मानपाडा परिसरात उद्धव ठाकरे गटाचे विभाग प्रमुख प्रदीप पूर्णेकर यांच्या हत्येनंतर परिसरात तणावाचे वातावरण निर्माण झाले आहे. या घटनेच्या निषेधार्थ आज मानपाडा परिसरातील तीन शाळा तसेच अनेक दुकाने बंद ठेवण्यात आली आहेत. यावेळी प्रदीप पुर्णेकर यांचा मुलगा राम पुर्णेकर आणि भाऊ जयनाथ पुर्णेकर यांनी अनेक गंभीर आरोप केले आहेत. ठाण्याच्या माजी महापौर मिनाक्षी शिंदे आणि राजेंद्र शिंदे हेच या हत्याकांडामागे असल्याचा आरोप पुर्णेकरांच्या कुटुंबीयांनी केला आहे. या हत्येच्या काही दिवस आधी राजा शिंदे यांनी हल्लेखोरांसोबत सिक्रेट मिटींग घेतली होती, हे आपण आपल्या डोळ्यांनी पाहिलं होतं, असा दावाही प्रदीप पुर्णेकर यांचा मुलगा राम पुर्णेकर याने केला आहे.
राम पुर्णेकर नक्की काय म्हणाला ?
“दीड वर्षापूर्वी मीनाक्षी शिंदे आणि राजेंद्र शिंदे या दोघांचं नाव मला पप्पांनी आधीच सांगितलं होतं. हे लोकं मला मारायच्या प्रयत्नात आहेत, असं पप्पांनी सांगितलं होतं. या लोकांनी माझ्या पप्पांना कॉल करून धमकीही दिली होती. ही धमकी सर्वांनी ऐकलेली की बाळूला (प्रदीप पुर्णेकर) आम्ही जीवे मारून टाकणार आहे. आता चार दिवस आधी म्हणजेच विसर्जनच्या एक दिवस अगोदर राजेंद्र शिंदे आणि हे चार-पाच जे आरोपी आहेत. त्यांची नीलकंठ ग्रीन्सला एक मिटींग झाली. इथेच मीनाक्षी शिंदे राहते आणि राजेंद्र शिंदे राहतात. माझ्यासोबत अजून दोन जण होते ज्यांनी त्या दोघांना पाहिलं तिथे. फक्त राजेंद्र शिंदे होता, मीनाक्षी नव्हती. आणि माझ्या पप्पांना जोपर्यंत न्याय नाही भेटत तोपर्यंत आम्ही इथून हलणार नाही किंवा माझ्या डॅडची बॉडी आम्ही लोकं इथून नेणार नाही.
“ज्याला काका बोलायचो, त्यानेच पप्पांना संपवलं”
“या लोकांची प्लॅनिंग खूप आधीपासून चाललेली. कालही त्यांच्याकडून हत्या करण्याच्या प्रयत्नात होते पण तेव्हा त्यांना पॉसिबल नाही झालं. कारण की आमचे सर्व लोकं तिथे होते. आज कोणीच नव्हतं. आज पण सेम पप्प्या शिंदे जे आहेत… मी काका बोलायचो त्यांना… तो आता पकडला गेलाय. तो कालही आला होता संध्याकाळी त्याच टाईमाला आणि आजही आला आणि आजही ते बोलत होते. साडेनऊला तो का आरोपीला सोडून पुढे निघून आला आणि ऑफिसमध्ये येऊन बसला आणि त्यानंतर ९:३५ ला या सर्व गोष्टी झाल्यात.
गणपतीत रेकी करून आता हल्ला
यावेळी प्रदीप पूर्णेकर यांचे बंधू आणि माजी नगरसेवक जयनाथ पुर्णेकर यांनीही याबाबत खळबळजनक माहिती दिली आहे. हा सगळा प्रकार गणपतीपासून सुरू होता. हे सर्व आरोपी माझ्या ओळखीचे आहेत. यांना मोठं करायचं काम आम्हीच केलं. त्यांना तीन चार केसेसमधून मी स्वत: वाचवलं आहे. ते अनेकदा प्रदीपच्या ऑफिसमध्ये येऊन बसायचे. त्यांच्यावर विश्वास ठेवू नको, असं प्रदीपला मी सांगितलं होतं, असंही जयनाथ यांनी सांगितलं.
त्यामुळे परिसरातील दैनंदिन व्यवहारांवरही परिणाम झाला आहे. दरम्यान, या हत्या प्रकरणाचा तपास ठाणे पोलिसांकडून वेगाने सुरू असून, पोलिसांनी आतापर्यंत दोन संशयितांना ताब्यात घेतले आहे. त्यांची चौकशी करण्यात येत असून, हत्येमागील नेमके कारण आणि इतर संबंधित व्यक्तींची भूमिका तपासली जात आहे. या प्रकरणात आणखी तीन जणांचा शोध सुरू असल्याची माहिती पोलिसांनी दिली आहे. परिसरातील सीसीटीव्ही फुटेज तसेच इतर उपलब्ध पुराव्यांच्या आधारे पोलिसांकडून तपास केला जात आहे. घटनेनंतर कोणताही अनुचित प्रकार घडू नये, यासाठी मानपाडा परिसरात पोलिसांचा बंदोबस्त वाढवण्यात आला आहे.
