ठाणे दि. ९ (रामदास धो. गमरे) दिवाळीचा आनंद समाजातील प्रत्येक घटकापर्यंत पोहोचावा आणि वंचित कुटुंबांच्याही सणात आनंदाचे रंग भरावेत, या सामाजिक भावनेतून वसंत मालिनी आधार आश्रम यांच्या विद्यमाने ठाणे जिल्ह्यातील शहापूर तालुक्यातील पाचारवाडी, साकडबाट येथील आदिवासी कुटुंबांना दिवाळीनिमित्त फराळाचे वाटप करण्यात आले.
सदर उपक्रमात पाड्यावरील ज्येष्ठ महिला-पुरुष, तरुण, लहान मुले व मुलींनी उत्स्फूर्त सहभाग नोंदवला. संस्थेच्या या सामाजिक उपक्रमाबद्दल स्थानिक ग्रामस्थांनी आभार व्यक्त करत समाधान व्यक्त केले. यावेळी विद्यार्थ्यांनी विविध गाणी सादर करून कार्यक्रमात आनंदाचे वातावरण निर्माण केले.
सदर प्रसंगी संस्थेचे अध्यक्ष किशोर माने, सदस्य चित्रा गणकुटकर, वैशाली कांबळे, किशोरी मोरे, प्रवीण माने, गणेश रावराणे, प्रणय पाटकर, हंड्री सॅम्युएल, किशोर मोरे तसेच स्थानिक कार्यकर्ते भास्कर चौधरी उपस्थित होते. समाजातील गरजू आणि वंचित घटकांसोबत सणांचा आनंद वाटून घेण्याचा संस्थेचा हा उपक्रम सामाजिक बांधिलकीचे सुंदर उदाहरण ठरला.




