पुणे : चांदणी चौकातून वारजेच्या दिशेने जाणाऱ्या पुलावरूनच कोथरूडच्या दिशेने जाण्यासाठी थेट मार्ग उपलब्ध करून द्यावा, तसेच चांदणी चौकातील पादचारी मार्गाचे संथ गतीने सुरू असलेले काम तातडीने पूर्ण करावे, अशी मागणी नगरसेवक दिलीप वेडेपाटील यांनी संबंधित प्रशासनाकडे केली आहे.
या दोन्ही महत्त्वाच्या विषयांच्या अनुषंगाने चांदणी चौक परिसराची महामेट्रो आणि पुणे महानगरपालिकेच्या संबंधित अधिकाऱ्यांसमवेत प्रत्यक्ष पाहणी करण्यात आली. यावेळी प्रस्तावित मार्गाची आवश्यकता, वाहतुकीची सद्यस्थिती, उपलब्ध जागा तसेच पादचारी मार्गाच्या कामाची प्रगती याबाबत सविस्तर चर्चा करण्यात आली.
चांदणी चौक हा पुणे शहराच्या पश्चिम भागातील अत्यंत महत्त्वाचा वाहतूक केंद्रबिंदू आहे. या परिसरातून दररोज हजारो वाहनांची ये-जा होत असते. मात्र, चांदणी चौकातून वारजेच्या दिशेने जाणाऱ्या पुलावरून कोथरूडच्या दिशेने जाण्यासाठी थेट मार्ग उपलब्ध नसल्यामुळे वाहनचालकांना अतिरिक्त वळसा घालावा लागतो. त्यामुळे प्रवासाचा वेळ वाढतो, इंधनाचा अपव्यय होतो आणि पर्यायी रस्त्यांवरील वाहतुकीचा ताणही वाढतो.
विशेषतः बावधन खुर्द, बावधन बुद्रुक, भुसारी कॉलनी आणि कोथरूड परिसरातील नागरिकांना याचा मोठ्या प्रमाणावर सामना करावा लागतो. त्यामुळे वारजेच्या दिशेने जाणाऱ्या पुलावरूनच कोथरूडच्या दिशेने जाण्यासाठी आवश्यक तांत्रिक बदल व योग्य वाहतूक नियोजन करून थेट मार्ग उपलब्ध करून द्यावा, अशी मागणी यावेळी करण्यात आली.
तसेच चांदणी चौकातील पादचारी मार्गाचे काम अत्यंत संथ गतीने सुरू असल्याबद्दल नगरसेवक दिलीप वेडेपाटील यांनी नाराजी व्यक्त केली. पादचारी मार्गाचे काम वेळेत पूर्ण न झाल्यामुळे नागरिकांना गैरसोयीचा सामना करावा लागत आहे. विशेषतः ज्येष्ठ नागरिक, महिला, विद्यार्थी आणि लहान मुलांच्या सुरक्षिततेच्या दृष्टीने हे काम अत्यंत महत्त्वाचे आहे. त्यामुळे संबंधित यंत्रणेने कामाचा वेग वाढवून हे काम प्राधान्याने व निश्चित कालमर्यादेत पूर्ण करावे, अशी आग्रही मागणी करण्यात आली.
या पाहणीप्रसंगी महामेट्रोचे चीफ प्रोजेक्ट मॅनेजर श्री. अमोल कुमार मोहोळकर, कार्यकारी अभियंता पथ विभाग श्री. अभिजीत आंबेकर, पुणे महानगरपालिकेचे कार्यकारी उपअभियंता (प्रकल्प) श्री. विलास नवाळी, मुख्य अभियंता पथ विभाग श्री. गुलाबचंद भुतडा, कनिष्ठ अभियंता बांधकाम विभाग श्री. अजय फाले तसेच इतर संबंधित अधिकारी उपस्थित होते.
यावेळी नगरसेवक दिलीप वेडेपाटील यांनी सांगितले की, चांदणी चौकातील वाहतूक व्यवस्था अधिक सक्षम करणे आणि पादचाऱ्यांना सुरक्षित सुविधा उपलब्ध करून देणे ही काळाची गरज आहे. उपलब्ध पायाभूत सुविधांचा योग्य वापर करून नागरिकांचा प्रवास सुलभ करणे आवश्यक आहे. यासाठी संबंधित विभागांनी समन्वयाने काम करून दोन्ही मागण्यांवर सकारात्मक निर्णय घ्यावा आणि प्रत्यक्ष कार्यवाहीला गती द्यावी.
नागरिकांचा वेळ वाचला पाहिजे, वाहतूक कोंडी कमी झाली पाहिजे आणि पादचाऱ्यांचा प्रवास सुरक्षित झाला पाहिजे, यासाठी सातत्याने पाठपुरावा करणार असल्याचे नगरसेवक दिलीप वेडेपाटील यांनी यावेळी बोलताना सांगितले.




