विशेष सखोल पुनरीक्षण (एसआयआर) अभियानानंतर मतदारांच्या तपशिलात तफावत (ॲनोमलीज) आढळली आहे. मॅपिंग न झालेले (नो लिंकेज) मतदारही मोठ्या संख्येने आहेत. अशा मतदारांची आता पडताळणी व सुनावणी होणार आहे. पुणे शहरातील सुमारे १ लाख ९९ हजार २६३ मतदारांच्या सुनावणीची प्रक्रिया राबविण्यात येणार आहे. संबंधित मतदारांना सोमवारपासून नोटिसा बजावण्यास सुरुवात होणार आहे. त्यानंतर सात दिवसांनी प्रत्यक्ष सुनावणी घेण्यात येणार आहे.
चिंचवडमध्ये सर्वाधिक नोटिसा
चिंचवड विधानसभा मतदारसंघात एसआयआरपूर्वी ६ लाख ८७ हजार ४४८ मतदार होते. त्यापैकी ४ लाख १७ हजार ४२५ मतदार प्रारूप यादीत समाविष्ट झाले आहेत. ४६ हजार २७८ मतदारांच्या तपशिलात तफावत आढळली आहे, तर ५६ हजार ७३५ मतदारांचे मॅपिंग झालेले नाही. या दोन्ही प्रकारांतील १ लाख ३ हजार १३ मतदारांना नोटिसा दिल्या जाणार असून त्यानंतर पडताळणी व सुनावणी होणार आहे.
पिंपरीत ७८ हजार मतदारांची सुनावणी
पिंपरी विधानसभा मतदारसंघात ४ लाख १ हजार ९७५ मतदार होते. त्यापैकी २ लाख ३६ हजार २७८ मतदार प्रारूप यादीत समाविष्ट आहेत. २३ हजार ६९० मतदारांच्या तपशिलात तफावत आढळली आहे, तर ५४ हजार ६७६ मतदारांचे मॅपिंग झालेले नाही. त्यामुळे या ७८ हजार ३६६ मतदारांची पडताळणी व सुनावणी होणार आहे.
भोसरीत १७ हजार ८८४ मतदारांची सुनावणी
भोसरी विधानसभा मतदारसंघात ६ लाख ३५ हजार ११४ मतदार होते. त्यापैकी ४ लाख ६१ हजार ९०७ मतदार प्रारूप यादीत समाविष्ट आहेत. १० हजार ९२७ मतदारांच्या तपशिलात तफावत आढळली, तर ६ हजार ९५७ मतदारांचे मॅपिंग झालेले नाही. या १७ हजार ८८४ मतदारांची सुनावणी होणार आहे.
दोन महिन्यांत दोन लाख सुनावण्यांचे आव्हान
प्रारूप मतदार यादीवरील दावे व हरकती दाखल करण्यासाठी ३० सप्टेंबरपर्यंत मुदत आहे. त्यावर २९ ऑक्टोबरपर्यंत सुनावणीची प्रक्रिया पूर्ण करण्याचे नियोजन आहे. सुनावणीसाठी सहायक मतदार नोंदणी अधिकारी नियुक्त करण्यात आले आहेत. प्रत्येक अधिकाऱ्याने दिवसाला किमान १५० मतदारांची सुनावणी पूर्ण करावी, असे नियोजन करण्यात आले आहे. दोन लाख मतदारांची सुनावणी दोन महिन्यांत पूर्ण करण्याचे आव्हान प्रशासनासमोर आहे.
सुनावणीदरम्यान कागदपत्रांची पडताळणी होणार
सुनावणीदरम्यान संबंधित मतदारांच्या कागदपत्रांची पडताळणी केली जाणार आहे. मतदारांच्या तपशिलातील तफावत दूर झाल्यानंतर तसेच मॅपिंगची प्रक्रिया पूर्ण झाल्यानंतर पात्र मतदारांचे नाव अंतिम मतदार यादीत समाविष्ट केले जाणार आहे. अंतिम मतदार यादी ४ नोव्हेंबर रोजी प्रसिद्ध होणार आहे.
