उच्च शिक्षण मंत्र्यांच्या खासगी घरातच जबरी चोरी! पोलिसांची गस्त तरीही 600 ग्रॅम सोनं, 2 किलो चांदी आणि 7 लाख रोकड फुर्र

0

एजी कॉलनीतील उच्च शिक्षण मंत्र्याच्या घरी चोरी करून पाटणातील सराईत चोरांनी थेट उच्च शिक्षण मंत्र्यांनाच इंगा दाखवला आहे. बिहार सरकारचे उच्च शिक्षण मंत्री संजय टायगर यांच्या घरीच चोरांनी हात मारला आहे. एजी कॉलनीत उच्च शिक्षण मंत्र्याचं घर आहे. 14 आणि 15 नोव्हेंबरच्या रात्री चोरांनी ही चोरी केली. चोरांनी घरातील 600 ग्रॅम सोनं, 2 किलो चांदी आणि 7 लाख रुपये रोख रक्कम लंपास केली. या घटनेनंतर शास्त्री नगर पोलीस ठाण्याचे पोलीस आरोपींचा शोध घेत आहेत.

थेट शिक्षण मंत्र्यांच्याच घरी चोरांनी डल्ला मारल्याने पोलिसांची झोप उडाली आहे. उच्च शिक्षण मंत्री संजय टायगर यांचं खासगी घर शास्त्री नगर पोलीस ठाण्याच्या हद्दीत एजी कॉलनीत आहे. याच ठिकाणी मोठी चोरी झाली आहे. घरातून किंमती दागिणे आणि रोख रक्कम चोरी झाली आहे. या घटनेनंतर कायदा सुव्यवस्थेवर सवाल केले जात आहेत. तर थेट मंत्र्याच्याच घरी चोरी झाल्याने सामान्य नागरिकांमध्ये ही घटना चर्चेचा विषय बनली आहे.

अधिक वाचा  कोथरूडमध्ये सामाजिक व ज्ञाती संस्थांच्या पदाधिकाऱ्यांचा दिवाळी फराळ स्नेहमेळावा उत्साहात संपन्न; सामाजिक एकोपा, समरसतेचा विचार जपण्याचा संकल्प!

प्रत्येक अँगलने तपास

पोलिसांनी दिलेल्या माहितीनुसार, संजय टायगर यांच्या घरातून सुमारे 600 ग्रॅम सोनं, 2 किलो चांदी आणि 7 लाख रुपये रोख रक्कम चोरांनी पळविले आहेत. चोरांनी घरातील किमती सामानच लक्ष्य केलं आहे. रात्रीच्यावेळी ही चोरी करून चोर फरार झाले आहेत. चोरीच्या सामानाची किमत खूप अधिक असल्याचं सांगितलं जात आहे. पोलीस या चोरीचा तपास करत असून प्रत्येक अँगलने या घटनेचा तपास करत आहेत.

वरिष्ठ पोलीस अधिकाऱ्यांची टीम

विशेष म्हणजे चोरीच्या रात्री पोलिसांची एक टीम या परिसरात गस्त घालून गेली होती. पण त्यांना या परिसरात काही तरी संदिग्ध घडतंय असं जाणवलं नाही. पोलिसांची गस्त असतानाही चोरांनी फूल प्लानिंगने चोरी केल्याने पोलिसांच्या तोंडचं पाणी पळालं आहे. या घटनेनंतर फॉरेन्सिक टीम आणि डॉग स्क्वायडला बोलावून या घटनेचा तपास सुरू करण्यात आला आहे. पोलीस आसपासच्या परिसरातील लोकांच्या साक्षी घेत आहे. सीसीटीव्हीही खंगाळले जात आहेत. या चोरीत कोण कोण सामील झाले होते आणि चोर कोणत्या रस्त्याने आले आणि कोणत्या रस्त्याने फरार झाले, याचा पोलीस शोध घेत आहेत. प्रकरणाचं गांभीर्य ओळखून वरिष्ठ पोलिसांची एक विशेष टीम स्थापन करण्यात आली आहे. ही टीम शास्त्रीनगर पोलिस ठाण्याच्या पोलिसांशी मिळून चोरीच्या प्रकरणाचा छडा लावत आहे.

अधिक वाचा  आदिवासी पाड्यावरील कुटुंबांसोबत दिवाळीचा सण संपन्न; वसंत मालिनी आधार आश्रमातर्फे फराळ वाटप