मुंबई दि. १९ (रामदास धो. गमरे) बौद्धजन पंचायत समितीचे माजी कार्याध्यक्ष, भारतीय बौद्ध महासभेचे द्वितीय अध्यक्ष, चैत्यभूमीचे शिल्पकार, डॉ बाबासाहेब आंबेडकर स्मारक सभागृहाचे निर्माते, बौद्धचार्यांचे जनक, बौध्द धम्म चळवळीचे धम्मयोध्दा, माजी श्रामनेर सुर्यपुत्र भैय्यासाहेब उर्फ यशवंत भीमराव आंबेडकर यांच्या ४९ वा स्मृतिदिनाचे औचित्य साधून बौद्धजन पंचायत समितीच्या वतीने मुखपत्र पंचशील या त्रैमासिकाचे उद्घाटन सभापती आनंदराज आंबेडकर यांच्या शुभहस्ते डॉ. बाबासाहेब आंबेडकर स्मारक सभागृह, भोईवाडा, परेल, मुंबई – १२ येथे मोठ्या उत्साहात संपन्न झाले.
सदर प्रसंगी धार्मिक पूजा पठण संस्कार समितीचे अध्यक्ष मंगेश पवार यांनी आपल्या सुमधुर आवाजात संपन्न केला तर सरचिटणीस राजेश घाडगे यांनी प्रास्ताविक सादर करीत असताना “भैय्यासाहेब आंबेडकर यांच्या जीवनपटावर प्रकाशझोत टाकत १७ सप्टेंबर हा भैय्यासाहेबांचा स्मृतिदिन यापुढे कायम सुरू ठेवण्यात येईल असा सूतोवाच केला.” तद्नंतर पंचशील त्रैमासिक समितीचे अध्यक्ष नागसेन गमरे यांनी आपल्या भाषणात “पंचशील हे मासिक खर तर पंचवीस वर्षांपूर्वीच निघणार होते परंतु काही तांत्रिक अडचणींमुळे त्याकाळी त्याचे रजिस्ट्रेशन रद्द झाले होते ते पुन्हा मिळवण्यासाठी बऱ्याच अडीअडचणींना तोंड द्यावे लागले; परंतु सभापती आनंदराज आंबेडकर आणि उपसभापती विनोद मोरे यांच्या मार्गदर्शनाखाली नागपूर, दिल्ली अशा अनेक ठिकाणी भेटी देऊन सर्व अडीअडचणींवर मात करून पंचशील हे नाव पुन्हा मिळविण्यात आले आणि त्याचे नव्याने रजिस्ट्रेशन करून हा प्रथम अंक आपण सर्वांसमोर प्रकाशन करीत आहे याचा मनस्वी आनंद होत आहे” असे आपले विचार व्यक्त केले.
तसेच पाली भाषेचे अभ्यासक, प्रवचनकार, व्याख्याते आणि त्रैमासिकाचे कार्यकारी संपादक प्राध्यापक विजय मोहिते यांनी आपल्या भाषणात “सुर्यपुत्र भैय्यासाहेब आंबेडकरांचा ४९ वा स्मृतिदिन आणि बौद्ध धम्माचे गाढे अभ्यासक, लेखक आणि महाबोधी महाविहार आंदोलनाचे प्रणेते अनागरीक धर्मपाल यांची जयंती आहे, अनागरीक धर्मपाल हे बौद्ध धम्म पुनरुज्जीवक आणि पहिले जागतिक बौद्ध धर्मप्रचारक होते, अनेक शतके भारतात अक्षरशः नामशेष झालेल्या बौद्ध धर्माच्या पुनरुज्जीवनासाठी त्यांनी उल्लेखनीय कार्य केले असून आशिया, उत्तर अमेरिका आणि युरोप अशा तीन खंडांत बौद्ध धम्म उपदेश करणारे ते आधुनिक काळातले पहिले बौद्ध होते, तसेच ‘देवळांचा धर्म आणि धर्माची देवळे’, ‘दगलबाज शिवाजी’ आदी पुस्तकांचे लेखक, समाजसुधारक, समाजसुधारक, संयुक्त महाराष्ट्र चळवळीचे पुढारी आणि गणपतीचे रहस्य या लेखात अष्टविनायक हे खऱ्या अर्थाने अष्टांगमार्ग या आठ मार्गांचा नायक गौतम बुद्ध आहे असे नमूद करणारे प्रबोधनकार ठाकरे यांचाही जयंती आहे. या दिवसांचे औचित्य साधून आपण पंचशील त्रैमासिकाचे प्रकाशन करीत आहोत हा सुवर्णक्षण आहे, बौद्धजन पंचायत समितीच्या वतीने आता पंचशील त्रैमासिक अविरत सुरू राहील.” असे त्यांनी आश्वासन दिले.
उपसभापती विनोद मोरे यांनी आपले विचार मांडीत असताना भैय्यासाहेब आंबेडकरांच्या धार्मिक, राजकीय, सामाजिक कार्यावर प्रकाशझोत टाकीत बाबासाहेब आंबेडकरांचे बौद्ध धम्म प्रचाराचे स्वप्न भैय्यासाहेबांनी पूर्ण केले असे नमूद करीत आपले मौलिक विचार मांडून उपस्थितांना मार्गदर्शन केले. तद्नंतर कार्यसम्राट कार्याध्यक्ष लक्ष्मण भगत यांनी ही आपले मौलिक विचार मांडून उपस्थितांना मार्गदर्शन करुन भैय्यासाहेब आंबेडकरांना मानवंदना दिली.
बौद्धजन पंचायत समितीचे सभापती आनंदराज आंबेडकर यांनी उपस्थितांना संबोधित करीत दिलेल्या अध्यक्षीय भाषणात “तत्कालीन पुढाऱ्यांनी बाबासाहेबांना विरोध केला होता तसाच विरोध भैय्यासाहेबांना देखील करण्यात आला होता त्यांना राजकारणातून हद्दपार करण्याचे कटकारस्थान ही करण्यात आले होते. भारत बौद्धमय करण्यासाठी खेड्यापाड्यात जाऊन वेळप्रसंगी पायी प्रवास करून त्यांनी धम्म प्रसार व प्रचार केला, विहारांची निर्मिती केली, बौद्धचार्यांना घडविले आणि त्यातून बौध्द धम्म भारतभर पोहोचवला, महानगरपालिकेच्या कर्मचाऱ्यांना घरे मिळावी यासाठी विधानसभेत ठराव पारित करून तो अंमलात आणला, कफ परेड आणि दिल्ली राजभवनात बाबासाहेबांच्या पुतळ्याची उभारणी केली, बाबासाहेबांची अनेक राहिलेली कामे पूर्ण करण्याचे काम भैय्यासाहेबांनी केले.
बाबासाहेबांची अनेक पुस्तके प्रकाशित केले” अस नमूद करून भैय्यासाहेब आंबेडकर यांना मानवंदना दिली तद्नंतर उपस्थित अनेक मान्यवरांनी आपले विचार व्यक्त करून भैय्यासाहेब आंबेडकर यांना मानवंदना देत पंचशील त्रैमासिका करता शुभेच्छा दिल्या.
सदर प्रसंगी कार्याध्यक्ष लक्ष्मण भगत, उपकार्याध्यक्ष मनोहर सखाराम मोरे, अशोक कांबळे, चंद्रमणी तांबे, चिटणीस श्रीधर साळवी, अतिरिक्त चिटणीस लवेश तांबे, यशवंत कदम, भगवान तांबे, अनिरुद्ध जाधव, श्रीधर जाधव, रविंद्र शिंदे, तुकाराम घाडगे, विवाह मंडळाचे अध्यक्ष राजाभाऊ तथा रामदास धो. गमरे, निवडणूक मंडळाचे अध्यक्ष मिलिंद जाधव, कोषाध्यक्ष अरुण मोरे, सिद्धार्थ कांबळे, महेंद्र शिवराम पवार, मनोहर बा. मोरे, महिला मंडळाच्या सुशीलाताई जाधव, सायली साळवी आदी मान्यवर मोठ्या संख्येने उपस्थित होते, सरतेशेवटी सदर कार्यक्रम यशस्वीपणे पार पाडण्यासाठी अथक परिश्रम घेणाऱ्या सर्वांचे आभार मानून सरचिटणीस राजेश घाडगे यांनी कार्यक्रमाची सांगता केली.
