गोकुळसाठी चंद्रकांत पाटील यांनी मुख्यमंत्र्यांवर दबाव आणण्याचं काम केले. आता ही लढाई अंगलट येत असल्याने मुख्यमंत्र्यांना ओढण्याचं काम पाटील करताहेत. तुम्ही आता धमक्या द्यायला लागलात. तुमचा काचेचा महाल मलाही माहिती आहे. त्यामुळे मला बोलायला लावू नका. मी पण पाटील आहे. तुम्ही सरकारी यंत्रणेतून मला धमकी देऊ नका. तुम्हाला लढायचं असेल तर २०२९ ला जिल्ह्यातील दहा मतदारसंघात कुठेही एकमेकांविरोधात लढूया अशा शब्दात सतेज पाटील यांनी मंत्री चंद्रकांत पाटील यांच्यावर घणाघात केला आहे.
पत्रकार परिषदेत सतेज पाटील म्हणाले की, चंद्रकांत पाटील जेवढे मोठे होत आहेत त्यांची वैचारिक पातळी तेवढी खाली होत चालली आहे. चंद्रकांत पाटील यांच्यासोबत माझी लढाई १० वर्ष सुरू आहे. स्वर्गीय डी वाय पाटील यांच्यावर बोलून तुम्ही काय मिळवलं? डी वाय पाटील यांचा अपमान करण्याचा प्रयत्न त्यांनी केला. त्याचे चिंतन त्यांनी करावं. कार्यकर्त्यांच्या जीवावर निवडणूक लढूया. सरकारी यंत्रणेचा गैरवापर करून तुम्हाला उद्ध्वस्त करतो, तुम्हाला संपवतो ही भाषा माझ्यासमोर वापरू नका. कोल्हापूरच्या जनतेलाही आवडणार नाही. महाराष्ट्रातील जनता असली भाषा खपवून घेणार नाही असं पाटील यांनी सांगितले. तसेच माझ्यामुळे २०१४ ला राष्ट्रवादीचा खासदार कोल्हापूरात झाला. त्या खासदाराने मला ऑक्टोबरमध्ये फसवले. २०२०-२२ मध्ये विधानपरिषदेच्या बिनविरोध झाल्या तेव्हा धुळे, मुंबईत बिनविरोध निवडणूक काँग्रेसने केली, त्याबदल्यात कोल्हापूरात भाजपाने बिनविरोध निवडणूक करायची अशी चर्चा झाली. त्यामुळे आता टीका करण्याचं काम हे लोक करताहेत असं सतेज पाटलांनी मुश्रीफांना सुनावले.
तसेच लोकांनी दिलेला कौल अमान्य करण्याचं पाप महायुतीच्या नेत्यांनी केले आहे. त्याचा परिणाम निश्चितपणे उद्याच्या भविष्यकाळात या लोकांना भोगायला लागेल. हसन मुश्रीफ यांच्याकडून १३ संचालकांना धमकावण्याचं काम केले जाते. ही रेकॉर्डिंग समोर आली आहे. शासनाची व्यवस्था किती चुकीच्या पद्धतीने वापरायची हे मुश्रीफांनी दाखवून दिले. गोकुळ एकटे नाही तर अध्यादेश काढून राज्यात कुठलीही सहकारी संस्था ताब्यात घेतली जाईल. लोकांनी रस्त्यावर उतरून निषेध केला आहे. आता न्यायालयीन लढाई आम्ही लढू असंही सतेज पाटील यांनी सांगितले.
दरम्यान, निवडणूक २०२७ ची असो वा २०२९ ची…मी अद्याप कोणती निवडणूक लढवायची हा निर्णय घेतला नाही. हा निर्णय माझ्या हातात आहे. जेव्हा लढाई लढायची तेव्हा सारिपाट मांडला जाईल आणि त्या सारिपाटात कोणते डाव खेळायचे हे मला चांगले माहिती आहे. महाराष्ट्रासाठी मी बंटी पाटील राहणे महत्त्वाचे आहे. लोकांच्या हृदयात मी बंटी पाटील असणे पसंत करतो. साहेब म्हणून नसले तरी चालेल असा टोला सतेज पाटील यांनी चंद्रकांत पाटलांना लगावला.




