पुणे शिक्षक आणि पदवीधर मतदारसंघाच्या निवडणुकीत महायुतीतील अंतर्गत संघर्ष आता थेट निवडणुकीच्या मैदानात उतरला आहे. भाजपने शिक्षक मतदारसंघातून कौस्तुभ गावडे यांना उमेदवारी दिल्यानंतर महायुतीतील घटक पक्ष असलेल्या शिवसेनेनेही आपला उमेदवार रिंगणात उतरवला आहे. शिवसेनेच्या वतीने मंगेश चिवटे यांनीही आपला उमेदवारी अर्ज दाखल केला. त्याचवेळी राष्ट्रवादी काँग्रेसचे नेते हसन मुश्रीफ यांचे निकटवर्तीय मानले जाणारे भैय्या माने यांनी पदवीधर मतदारसंघातून अपक्ष म्हणून उमेदवारी अर्ज दाखल केला आहे.
मित्रपक्षाकडूनच भाजपला आव्हान!
विधान परिषदेच्या पुणे शिक्षक मतदारसंघाची जागा महायुतीत भाजपच्या वाट्याला गेली असताना शिवसेनेने स्वतंत्र उमेदवार दिल्याने भाजपसमोर नवा पेच निर्माण झाला आहे. एकीकडे महायुतीची एकजूट असल्याचा दावा केला जात असतानाच दुसरीकडे मित्रपक्षच भाजपच्या उमेदवाराविरोधात निवडणूक लढवत असल्याने महायुतीतील अंतर्गत मतभेद चव्हाट्यावर आले आहेत.
शिवसेनेचे मंगेश चिवटे यांच्या उमेदवारीला उदय सामंत आणि प्रकाश आबिटकर यांची उपस्थिती मिळाल्याने या घडामोडीला विशेष राजकीय महत्त्व प्राप्त झाले आहे. त्यामुळे आगामी काळात महायुतीतील नेते या दोन्ही उमेदवारांपैकी नेमका कोणाला पाठिंबा देणार, याकडे राजकीय वर्तुळाचे लक्ष लागले आहे.
पदवीधरमध्येही राष्ट्रवादीचा ‘बंडखोर’ सूर?
शिक्षक मतदारसंघातील या राजकीय धक्क्यानंतर पदवीधर मतदारसंघातही महायुतीची डोकेदुखी वाढली आहे. राष्ट्रवादी काँग्रेसचे नेते हसन मुश्रीफ यांचे निकटवर्तीय मानले जाणारे भैय्या माने यांनी पदवीधर मतदारसंघातून अपक्ष म्हणून उमेदवारी अर्ज दाखल केला आहे. भैय्या माने यांच्या उमेदवारीसाठी हसन मुश्रीफ आग्रही होते. माने यांनी यापूर्वी मुश्रीफ यांच्यासोबत आपला संबंध संपला असल्याची घोषणा केली असली तरीही माने यांच्या बंडखोरीला मुश्रीफांचाच आशीर्वाद असल्याची चर्चा आहे.
चव्हाण-मोहोळ-पाटील मंचावर; पण मित्रपक्ष मैदानात स्वतंत्र!
भाजपच्या पदवीधर आणि शिक्षक दोन्ही उमेदवारांचे अर्ज दाखल करताना प्रदेशाध्यक्ष रवींद्र चव्हाण, केंद्रीय राज्यमंत्री मुरलीधर मोहोळ आणि मंत्री चंद्रकांत पाटील यांच्यासह भाजपचे प्रमुख नेते उपस्थित होते. मात्र, त्यावेळी शिवसेना आणि राष्ट्रवादीच्या नेत्यांची अनुपस्थिती चर्चेचा विषय ठरली. आता त्याच पार्श्वभूमीवर शिवसेनेने शिक्षक मतदारसंघात आणि राष्ट्रवादीच्या नेत्याच्या निकटवर्तीयाने पदवीधर मतदारसंघात स्वतंत्र उमेदवारी केल्याने महायुतीतील नाराजी केवळ व्यासपीठापुरती मर्यादित नसल्याचे स्पष्ट झाले आहे.
‘महायुती’ एकत्र की प्रत्येक पक्षाचा स्वतंत्र खेळ?
पुणे शिक्षक आणि पदवीधर मतदारसंघाची निवडणूक महायुतीसाठी प्रतिष्ठेची ठरणार आहे. मात्र, दोन्ही मतदारसंघांत मित्रपक्षांकडूनच उमेदवार रिंगणात उतरल्याने मतविभाजनाचा मोठा फटका भाजपला बसण्याची शक्यता निर्माण झाली आहे. महायुतीतील घटक पक्षांनीच स्वतंत्र उमेदवार मैदानात उतरवल्याने निवडणुकीपूर्वीच महायुतीतील ऐक्याला तडा गेल्याची चर्चा सुरू झाली असून, पुण्यात महायुतीतच संघर्ष पेटणार असल्याचे चित्र स्पष्ट झाले आहे.
महायुतीत मित्रपक्षच आमनेसामने; मविआकडूनही उमेदवारी
महायुतीतील घटक पक्षांमध्येच उमेदवारीवरून संघर्ष सुरू असताना महाविकास आघाडीनेही दोन्ही मतदारसंघांसाठी आपले उमेदवार मैदानात उतरवले आहेत. पदवीधर मतदारसंघातून राष्ट्रवादी काँग्रेस (शरदचंद्र पवार) पक्षाच्या हर्षदा देशमुख-जाधव, तर शिक्षक मतदारसंघातून काँग्रेसचे विद्यमान आमदार जयंत आसगावकर हे मविआचे उमेदवार असणार आहेत.
त्यामुळे शिक्षक मतदारसंघात भाजपचे कौस्तुभ गावडे, शिवसेनेचे मंगेश चिवटे आणि काँग्रेसचे जयंत आसगावकर अशी प्रमुख लढत उभी राहिली आहे. तर पदवीधरमध्ये भाजपच्या डॉ. स्मिता जाधव, राष्ट्रवादी शरदचंद्र पवार पक्षाच्या हर्षदा देशमुख-जाधव यांच्यासह इतर उमेदवारांमुळे निवडणुकीचे चित्र बहुकोनी झाले आहे
