मुंबई दि. ४ (विकास लहाने) मानवी तस्करीसारख्या गंभीर सामाजिक समस्येला प्रतिबंध करण्याबरोबरच तस्करीच्या घटनांमध्ये पीडितांना तातडीची मदत, कायदेशीर मार्गदर्शन आणि पुनर्वसनाची प्रक्रिया अधिक प्रभावी करण्यासाठी सामाजिक कार्यकर्त्यांची भूमिका महत्त्वाची आहे, या पार्श्वभूमीवर संकल्प संस्था, मुंबई स्माईल्स आणि सारथी सोशल फाउंडेशन यांच्या संयुक्त विद्यमाने सामाजिक कार्यकर्त्यांसाठी एकदिवसीय प्रशिक्षण कार्यशाळेचे आयोजन नेहरू नगर, कुर्ला (पूर्व) येथील पंतवालावलकर माध्यमिक विद्यालयात करण्यात आले, सदर कार्यशाळेत ३५ प्रशिक्षणार्थींनी सहभाग घेतला.
‘मानवी तस्करी : कारणे, परिणाम, प्रतिबंध, सामाजिक कार्यकर्त्यांची भूमिका आणि समुपदेशन’ या विषयावर आयोजित कार्यशाळेत मानवी तस्करीची कारणे, तिचे विविध प्रकार आणि त्याचे व्यक्ती तसेच समाजावर होणारे परिणाम यावर सविस्तर मार्गदर्शन करण्यात आले. विशेषतः बालके आणि महिलांना तस्करीचा असलेला धोका, संभाव्य प्रकरणे ओळखण्याच्या पद्धती आणि प्रतिबंधात्मक उपाययोजनांवर प्रशिक्षणार्थींशी चर्चा करण्यात आली.
मानवी तस्करीच्या प्रकरणांमध्ये पीडित व्यक्तींशी संवेदनशीलतेने संवाद साधणे, प्राथमिक समुपदेशन करणे, त्यांना आवश्यक शासकीय व कायदेशीर मदत उपलब्ध करून देणे, पुनर्वसनाची प्रक्रिया समजून घेणे आणि समाजात पुनर्समावेशनासाठी आवश्यक सहकार्य करणे, या बाबींवरही प्रशिक्षण देण्यात आले. संबंधित कायदेशीर तरतुदी आणि उपलब्ध यंत्रणांची माहिती प्रशिक्षणार्थींना देण्यात आली.
संकल्प संस्थेचे संस्थापक अध्यक्ष विनोद हिवाळे यांच्या मार्गदर्शनाखाली कार्यशाळेचे आयोजन करण्यात आले. मुंबई स्माईल्सचे संस्थापक जौमे सान्लोरेन्टे प्रमुख पाहुणे म्हणून उपस्थित होते. कार्यक्रमाचे समन्वयन सविता हेंडवे आणि सुवर्णा सोरटे यांनी केले, तर मुंबई स्माईल्सचे समन्वयक विकास गायकवाड यांच्या सहकार्याने कार्यशाळेचे नियोजन करण्यात आले.
मानवी तस्करी प्रतिबंध, पीडित सहाय्य आणि पुनर्वसनातील सामाजिक कार्यकर्त्यांची भूमिका या विषयावर बोलताना विनोद हिवाळे यांनी सामाजिक कार्यकर्त्यांनी केवळ जनजागृतीपुरते काम मर्यादित न ठेवता पीडितांना योग्य शासकीय व कायदेशीर यंत्रणेशी जोडण्यावर भर देण्याची गरज व्यक्त केली. समुदाय पातळीवर प्रतिबंधात्मक काम उभे करणे आणि तस्करीची संभाव्य प्रकरणे गांभीर्याने हाताळणे आवश्यक असल्याचेही त्यांनी सांगितले.
कार्यशाळेत चर्चासत्रे, प्रश्नोत्तरे आणि अनुभवांची देवाणघेवाण झाली. प्रशिक्षणार्थींनी विविध परिस्थितींवर चर्चा करत सक्रिय सहभाग नोंदविला. प्रशिक्षणातून मिळालेले ज्ञान प्रत्यक्ष सामाजिक कार्यात वापरण्याचा निर्धारही यावेळी व्यक्त करण्यात आला.
दरम्यान, कार्यशाळेचा विशेष भाग म्हणून सर्व प्रशिक्षणार्थींनी मानवी तस्करीविरोधी सामूहिक प्रतिज्ञा घेतली. तस्करीविरोधात जनजागृती करणे, पीडितांच्या सन्मान व हक्कांचे संरक्षण करणे, संशयास्पद प्रकरणांची माहिती संबंधित यंत्रणेला देणे आणि सामाजिक कार्यकर्ता म्हणून जबाबदारीने कार्य करण्याचा संकल्प यावेळी करण्यात आला.
कार्यशाळेच्या समारोपप्रसंगी ३५ प्रशिक्षणार्थींना सहभाग प्रमाणपत्रांचे वितरण करण्यात आले. कार्यशाळेच्या यशस्वी आयोजनासाठी आयोजक संस्था, मार्गदर्शक, समन्वयक, स्वयंसेवक आणि प्रशिक्षणार्थींचे सहकार्य लाभले.
