राज्यातील 265 तालुक्यांमधील दुष्काळी परिस्थितीमुळे चिंता वाढली असतानाच पुढीलवर्षीच्या पावसावर एल निनोचा परिणाम होण्याची शक्यता आहे. यंदा एल निनोमुळे राज्याच्या बहुतांश भागात फारसा पाऊस पडला नाही.त्यामुळे आतापासूनच पाण्याचे दुर्भिक्ष जाणवू लागले आहे. अशातच एल निनोचा प्रभाव आगामी काळात आणखी वाढण्याचा अंदाज वर्तविण्यात आला आहे. तसे झाल्यास पुढीलवर्षीच्या पावसावर त्याचा विपरीत परिणाम होऊ शकतो. या परिस्थितीचे गांभीर्य ओळखून राज्य सरकारने जुलै 2027 पर्यंत पिण्याच्या पाण्याचे नियोजन करण्यासाठी महत्त्वाची पावले उचलली आहेत. प्रत्येक जिल्ह्याला उपलब्ध पाणीसाठा आणि जुलै 2027 पर्यंतची पाण्याची गरज याचा अंदाज घेऊन आराखडा तयार करण्याच्या सूचना देण्यात आल्या आहेत.
राज्यातील काही मोठ्या धरणांमध्ये पुरेसा पाणीसाठा उपलब्ध आहे. अशा धरणांमधील पाणी जुलै 2027 पर्यंत पिण्यासाठी आरक्षित ठेवून उर्वरित पाण्याचा वापर उद्योग आणि रब्बी पिकांसाठी करण्याबाबत निर्णय घेतला जाऊ शकतो, अशी माहिती मुख्यमंत्री देवेंद्र फडणवीस यांनी दिली. ते रविवारी नागपूरमध्ये आयोजित करण्यात आलेल्या पत्रकार परिषदेत बोलत होते.
देवेंद्र फडणवीस यांनी एल निनोबाबत भाष्य करताना म्हटले की, मुळात आता जो एल निनो आहे हा अजून शिगेला पोहोचणार आहे. तज्ज्ञांच्या मतानुसार फेब्रुवारीत तो पीकला जाईल. फेब्रुवारीनंतर तो खाली येईल, अशी साधारण परिस्थिती आहे. पॅसिफिक महासागरातील उष्णतेमुळे एल निनो तयार होतो. हा कुल डाऊन होईल. वातावरणात बदल होतील, त्यानंतर अल निनो इफेक्ट कमी होईल. पण आपल्याला सगळ्या प्रकारच्या तयारीत राहावे लागेल. अल निनोचा इफेक्ट वाढला तर आपल्याला ज्या अडचणी येतील त्यासाठी राहावे लागेल, असे देवेंद्र फडणवीस यांनी सांगितले.
यावेळी देवेंद्र फडणवीस यांनी दुष्काळाच्या पार्श्वभूमीवर सामाजिक संवेदनशीलता दाखवण्याची गरजही व्यक्त केली. खर्च कमी करुन आवश्यक बाबींवरच खर्च करण्याचे आवाहन त्यांनी केले. प्रत्येकाने बचत करुन दुष्काळासाठी मदत करता येईल का, हे पाहिले पाहिजे, असे देवेंद्र फडणवीस यांनी म्हटले.राज्य सरकारने शनिवारी महाराष्ट्रातील 265 तालुक्यांमध्ये ट्रिगर 1 दुष्काळाची घोषणा केली होती. याचा अर्थ 75 टक्के महाराष्ट्रात दुष्काळ जाहीर करण्यात आला आहे. दुष्काळ जाहीर झाल्याने आता दुष्काळाच्या विविध उपाययोजना जाहीर होऊन त्यांची अंमलबजावणी केली जाणार आहे.
