पुणे : कर्वेनगर मुळा नदीपात्रातील उड्डाणपुलाचे काम पूर्णत्वाकडे जात असताना या पुलाला जोडणाऱ्या महत्त्वाच्या 100 फुटी डीपी रस्त्यांचा प्रश्न मात्र अद्यापही प्रलंबित असल्याचे चित्र समोर येत आहे. कोथरूड आणि सिंहगड रस्ता यांना जोडणारा उड्डाणपूल उभारणीचा अंतिम टप्पा गाठला जात असला, तरी प्रत्यक्ष वाहतुकीसाठी आवश्यक असलेल्या जोडरस्त्यांचे नियोजन, जागा संपादन आणि अंमलबजावणी याबाबत पुणे महापालिकेच्या स्तरावर अद्याप ठोस प्रगती दिसत नसल्याने स्थानिक नागरिकांमध्ये नाराजी वाढत आहे. पुणे महापालिका प्रशासकीय स्तरावर नाचवल्या जाणाऱ्या ‘कागदी घोडे’प्रवृत्तीमुळे सदरील उड्डाणपूल पूर्ण होणार, पण त्याला जोडणारे रस्ते कधी मिळणार, असा यक्षप्रश्न मानवी साखळी केलेल्या सर्वसामान्य नागरिकांच्या समोर उपस्थित होत आहे.
पुणे महानगरपालिकेच्या सार्वत्रिक निवडणुकी अगोदर या प्रश्नासाठी सर्वपक्षीय लोकप्रतिनिधींनी जीवाचे रान करून प्रशासकीय स्तरावर काही बैठका आयोजित करण्याचे काम केले होते. या प्रश्नावर लोकप्रतिनिधींकडून सुरुवातीला करण्यात आलेला पाठपुरावा आता पूर्ण थंडावल्याची चर्चा आहे. दुसरीकडे पुणे महापालिकेच्या प्रशासकीय स्तरावर विविध प्रस्ताव, कागदपत्रे आणि प्रक्रियांच्या माध्यमातून हालचाली सुरू असल्याचे सांगितले जात असले, तरी प्रत्यक्ष जमिनीवर कामाला गती मिळालेली दिसत नाही. त्यामुळे नागरिकांच्या दृष्टीने हा संपूर्ण प्रकल्प म्हणजे ‘पूल तयार, पण कनेक्टिव्हिटी गायब’ अशी परिस्थिती निर्माण होण्याची भीती आहे. पुणे महापालिकेच्या पत विभागामार्फत मात्र दिशाभूल करण्याचे काम सुरू असून फक्त आश्वासनांवर आलेली परिस्थिती ढकलण्याची प्रवृत्ती बळावत आहे.
अधिकाऱ्यांची कागदपत्रांमध्येच धावपळ; प्रत्यक्ष रस्त्यांचे काय?
कर्वेनगर परिसरातील काकडे सिटी, जावळकर उद्यान परिसर तसेच आंबेडकर चौकातील कॅनॉल रस्त्याच्या जोडणीचे प्रश्न महत्त्वाचे ठरत आहेत. संबंधित परिसरात काही ठिकाणी रस्त्यांची उपलब्धता आणि पर्यायी मार्ग दिसत असले, तरी उड्डाणपुलाशी आवश्यक असलेली सलग आणि नियोजनबद्ध जोडणी हा मुख्य मुद्दा आहे. या जोडरस्त्यांसाठी जागेची उपलब्धता, जागामालकांशी चर्चा, विकास आराखड्यातील तरतुदी आणि प्रशासकीय मान्यता अशा अनेक बाबींचा समन्वय आवश्यक आहे. मात्र या प्रक्रियेला अपेक्षित वेग मिळत नसल्याने महापालिकेच्या कारभारावर प्रश्नचिन्ह उपस्थित होत आहे.
प्रशासकीय पातळीवर फाईलींची हालचाल, बैठका आणि कागदपत्रांची पूर्तता यापलीकडे प्रत्यक्ष काम किती पुढे गेले, याची स्पष्ट माहिती नागरिकांना तसेच लोकप्रतिनिधींनाही मिळत नसल्याची तक्रार आहे.
पाठपुरावा करणारे लोकप्रतिनिधीही शांत?
कर्वेनगर परिसरातील या प्रकल्पासाठी सर्वत्रिक निवडणुकीच्या काळामध्ये लोकप्रतिनिधींनी पाठपुरावा केल्याचे सांगितले जाते. मात्र जोडरस्त्यांचा प्रश्न अद्याप सुटलेला नसताना या विषयावर आता पूर्वीसारखा आक्रमक पाठपुरावा सध्या लोक नियुक्त असलेल्या लोकप्रतिनिधींकडून दिसत नसल्याची चर्चा नागरिकांमध्ये सुरू आहे.
कर्वेनगर मधील नदीपात्रावरील उड्डाणपुलाचे काम पूर्ण होणे ही निश्चितच सकारात्मक बाब आहे. परंतु त्याचा अपेक्षित फायदा नागरिकांना मिळण्यासाठी जोडरस्तेही त्याच वेळी कार्यान्वित होणे गरजेचे आहे. अन्यथा कोट्यवधींचा खर्च करून उभारलेल्या पायाभूत सुविधेचा पूर्ण क्षमतेने वापर होण्यास अडथळे निर्माण होऊ शकतात.
नामदारांच्या ‘मिसिंग लिंक’ प्रकल्पालाही संथ गती?
कोथरूड परिसरातील वाहतूक कोंडी कमी करण्याच्या दृष्टीने नामदार उच्च शिक्षण मंत्री चंद्रकांतदादा पाटील यांनी पुढाकार घेतलेल्या ‘मिसिंग लिंक’ मोहिमे अंतर्गत या रस्त्यांचा अंतर्भाव करण्यात आला होता. थेट मंत्री महोदय यांनी लक्ष घातल्यामुळे हा प्रश्न मार्गी लागण्याबाबत नागरिकांना मोठ्या अपेक्षा आहेत. मात्र या प्रकल्पाच्या अंमलबजावणीला अपेक्षित गती मिळत नसल्याचे चित्र असल्याने हा महत्त्वाचा वाहतूक दुवा प्रत्यक्षात कधी जोडला जाणार, असा प्रश्न उपस्थित होत आहे.
प्रकल्पाची घोषणा, बैठका आणि प्रशासकीय प्रक्रिया यांनंतर प्रत्यक्ष कामाला गती मिळणे अपेक्षित असते. मात्र मिसिंग लिंकचा प्रश्न अद्याप मार्गी लागत नसल्याने संपूर्ण वाहतूक नियोजनावरच प्रश्नचिन्ह निर्माण होत आहे.
जागामालकांशी चहापानाच्या चर्चा; निर्णय मात्र कागदावरच?
कर्वेनगर परिसरातील जोडरस्त्यांसाठी आवश्यक असलेल्या जागांच्या प्रश्नावर संबंधित जागामालकांशी चर्चा आणि समन्वय महत्त्वाचा आहे. मात्र या चर्चांचे ठोस निर्णयांमध्ये रूपांतर होत आहे का, हा खरा प्रश्न आहे. जागामालकांशी चर्चा, बैठका आणि समन्वयाच्या प्रक्रियेत अधिकारी गुंतलेले असताना प्रत्यक्ष जागा उपलब्ध करून घेण्याची कार्यवाही कितपत पुढे सरकली आहे, याबाबत स्पष्टता आवश्यक आहे. नागरिकांमध्ये तर या प्रक्रियेत अधिकारी आणि जागामालकांच्या चर्चांनाच अधिक वेळ जात असल्याची टीका होत आहे. अर्थात, या प्रक्रियेची वस्तुस्थिती स्पष्ट करण्यासाठी महापालिकेने अधिकृत प्रगती अहवाल जाहीर करणे गरजेचे आहे.
नागरिकांचा सवाल : उड्डाणपूल पूर्ण, पण जोडरस्त्यांची प्रतीक्षा किती दिवस?
कर्वेनगरमधील उड्डाणपुलामुळे वाहतुकीला दिलासा मिळण्याची अपेक्षा आहे. मात्र जोडरस्त्यांचा प्रश्न सुटला नाही, तर या सुविधेचा अपेक्षित लाभ मिळणार कसा? महापालिकेने प्रत्येक जोडरस्त्याबाबत जागेची स्थिती, भूसंपादनाची प्रक्रिया, मंजुरी, निधी आणि काम सुरू होण्याची संभाव्य तारीख सार्वजनिक करावी, अशी मागणी नागरिकांकडून होणे स्वाभाविक आहे.
केवळ उड्डाणपूल उभारून वाहतूक समस्येचे निराकरण होणार नाही. त्याला जोडणारे रस्ते, पर्यायी मार्ग आणि संपूर्ण वाहतूक व्यवस्थेचे नियोजनही तितकेच महत्त्वाचे आहे.
पूल पूर्णत्वास जात असताना जोडरस्त्यांचे घोडे अद्याप कागदावरच धावत असतील, तर या विकासकामाचा उपयोग नेमका कोणासाठी? लोकप्रतिनिधींचा पाठपुरावा, महापालिकेची प्रशासकीय यंत्रणा आणि नामदारांचा मिसिंग लिंक प्रकल्प या तिन्हींचा कनेक्ट पुन्हा कधी जुळणार, हा कर्वेनगरकरांचा महत्त्वाचा प्रश्न आहे.




