राज्यसभा निवडणुकीपूर्वी भाजप अलर्ट मोडवर आहे. या पार्श्वभूमीवर भाजपने उमेदवारांची घोषणा सुरू केली असून काल म्हणजेच सोमवारी पक्षाकडून ८ नवीन चेहऱ्यांची नावे जाहीर करण्यात आली. मात्र, या यादीत केंद्रीय मंत्री राहिलेल्या बी.एल. वर्मा आणि हरदीप सिंह पुरी यांना पुन्हा राज्यसभेची संधी न मिळाल्याने राजकीय चर्चांना उधाण आलं आहे. विशेष म्हणजे, या दोन्ही नेत्यांना भविष्यात कोणती जबाबदारी दिली जाणार, याबाबत भाजपकडून अद्याप अधिकृत माहिती देण्यात आलेली नाही. तसेच या व्यतिरिक्त मोदींच्या मंत्रिमंडळात आणखी ४ नवीन चेहऱ्यांची एन्ट्री होणार असल्याची चर्चा आहे.
नवरात्रीनंतर मोदींच्या मंत्रिमंडळात फेरबदलाची शक्यता व्यक्त केली जात आहे. त्याआधी परिसीमन आणि महिला आरक्षणाशी संबंधित घटनादुरुस्ती विधेयके मंजूर करण्यासाठी विशेष अधिवेशन बोलावलं जाण्याची शक्यता आहे. नवरात्री संपल्यानंतर हे अधिवेशन होण्याची शक्यता असून त्यानंतर मंत्रिमंडळात फेरबदलाची शक्यता वर्तवण्यात येत आहे.
हरदीप पुरी यांना राज्यसभेची उमेदवारी न मिळाल्याने पंजाबमधून एखाद्या शीख चेहऱ्याला मंत्रिमंडळात संधी मिळण्याची शक्यता चर्चेत आहे. अकाली दलासोबत युती झाल्यास हरसिमरत कौर बादल यांचे मंत्रिमंडळात पुनरागमन होऊ शकते. नव्याने सोबत आलेल्या मित्र पक्षांनाही मंत्रिमंडळात स्थान दिलं जाऊ शकतं. आपचे भाजपमध्ये आलेले ७ खासदार तर शिवसेना ठाकरे गटातून शिवसेनेत आलेल्या ६ खासदारांमुळे एनडीएची ताकद वाढली. त्यामुळे आप आणि शिवसेनेलाही मंत्रिपद दिलं जाऊ शकतं.
बी.एल. वर्मा आणि हरदीप सिंह पुरी यांचा राज्यसभेतील कार्यकाळ नोव्हेंबरमध्ये संपणार आहे. संविधानाच्या अनुच्छेद 75(5) नुसार, एखादा मंत्री सलग सहा महिने संसद सदस्य नसल्यास त्याला मंत्रिपदाचा राजीनामा द्यावा लागतो. त्यामुळे आगामी काळात मोदी सरकारच्या मंत्रिमंडळात काही नव्या चेहऱ्यांना संधी मिळण्याची शक्यता व्यक्त केली जात आहे. मात्र, याबाबत अद्याप कोणतीही अधिकृत घोषणा झालेली नाही.
राज्यसभेत पुन्हा प्रवेश न मिळालेल्या हरदीप सिंह पुरी, बी.एल. वर्मा, रवनीत सिंह बिट्टू आणि जॉर्ज कुरियन यांच्या जागी आता चार नव्या चेहऱ्यांचा मंत्रिमंडळात समावेश होऊ शकतो, अशी चर्चा राजकीय वर्तुळात आहे. रवनीत सिंह बिट्टू यांनी जुलैमध्ये रेल्वे राज्यमंत्रीपदाचा राजीनामा दिला होता. त्यांचा राज्यसभा कार्यकाळ जूनमध्ये संपला होता. पंजाबमध्ये २०२७ मध्ये होणाऱ्या विधानसभा निवडणुकीच्या पार्श्वभूमीवर बिट्टू यांना भाजपकडून मोठी संघटनात्मक जबाबदारी दिली जाऊ शकते, अशीही चर्चा आहे.
केंद्रीय पेट्रोलियम आणि नैसर्गिक वायू मंत्री हरदीप सिंह पुरी तसेच केंद्रीय राज्यमंत्री बी. एल. वर्मा यांचा कार्यकाळ संपत आला आहे. यानंतर पुन्हा त्यांची राज्यसभेवर निवड होणार नसल्यानं मंत्रिपदही जाणार हे निश्चित मानलं जात आहे. हरदीप सिंह पुरी आणि बी. एल. वर्मा हे दोघेही उत्तर प्रदेशातून राज्यसभेचे खासदार आहेत. त्यांचा कार्यकाळ संपल्यानंतर ते खासदार नसताना पुढील सहा महिने मंत्री राहू शकतात. मात्र पुढील सहा महिन्यांत भाजपला राज्यसभेची नवी जागा मिळण्याचीही शक्यता नाही. त्यामुळे आता हरदीप पुरी आणि बीएल वर्मा हे मंत्रिमंडळात कायम राहण्याबाबत प्रश्न उपस्थित होत आहेत.
मोदींच्या मंत्रिमंडळात एकूण पाच मंत्रिपदं रिक्त होण्याची शक्यता आहे. धर्मेंद्र प्रधान यांनी शिक्षणमंत्री पदाचा राजीनामा दिलाय. तर राज्यसभेचा कार्यकाळ संपल्यानंतर जॉर्ज कुरियन आणि रवनीत सिंह बिट्टू यांनीही मंत्रिपद सोडलंय. दुसरीकडे हर्ष मल्होत्रा यांची दिल्ली भाजपच्या अध्यक्षपदी, तर पंकज चौधरी यांची उत्तर प्रदेश भाजप अध्यक्षपदी नियुक्ती झालीय. दरम्यान, मंत्री पीयूष गोयल यांच्याकडे भाजपच्या कोषाध्यक्षपदाची जबाबदारी सोपवण्यात आलीय. एक व्यक्ती एक पद यानुसार या नेत्यांनाही मंत्रिपद सोडावं लागू शकतं.
दुसरीकडे, जॉर्ज कुरियन यांनीही जूनमध्ये राज्यसभा कार्यकाळ संपल्यानंतर केंद्रीय राज्यमंत्रीपदाचा राजीनामा दिला. ते अल्पसंख्याक व्यवहार राज्यमंत्री होते. कुरियन यांना पक्ष संघटनेत महत्त्वाची जबाबदारी मिळण्याची शक्यता व्यक्त केली जात आहे. दरम्यान, भाजपने जाहीर केलेल्या नव्या राज्यसभा उमेदवारांच्या यादीत धर्मपाल सिंह, राधाकांत ओझा, प्रकाश पाल, विद्यासागर सोनकर, गोपी कृष्ण पांडेय, प्रियंका सिंह रावत, रामप्रताप सिंह चौहान आणि श्रुती गंगवार यांचा समावेश आहे. काही महिन्यांपूर्वी भाजपच्या संघटनेतही मोठे बदल झाले आहेत. त्यामुळे आता सरकारमधील काही अनुभवी नेत्यांना संघटनेत महत्त्वाची जबाबदारी देऊन नव्या चेहऱ्यांना मंत्रिमंडळात संधी दिली जाणार का? याकडे राजकीय वर्तुळाचे लक्ष लागले आहे.
