जर बंडखोरी करणारे आमदार विधिमंडळातून अपात्र ठरले तर त्याचा परिणाम अत्यंत गंभीर व व्यापक होतो, असा इशारा सर्वेच्च न्यायालयाने शिंदे गटाला पक्षचिन्हाबाबत युक्तिवाद संपवताना दिला. तसेच पुढील आठवड्यात, 13 ऑक्टोबर रोजी आमदारांच्या अपात्रतेबाबत सुनावणी घेणार असल्याचे निश्चित केले. शिवसेना पक्षप्रमुख उद्धव ठाकरे यांनी पक्षचिन्हासंदर्भातील केंद्रीय निवडणूक आयोगाच्या निर्णयाला सर्वोच्च न्यायालयात आव्हान दिले आहे. त्यावर सरन्यायाधीश सूर्य कांत, न्यायमूर्ती जॉयमल्या बागची आणि न्यायमूर्ती व्ही. मोहना यांच्या खंडपीठापुढे अंतिम सुनावणी- सुरु आहे. गुरुवारी शिंदे गटातर्फे अ‍ॅड. नीरज कौल यांनी आपला युक्तिवाद संपवला. निवडणूक आयोगाने विधिमंडळातील बहुमत विचारात घेत निर्णय दिला, असा दावा अ‍ॅड. कौल यांनी केला. त्या अनुषंगाने युक्तिवाद संपत असतानाच न्यायमूर्ती जॉयमल्या बागची यांनी शिंदे गटाला थेट परिणामांचा गंभीर इशारा दिला. दरम्यान, न्यायालय 13 ऑक्टोबर रोजी आमदारांच्या अपात्रतेबाबत युक्तिवाद ऐकून घेणार आहे.
कपिल सिब्बल आणखी दोन सत्रांत युक्तिवाद करणार
शिवसेना पक्षप्रमुख उद्धव ठाकरे यांच्यातर्फे ज्येष्ठ विधिज्ञ कपिल सिब्बल यांनी पुढील युक्तिवादासाठी आणखी दोन सत्रांचा वेळ न्यायालयाकडे मागितला. कायद्यातील काही गैरसमज दूर करण्याच्या दृष्टीने बाजू मांडण्यासाठी वेळ हवा आहे, अशी विनंती सिब्बल यांनी केली. त्यावर न्यायालयाने बाजू ऐकण्यास सहमती दर्शवली, तर गद्दार आमदारांच्या अपात्रतेच्या मुद्दय़ावर शिंदे गटातर्फे धुव्र मेहता युक्तिवाद करणार आहेत.विधानसभा अध्यक्ष राहुल नार्वेकर यांनी गद्दार आमदारांना अपात्र ठरवण्याची मागणी फेटाळून त्यांना पात्र ठरवण्याचा निर्णय दिला होता. त्या निर्णयाविरोधात शिवसेनेचे मुख्य प्रतोद, आमदार सुनील प्रभू यांनी दाखल केलेल्या स्वतंत्र याचिकेवर पुढील आठवडय़ात सुनावणी होणार आहे. गद्दारांच्या अपात्रतेच्या दृष्टीने ती सुनावणी महत्त्वपूर्ण ठरणार आहे.
