपासक, उपासिका आदी मान्यवर मोठ्या संख्येने उपस्थित होते, सदर प्रसंगी शिवडी गटक्रमांक १३ येथील शाखा ३१० या शाखेच्या वतीने खीर वाटप करण्यात आले. सरतेशेवटी सदर कार्यक्रम यशस्वीपणे पार पाडण्यासाठी अथक परिश्रम घेणाऱ्या सर्वांचे आभार मानून मनोहर बा. मोरे यांनी कार्यक्रमाची सांगता केली.
