केंद्रीय मुख्य निवडणूक आयुक्त ज्ञानेश कुमार यांच्या राजीनाम्याची मागणी करत कॉकरोच जनता पार्टीने (सीजेपी) २ ऑक्टोबर रोजी गांधी जयंतीच्या दिवशी मुंबईतून देशव्यापी आंदोलन सुरू करण्याची घोषणा केली होती. दादर येथील शिवाजी पार्कमध्ये हे आंदोलन करण्यासाठी पक्षाने मुंबई पोलिसांकडे परवानगी मागितली. मात्र, शिवाजी पार्क पोलिसांनी आंदोलनाला परवानगी नाकारली आहे. परवानगी नाकारल्यानंतर सीजेपीचे संस्थापक अभिजीत दिपके यांनी जेल भरो आंदोलनाचा इशारा दिला आहे.
सीजेपीचे राष्ट्रीय संघटन प्रमुख अजिंक्य शिंदे यांनी शिवाजी पार्क पोलिसांना पत्र देऊन शांततापूर्ण आंदोलन करण्याची परवानगी मागितली. मात्र, २७ सप्टेंबर रोजी शिवाजी पार्क पोलिस ठाण्याचे वरिष्ठ पोलिस निरीक्षक प्रमोद पवार यांनी परवानगी नाकारण्याचे पत्र दिले. शिवाजी पार्क मैदानाचा खेळाव्यतिरिक्त अन्य कारणांसाठी वापर करण्यावर उच्च न्यायालयाने ४ जानेवारी २०१३ रोजी दिलेल्या आदेशानुसार निर्बंध असल्याचे पोलिसांनी नमूद केले आहे.
काय दिले कारण?
तसेच महाराष्ट्र शासनाच्या २० जानेवारी २०१६ रोजीच्या शासन निर्णयानुसार मैदान वापरण्यासाठी आवश्यक असलेले मुंबई महापालिकेचे परवानगीपत्र अर्जासोबत जोडण्यात आले नसल्याचेही पत्रात स्पष्ट करण्यात आले आहे. शिवाजी पार्क परिसर हा शांतता क्षेत्र आणि रहिवासी भाग असल्याने आंदोलनामुळे ध्वनीप्रदूषणाची शक्यता आहे. त्याचबरोबर मोठ्या संख्येने आंदोलक जमा झाल्यास परिसरात वाहतूक कोंडी होण्याची शक्यता असून, जवळच असलेल्या रुग्णालयांमध्ये रुग्णांच्या ये-जा करण्यावर त्याचा परिणाम होऊ शकतो, असेही पोलिसांनी कारण दिले आहे. मुंबई पोलिसांनी परवानगी नाकारल्याचे पत्रही एक्स हॅन्डलवरून शेअर केले आहे.
