‘खेळ पैठणीचा… सन्मान होम मिनिस्टरचा’ सोहळा उत्साहात संपन्न

0

शृंगारतळी, दि. १४ (रामदास धो. गमरे) पारमी प्रोडक्शन मुंबई आणि गुहागर तालुका कला मंच यांच्या संयुक्त विद्यमाने आयोजित ‘खेळ पैठणीचा… सन्मान होम मिनिस्टरचा’ हा महिलांच्या कलागुणांना वाव देणारा आणि त्यांच्या आनंदाचा सन्मान करणारा सोहळा मंगळवार, दि. १० नोव्हेंबर २०२६ रोजी ग्रामपंचायत पाटपन्हाळे येथील छत्रपती शिवाजी महाराज सभागृहात उत्साहात पार पडला. या कार्यक्रमाला सुमारे १५० जण उपस्थित होते, तर ५० महिलांनी विविध स्पर्धांमध्ये उत्स्फूर्त सहभाग घेतला.

सदर प्रसंगी छत्रपती शिवाजी महाराज आणि महामानव डॉ. बाबासाहेब आंबेडकर यांच्या प्रतिमांना पुष्प अर्पण करून कार्यक्रमाची सुरुवात करण्यात आली, त्यानंतर गायक योगेश यशवंत पवार (धम्मपद एक धम्मदेशना प्रबोधन वाद्यवृंद, मुंबई) आणि अमित भागुराम पवार (पंचशील गायन पार्टी, तळवली/मुंबई) यांनी स्वरसम्राट प्रल्हाद शिंदे यांच्या लोकप्रिय गीतांचे सादरीकरण उपस्थितांना मंत्रमुग्ध केले. कु. पारमी दिपाली रविंद्र पवार हिच्या आकर्षक प्रवेशानंतर प्रमुख निवेदक रविंद्र रोहिणी अनंत पवार यांनी कार्यक्रमाचे प्रास्ताविक केले.

पारमी प्रोडक्शन आणि गुहागर तालुका कला मंचाच्या माध्यमातून ग्रामीण भागातील कलाकारांना व्यासपीठ उपलब्ध करून देण्याचा उद्देश त्यांनी स्पष्ट केला. तद्नंतर ‘खेळ पैठणीचा’ या मुख्य कार्यक्रमाला सुरुवात झाली. महिलांनी विविध मनोरंजक खेळ, उखाणे, गाणी तसेच सामाजिक आणि विनोदी प्रश्नमंजुषेत उत्साहाने सहभाग घेतला. योग्य उत्तरे देणाऱ्या स्पर्धकांना तत्काळ आकर्षक बक्षिसे देण्यात आली. ग्रामीण भागातून सहभागी झालेल्या महिलांचा आत्मविश्वास, उत्साह आणि आनंद यामुळे सभागृहात चैतन्याचे वातावरण निर्माण झाले.

अधिक वाचा  चंद्रकांतदादा पाटील यांच्या संकल्पनेच्या ‘सुखदा’मध्ये १००० बालकांचा अनोखा बालदिन सोहळा मायेचा स्पर्श अन् आनंदाचा उत्सवही

कार्यक्रमात स्थानिक कलाकारांनीही आपल्या कलागुणांचे सादरीकरण करून रंगत वाढवली. कु. आर्वी रसिका उज्वल पवार हिने सुरेल गायन केले. विलास सोलकर यांनी विविध आवाजांची नक्कल, विनोदी मिमिक्री आणि जादूचे प्रयोग सादर केले. कवी धीरज शांताराम पवार यांनी स्वरचित कविता सादर केली, तर कु. पारमी दिपाली रविंद्र पवार हिने धीरज पवार लिखित कार्यक्रमाच्या विषयावरील कविता सादर केली. या सादरीकरणांना उपस्थितांनी टाळ्यांच्या कडकडाटात दाद दिली.

स्पर्धेत प्रथम क्रमांक पटकावणाऱ्या सौ. सायली प्रमोद शिरगावकर (जाणवळे) यांना मानाची पैठणी, सन्मानचिन्ह, भारतीय संविधान ग्रंथ आणि पुष्पगुच्छ देऊन गौरविण्यात आले. द्वितीय क्रमांकाच्या सौ. मनीषा महेंद्र जाधव (त्रिशूळ-साखरी) यांना पैठणी, सन्मानचिन्ह आणि पुष्पगुच्छ देऊन सन्मानित करण्यात आले. तसेच सौ. मीनल कदम (आबलोली), संजीवनी पागडे, रूपांजली पवार, अंकिता सावंत, संजीवनी दयाळकर, पवित्रा शिरगावकर आणि हेमांगिनी सुधीर चरकरे यांना विशेष आकर्षक बक्षिसे देण्यात आली.

अधिक वाचा  धनकवडी शंकर महाराज मठाच्या अन्नछत्राला एफडीएचा दणका; अतिक्रमण करून अन्नपदार्थ होत असल्याचेही समोर तोपर्यंत सेवा बंद

सदर कार्यक्रमाला ज्येष्ठ सामाजिक कार्यकर्ते आनंद डी. पवार, प्रभाकर गणू पवार, सुनील गोविंद पवार, माजी सैनिक व सामाजिक कार्यकर्ते सुनील जाधव, रिगल कॉलेज शृंगारतळीचे अध्यक्ष महेंद्र कदम, आदर्श शेतकरी पुरस्कारप्राप्त सखाराम लक्ष्मण पवार, पत्रकार संदेश कदम, निर्माती दिपाली रविंद्र पवार, युवा कार्यकर्ता राकेश हरिश्चंद्र पवार यांच्यासह प्रतीक जाधव, वनिता भागुराम पवार, रोहिणी अनंत पवार, सुगंधा दामोदर पवार, सुषमा रमेश पवार, रसिका पवार, मोहिते मॅडम आणि कदम ताई उपस्थित होते. यावेळी आयोजनातील विशेष कामगिरीबद्दल सचिन केशव पवार यांना, तर आयोजनासाठी दिलेल्या सहकार्याबद्दल उज्वल जनार्दन पवार यांना विशेष सन्मानाने गौरविण्यात आले. कार्यक्रमाच्या यशस्वितेसाठी संपर्कप्रमुख व प्रतिनिधी विलास सोलकर, प्रशांत भेकरे, संतोष भेकरे, उज्वल पवार, धीरज पवार आणि सचिन पवार यांनी विशेष परिश्रम घेतले. राजेंद्र मोरे आणि रविंद्र कदम हे उपस्थित राहू शकले नसले तरी त्यांनीही मोलाचे सहकार्य केले.

अधिक वाचा  कर्वेनगर नदीपात्रातील ‘उड्डाण’पूल पूर्णत्वास; मात्र जोडरस्त्यांचे ‘कागदी घोडे’च! चंद्रकांतदादांचा महत्वकांक्षी ‘मिसिंग लिंक’ही डिस्कनेक्टेड?

कार्यक्रमासाठी सकाळच्या नाश्त्याची व्यवस्था अमित भागुराम पवार यांच्या वतीने करण्यात आली होती. उपस्थितांसाठी पिण्याच्या पाण्याची व्यवस्था उज्वल जनार्दन पवार यांनी केली, तर दुपारच्या भोजनाचीही व्यवस्था करण्यात आली होती.

समारोपप्रसंगी गुहागर तालुका कला मंचाचे संस्थापक, अध्यक्ष व संचालक रविंद्र रोहिणी अनंत पवार यांनी मंचाच्या भविष्यातील उपक्रमांची माहिती दिली तसेच ‘ग्रामीण कलेला कला मंच, कलावंतांना संधी आणि कलेतून रोजगार’ हे ध्येय समोर ठेवून गुहागर तालुक्यातील सांस्कृतिक आणि कलाक्षेत्राला नवी दिशा देण्याचा निर्धारही त्यांनी व्यक्त केला.

सरतेशेवटी सदर कार्यक्रमाच्या यशस्वितेसाठी आर्थिक देणगी, जाहिराती, कलात्मक सादरीकरण आणि प्रत्यक्ष उपस्थितीतून सहकार्य करणारे सर्व देणगीदार, जाहिरातदार, मान्यवर, कलाकार, संपर्कप्रमुख, कार्यकर्ते, महिला स्पर्धक आणि रसिक प्रेक्षक यांचे पारमी प्रोडक्शन मुंबई व गुहागर तालुका कला मंचाच्या वतीने रविंद्र रोहिणी अनंत पवार यांनी आभार मानून कार्यक्रमाची सांगता केली.