मागील तीन-चार महिन्यात सोन्याच्या दरात मोठा उलटफेर झाला आहे. गेल्या आठ दिवसात सोनं १२,४०० रुपयांनी स्वस्त झाले असून आजही घसरण सुरू राहिली आहे. आज बाजारात व्यवहाराला सुरुवात झाल्यानंतर सोन्याच्या दरात मोठी घसरण झाली आहे.मल्टी कमोडिटी एक्सचेंजवर (MCX) आज सोन्याचा वायदा भाव ३.४२ टक्क्यांनी घसरून प्रति १० ग्रॅम १,२३,०९२ रुपयांवर आला आहे. यापूर्वी सोने १,२७,५४८ रुपये प्रति १० ग्रॅमवर बंद झाले होते. बाजार उघडताच सोन्यात ३,४५६ रुपयांची घसरण नोंदवली गेली. अमेरिकी डॉलरची मजबूती आणि अमेरिकी फेडरल रिझर्व्हकडून व्याजदरात वाढ होण्याची शक्यता यामुळे किमतींवर दबाव वाढला आहे. चांदीच्या दरातही जवळपास ९००० रुपयांची घसरण नोंदवण्यात आली. सोनं-चांदीच्या दरात घसरण झाल्याने बाजारात खळबळ उडाली आहे.
आंतरराष्ट्रीय बाजारात स्पॉट गोल्ड १.२४ टक्क्यांनी घसरून ३,६७६.२७ डॉलर प्रति औंसवर पोहोचले आहे. सत्रादरम्यान ते सप्टेंबर २०२५ नंतरच्या सर्वात खालच्या पातळीवर गेले होते. तर डिसेंबर डिलिव्हरीसाठीचे यूएस गोल्ड फ्यूचर्स १.६७ टक्क्यांनी घसरून ३,६७९.५० डॉलर प्रति औंसवर आले आहेत.
आजचा दर काय?
इंडियन बुलियन असोसिएशनुसार, सकाळी १०.२० वाजण्याच्या सुमारास मुंबईत २४ कॅरेट सोन्याचा दर हा १,२६, ९०० रुपये आणि २२ कॅरेटचा दर हा १,१६,३०० रुपयांवर होता. तर, दिल्लीत २४ कॅरेटचा दर १,२२,२८७ आणि २२ कॅरेटचा भाव १,१६,३०० रुपयांवर पोहचला होता. या दरात जीएसटी आणि मेकिंग चार्जेसचा समावेश नाही.
शहर २४ कॅरेट (रुपये) २२ कॅरेट (रुपये)
नवी दिल्ली – १,१२,४५७
मुंबई १,२२,९०० १,१२,६५८
बेंगलुरु १,२३,०६० १,१२,८०५
कोलकाता १,२२,८०० १,१२,५६७
हैदराबाद १,२३,१६० १,१२,८९७
चेन्नई १,२३,३३० १,१३,०३५
चांदीचा दर आणखी घसरला?
भारतीय बाजारातील सुरुवातीच्या व्यवहारांमध्ये, चांदीच्या डिसेंबर फ्युचर्स किमतीत (MCX) सुमारे ९,००० रुपयांची म्हणजेच ५.१७ टक्क्यांची घसरण होऊन ती प्रति किलो सुमारे १,४९,००० रुपयांवर आली आहे. मागील सत्रात चांदीचा भाव प्रति किलो १,६०,७३४ रुपयांवर बंद झाला होता. दरम्यान, अमेरिकन डॉलर अधिक मजबूत होत असल्यामुळे आणि फेडरल रिझर्व्हकडून व्याजदर वाढवण्याची शक्यता वर्तवली जात असल्याने, चांदीच्या स्पॉट किमतीतही घसरण झाली असून ती प्रति औंस ४२ डॉलर्सच्या पातळीच्या जवळ पोहोचली आहे.
दर आणखी घसरणार?
कोटक निओचे कमोडिटी आणि करन्सी रिसर्च प्रमुख अनिंद्य बनर्जी यांच्या मते, सध्या बाजारात रोख रक्कम उभारण्याची चढाओढ सुरू आहे. गुंतवणूकदार सोने-चांदी, शेअर्स आणि क्रिप्टोकरन्सीसारख्या मालमत्तांमधून पैसा काढून अमेरिकी डॉलरमध्ये गुंतवणूक करत आहेत. डॉलर इंडेक्स १०४ च्या जवळ पोहोचला असून, हा १९ महिन्यांतील उच्चांक आहे. तसेच डिसेंबरमध्ये अमेरिकी फेडरल रिझर्व्हकडून व्याजदर वाढवले जाण्याची शक्यता जवळपास बाजारात गृहीत धरली गेली आहे.
दुसरीकडे, अमेरिकेच्या १० वर्षांच्या बॉन्ड यील्डने ५ टक्क्यांचा टप्पा ओलांडला आहे. त्यामुळे गुंतवणूकदारांसाठी सोन्यापेक्षा बॉन्ड अधिक आकर्षक ठरत आहेत. याशिवाय तंत्रज्ञान आणि एआय (AI) कंपन्यांच्या शेअरांतील घसरणीमुळे गुंतवणूकदार इतर मालमत्तांमध्येही विक्री करत असून, त्याचा फटका सोन्याला बसला आहे.
अनिंद्य बनर्जी यांच्यानुसार, सोन्यासाठी ३,५०० डॉलर प्रति औंस हा पहिला महत्त्वाचा आधार (सपोर्ट) स्तर आहे. त्याखाली ३,४०० ते ३,५०० डॉलर हा भक्कम सपोर्ट झोन आहे. या पातळीवर सोन्याची खरेदी परतते की नाही, यावर पुढील दिशा ठरेल. मात्र, किमतीत उलटफेर (रिव्हर्सल) होण्याचे स्पष्ट संकेत मिळेपर्यंत घसरणीचा कल कायम राहू शकतो.
घाईत खरेदी टाळण्याचा सल्ला
सध्या बाजारात विक्रीचा दबाव इतका अधिक आहे की, ‘ओव्हरसोल्ड’ स्थितीतही किमती आणखी खाली येऊ शकतात, असे अनिंद्य बनर्जी यांनी स्पष्ट केले आहे. त्यामुळे गुंतवणूकदारांनी घाईघाईत खरेदी करण्यापासून दूर राहावे. सोन्या-चांदीतील घसरण थांबण्यासाठी प्रथम दैनंदिन तक्त्यावर (डेली चार्ट) मजबुतीचे संकेत दिसणे आवश्यक आहे.




