पुणे पदवीधर आणि शिक्षक मतदार संघाच्या निवडणुकीचे बिगुल वाजले आज अपेक्षेप्रमाणे ही निवडणूक पुन्हा एकदा कोल्हापूर केंद्रित झाली असून सर्वच पक्षांनी आता कोल्हापूरला पसंती दिली आणि कोल्हापूर हे या निवडणुकीचे हेडक्वार्टर झाले असल्याची चर्चा सुरू झाली आहे. पुणे पदवीधर महायुतीचे उमेदवार म्हणून सुरुवातीला शरद लाड व भैय्या माने यांच्यामध्ये चुरशीची लढत असतानाच शिक्षण संस्थांचे पाठबळ असलेले व वृत्तपत्र व्यवसायामध्ये सुद्धा उल्लेखनीय काम केलेल्या डॉक्टर स्मिता जाधव यांना भारतीय जनता पक्षाने संधी दिली आहे. पूर्वीपासून तयार केलेले तयारी केलेले दोन उमेदवार बाजूला सारून महायुतीने नवख्या उमेदवाराला दिलेली संधी यश मिळवून देईल की नाही हीच खरी चर्चा आहे.
पुणे विभाग विधानपरिषद शिक्षक मतदारसंघातून काँग्रेस पक्षाच्या वतीने विद्यमान आमदार कोल्हापूरवाशी आजगावकर यांना संधी दिली आहे तर भाजपकडून स्वामी विवेकानंद शिक्षणसंस्थेचे मुख्य कार्यकारी अधिकारी कौस्तुभ मुरलीधर गावडे यांना उमेदवारी जाहीर झाली आहे. शिक्षकांच्या प्रश्नांची जाण असणारे आणि शिक्षण क्षेत्राशी थेट नाळ जोडलेले व्यक्तिमत्त्व म्हणून त्यांची ओळख आहे. विद्यमान आमदार यांनीही शिक्षकांच्या प्रश्नासाठी गेली पाच वर्षे काम केल्यामुळे या मतदार संघात त्यांच्याविषयी असलेली सहानभूती या जीवावर पुन्हा ते विजय होतील असे काँग्रेस पक्षाला वाटत आहे.
महायुतीच्या वतीने सत्तेत असतानाही मागील निवडणुकीमध्ये या दोन्ही जागी पराभव स्वीकारावा लागला होता. राज्य शासनामध्ये कॅबिनेट मंत्री असलेल्या चंद्रकांत दादा पाटील यांचा मतदारसंघ म्हणून ओळख असलेल्या पुणे पदवीधर मतदारसंघांमध्ये झालेला दारुण पराभव जिव्हारी लागल्यामुळे भारतीय जनता पक्षाच्या वतीने नवा आणि युवा चेहरा देऊन पदवीधर मतदारांना आकर्षित करण्याचे काम केले आहे. पुणे विभाग पदवीधर मतदारसंघ 2026 ची अंतिम मतदार यादी 13 जानेवारी 2026 रोजी प्रसिद्ध झाली आहे. यामध्ये एकूण 3 लाख 10 हजार 964 पदवीधर मतदार आहेत.
जिल्हा निहाय मतदार संख्या:
– पुणे – 61,113 मतदार
– सोलापूर – 38,022 मतदार
– सातारा – 42,063 मतदार
– सांगली – 78,366 मतदार
– कोल्हापूर – 91,400 मतदार (विक्रमी)
2020 च्या निवडणुकीत ही संख्या 4 लाख 20 हजार 86 होती, म्हणजे यावेळी नोंदणी कमी झाली आहे.
पुणे विभाग शिक्षक मतदारसंघ 2026 ची अंतिम यादी 13 जानेवारी 2026 ला प्रसिद्ध झाली आहे. एकूण 51,979 शिक्षक मतदार आहेत.
जिल्हा निहाय मतदार संख्या:
पुणे – 12,187 मतदार
सोलापूर – 13,158 मतदार (सर्वात जास्त)
सातारा – 9,097 मतदार
सांगली- 7,322 मतदार
कोल्हापूर- 10,215 मतदार
2020 मध्ये 72,190 शिक्षक मतदार होते, यंदा नोंदणी कमी आहे.
कोण आहेत कौस्तुभ गावडे?
कौस्तुभ गावडे हे उच्चविद्याविभूषित असून त्यांनी ‘एम.कॉम’ (M.Com) आणि ‘एमबीए’ (MBA) शिक्षण पूर्ण केले आहे. सध्या ते कोल्हापूर येथील ‘श्री स्वामी विवेकानंद शिक्षण संस्था’ येथे मुख्य कार्यकारी अधिकारी (CEO) म्हणून जबाबदारी सांभाळत आहेत. शिक्षणमहर्षी डॉ. बापूजी साळुंखे यांचे ते नातू असून, आजोबांच्या शैक्षणिक विचारांचा आणि कार्याचा वारसा त्यांना मिळाला आहे. तसेच प्राचार्य अभयकुमार साळुंखे यांच्या मार्गदर्शनातून आणि शैक्षणिक संस्कारातून त्यांची विचारसरणी आकाराला आली आहे.
श्री स्वामी विवेकानंद शिक्षण संस्थेत मुख्य कार्यकारी अधिकारी म्हणून काम करताना कौस्तुभ गावडे यांनी शिक्षक, प्राध्यापक, संस्थाचालक आणि शैक्षणिक प्रशासन यांच्याशी जवळून संवाद साधला आहे. या कार्यकाळात त्यांनी शिक्षकांच्या दैनंदिन अडचणी, शिक्षण संस्थांसमोरील प्रशासकीय व शैक्षणिक आव्हाने यांचा प्रत्यक्ष अनुभव घेतला आहे. त्यांच्या मते, शिक्षकांचे प्रश्न हे केवळ निवडणुकीचे मुद्दे नसून त्यांच्या प्रत्यक्ष अनुभवाचा विषय आहेत. पुणे विभागातील शिक्षक संघटना आणि प्रतिनिधींशी सातत्यपूर्ण संवाद साधून शिक्षकांच्या हितासाठी एकत्र येण्याची भूमिका त्यांनी मांडली आहे.
दोन कोल्हापुरकरांमध्ये पुण्याची लढाई
दरम्यान, पुणे शिक्षक मतदारसंघाची लढाई आता कोल्हापूरमध्येच होणार आहे. काँग्रेसकडून विद्यमान आमदार जयंत आसगावकर यांनाच पुन्हा संधी देण्यात आली आहे. त्यामुळे गेल्या दोन महिन्यांपासून सुरू असलेल्या सीजीपीच्या आंदोलनाच्या पार्श्वभूमीवर पहिल्यांदाच महायुती विरुद्ध काँग्रेस असा थेट मुकाबला पुणे शिक्षक मतदारसंघ निवडणुकीच्या निमित्ताने होणार आहे.
