नेरूळ दि. ४ (रामदास धो. गमरे) बौद्धजन पंचायत समिती शाखा क्रमांक ७७३ आणि माता रमाई महिला संघ, नेरूळ यांच्या संयुक्त विद्यमाने आषाढ पौर्णिमा ते आश्विन पौर्णिमा या कालावधीत आयोजित वर्षावास धम्म प्रवचन मालिका शाखेचे अध्यक्ष राजेंद्रजी पवार यांच्या अध्यक्षतेखाली नेरुळ येथे मोठ्या उत्साहात संपन्न झाला.
सदर प्रसंगी कार्यक्रमाच्या प्रारंभी बौद्धाचार्य अरुण कांबळे भोवडेकर यांच्या हस्ते प्रतिमा पूजन करून सुमधुर वाणीने सूत्रपठण करण्यात आले तद्नंतर शाखेच्या वतीने उपस्थितांचे व प्रवचनकारांचे स्वागत व सन्मान करण्यात आला.
प्रवचनादरम्यान बौद्धाचार्य कांबळे भोवडेकर यांनी पाली भाषेतील जयमंगल अष्टगाथेतील प्रत्येक गाथेचा आशय सर्वसामान्यांना सहज समजेल अशा भाषेत स्पष्ट केला. केवळ गाथांचे पठण न करता त्यामागील बुद्धविचार, जीवनमूल्ये आणि धम्माचा व्यावहारिक संदेश त्यांनी विविध उदाहरणांच्या माध्यमातून श्रोत्यांसमोर मांडला त्यामुळे पाली भाषेतील गाथांचा अर्थ आणि त्यातील तात्त्विक आशय उपस्थितांना अधिक सुस्पष्टपणे समजून घेता आला. त्यांच्या प्रवचनातील अभ्यासपूर्ण संदर्भ, सहजसुंदर मांडणी आणि प्रभावी विवेचन यामुळे उपस्थितांकडून त्यांचे विशेष कौतुक करण्यात आले. विषयावरील त्यांचे प्रभुत्व पाहता वाचन, मनन, चिंतन आणि पठणाच्या प्रदीर्घ अभ्यासाची प्रचिती या प्रवचनातून आली.
सदर कार्यक्रमास शाखेचे पदाधिकारी, कार्यकर्ते, ज्येष्ठ नागरिक, उपासक-उपासिका मोठ्या संख्येने उपस्थित होते. सरतेशेवटी सदर कार्यक्रम यशस्वीपणे पार पाडण्यासाठी अथक परिश्रम घेणाऱ्या सर्वांचे आणि उपस्थितांचे आभार मानून शाखेचे चिटणीस विनायक जाधव यांनी कार्यक्रमाची सांगता केली.
