नवी मुंबई दि. ७ (रामदास धो. गमरे) बौद्ध धम्माच्या सर्वांगीण अभ्यासासोबत धम्मपरंपरा, शिस्त आणि संस्कार यांचा विकास व्हावा या उद्देशाने बौद्धजन पंचायत समिती संलग्न संस्कार समिती यांच्या संयुक्त विद्यमाने शनिवार १० ऑक्टोबर २०२६ ते २० ऑक्टोबर २०२६ या कालावधीत संघनायक डॉ. करुणाज्योती महाथेरो यांच्या मार्गदर्शनाखाली आणि संस्कार समितीचे अध्यक्ष मंगेश पवार यांच्या अध्यक्षतेखाली वर्षावास पर्वातील तीन महिन्यांच्या कालखंडात धम्म-अभ्यासाला चालना देण्यासाठी दहा दिवसीय श्रामणेर प्रशिक्षण शिबिर २०२६ चे डॉ. बाबासाहेब आंबेडकर भवन, सेक्टर–११, तुर्भेगाव, वाशी, नवी मुंबई येथे आयोजन करण्यात आले आहे.
बौद्ध धम्माच्या सर्वांगीण अभ्यासासाठी श्रामणेर प्रशिक्षणाला विशेष महत्त्व असून आजवर २२ जणांनी नावनोंदणी केली असून बौद्धजन पंचायत समितीच्या सर्वच प्रमुख कार्यकारिणी, शाखा पदाधिकारी, बौद्धाचार्य, उपासक-उपासिका यांनी या प्रशिक्षणात सहभागी घेऊन सदर शिबिर यशस्वी करावे असे आवाहन बौद्धजन पंचायत समितीच्या वतीने काढण्यात आलेल्या परिपत्रकात संस्कार समितीचे अध्यक्ष मंगेश पवार आणि चिटणीस मनोहर बा. मोरे यांनी केले आहे.
