शरद मोहोळ खून प्रकरणातील आरोपी गणेश निवृत्ती मारणे याच्यावरील पुणे शहर प्रवेशबंदी कायम ठेवण्याचा निर्णय विशेष मकोका न्यायालयाने दिला आहे. पुणे शहरात प्रवेश करण्यास परवानगी मिळावी, यासाठी मारणे याने दाखल केलेला अर्ज न्यायालयाने फेटाळला आहे. मारणे याला ७ मे २०२६ रोजी जामीन मंजूर करताना तीन वर्षे किंवा खटल्याचा निकाल लागेपर्यंत पुणे शहरात प्रवेश करण्यास मनाई करण्यात आली होती. पुण्यात कुटुंबीय, व्यवसाय असून, तीन मुले शिक्षण घेत आहेत; तसेच वृद्ध आईची काळजी घेण्यासाठी शहरात येणे आवश्यक असल्याचे कारण देऊन त्याने ही अट शिथिल करण्याची मागणी केली होती.
साक्षीदारांच्या सुरक्षेचा प्रश्न
विशेष सरकारी वकील प्रदीपसिंह राजपूत आणि मोहोळ कुटुंबीयांच्या वतीने ॲड. खेताराम सोलंकी, ॲड. संकेत राव, ॲड. तेजस सावंत आणि ॲड. भानुदास कोळी यांनी अर्जाला विरोध केला. मारणे याच्याविरुद्ध सात गंभीर गुन्ह्यांचा पूर्वइतिहास असून, त्याच्या प्रवेशामुळे साक्षीदारांच्या सुरक्षिततेचा प्रश्न निर्माण होऊ शकतो, असा युक्तिवाद करण्यात आला.
विशेष मकोका न्यायाधीश एच. एम. भोसले यांनी परिस्थितीत कोणताही ठोस बदल झालेला नसल्याचे निरीक्षण नोंदवून सात नोव्हेंबरला मारणे याचा अर्ज फेटाळला. त्यामुळे मारणे याच्यावरील पुणे शहर प्रवेशबंदी कायम राहणार आहे.
कोथरूड पोलिस कर्मचाऱ्यांसमोरच सराईत गुन्हेगाराचा खून
रेकॉर्डवरील गुन्हेगाराच्या घरी तपासणीसाठी निघालेल्या कोथरूड पोलिस कर्मचाऱ्यांसमोरच सराईत गुन्हेगार तरुणावर तलवार, कोयता आणि लोखंडी हत्याराने वार करून त्याचा खून करण्यात आला. शनिवारी (सात नोव्हेंबर) रात्री साडेनऊच्या सुमारास सुतारदरा परिसरात ही घटना घडली.
प्रकाश ऊर्फ लाल्या येवले (वय २७) असे मृत तरुणाचे नाव आहे. जुन्या वादातून हा खून झाल्याचा प्राथमिक अंदाज आहे. या प्रकरणी कोथरूड पोलिसांनी विकी मोरे आणि अनिकेत मालपोटे यांना ताब्यात घेतले असून, अन्य आरोपींचा शोध सुरू आहे.
पोलिसांनी दिलेल्या माहितीनुसार, प्रकाश येवले हा शनिवारी रात्री साडेनऊच्या सुमारास सुतारदरा परिसरातून जात होता. त्या वेळी तीन ते चार जणांच्या टोळक्याने त्याला अडवले. त्यानंतर आरोपींनी तलवार, कोयता आणि लोखंडी हत्याराने त्याच्यावर हल्ला केला. त्याच्या डोक्यावर आणि पाठीवर सपासप वार करण्यात आले; तसेच लाकडी दांडक्यानेही मारहाण केली.
दरम्यान, कोथरूड पोलिस ठाण्याचे कर्मचारी अभिलेखावरील गुन्हेगारांची तपासणी आणि परिसरातील अवैध धंद्यांची पाहणी करण्यासाठी गस्त घालत होते. प्रकाश येवले हा पोलिसांच्या अभिलेखावरील गुन्हेगार असल्याने त्याच्या घरी जाऊन तपासणी करण्यासाठी कर्मचारी निघाले होते. त्याच वेळी रस्त्यावर काही जण एका तरुणाला मारहाण करीत असल्याचे त्यांच्या निदर्शनास आले. पोलिसांना पाहताच हल्लेखोरांनी घटनास्थळावरून पळ काढला.
हल्ल्यात गंभीर जखमी झालेल्या प्रकाशला स्थानिक नागरिकांनी तातडीने खासगी रुग्णालयात दाखल केले. मात्र, डॉक्टरांनी उपचारांपूर्वीच त्याचा मृत्यू झाल्याचे घोषित केले. येवले याच्यावर यापूर्वी विविध गुन्हे दाखल आहेत. या प्रकरणी कोथरूड पोलिसांनी खुनाचा गुन्हा दाखल केला असून, ताब्यात घेतलेल्या दोघांकडे चौकशी सुरू आहे.




