पुणे: शहराच्या वर्षभराच्या पाणीपुरवठ्याचा आधार असलेल्या खडकवासला प्रकल्पातील पाणीसाठा गतवर्षीच्या तुलनेत २.३५ अब्ज घनफुटाने (टीएमसी) घटला आहे. गतवर्षी याच कालावधीत चारही धरणे १०० टक्के भरलेली असताना २९.१५ टीएमसी पाणीसाठा होता त्यामुळे पुण्याची पाणीकपात ‘उंबरठ्यावर’ असून काही दिवसांत जाहीर होण्याची शक्यता आहे. 10% पाणीकपातीस जलसंपदा विभाग आग्रही असून प्रकल्पीय साठ्यात २.३५ टीएमसी घट सध्या तो २६.८० टीएमसीवर म्हणजेच ९१.९४ टक्क्यांवर आला आहे. त्यामुळे महापालिका प्रशासनाला पाणी नियोजनाचे आव्हान पेलावे लागणार आहे.
पानशेत, वरसगाव आणि टेमघर या तीनही धरणांत पाणीसाठा नव्वद टक्क्यांहून अधिक असला, तरी खडकवासला धरणातील साठा कमी करून तो ४३.८९ टक्क्यांवर आणण्यात आला आहे. पुणे जिल्ह्यात जुलै महिन्यात विक्रमी पाऊस झाला. त्यापूर्वी मॉन्सून दाखल झाल्यानंतर बहुतांश जून महिना कोरडाच गेला होता. जुलैमध्ये झालेल्या जोरदार पावसामुळे जिल्ह्यातील धरणे पूर्ण क्षमतेने भरली होती. त्यात पुणे शहराला पिण्यासाठी पाणीपुरवठा करणाऱ्या खडकवासला धरणसाखळीतील चारही धरणे शंभर टक्के भरली होती.
येणारी आवक थांबली
खडकवासलाच्या सांडव्यातून यंदाच्या पावसाळ्यात आतापर्यंत १९.०५ टीएमसी पाणी सोडण्यात आले. खडकवासला आणि टेमघर धरणांतून सध्या विसर्ग नाही. पुणे महापालिकेसाठी खडकवासला धरणातून ६२८ क्युसेक, तर पानशेत आणि वरसगावमधून प्रत्येकी ६०० क्युसेक पाणी वीजगृहातून सोडले जात आहे. चारही धरणांत बुधवारी सकाळी सहापर्यंत नव्याने पाण्याची आवक शून्य होती.
सरकारने दहा टक्के पाणीकपात जाहीर केली आहे. त्यानुसार येत्या दोन दिवसांत जलसंपदा विभागाकडून पुणे, पिंपरी-चिंचवड महापालिका, एमआयडीसीसह इतर संस्थांना पत्र दिले जाणार आहे. दहा टक्के कपातीनंतर उपलब्ध शिल्लक पाण्याचे सुधारित नियोजन केले जाणार आहे.
– किरण देशमुख, कार्यकारी अभियंता, जलसंपदा विभाग
