पुणे : ऑल आयकॉनिक सीनियर सिटिझन्स असोसिएशन (AISCA) तर्फे यशदा ज्युबिली सोसायटी, बाणेर येथे गणेशोत्सवानिमित्त आयोजित करण्यात आलेल्या सांस्कृतिक मनोरंजन कार्यक्रमाला सोसायटी सदस्यांचा उत्स्फूर्त प्रतिसाद लाभला. या कार्यक्रमात ज्येष्ठ नागरिकांनी गायन, संगीत, विनोदी सादरीकरणे आणि विविध सांस्कृतिक कलांचे सादरीकरण करून उपस्थितांची मने जिंकली. कार्यक्रमाचे प्रमुख आकर्षण म्हणजे AISCA सदस्यांनी सादर केलेली सुरेल गीते आणि आनंददायी मनोरंजन, ज्यामुळे संपूर्ण वातावरण उत्साहाने आणि भक्तिमय भावनेने भारावून गेले.
AISCA च्या अध्यक्षा शकीला शेख यांनी ज्येष्ठ नागरिकांच्या सामाजिक सहभागाचे महत्त्व अधोरेखित करताना अशा कार्यक्रमांमुळे समाजातील एकात्मता, आनंद आणि सकारात्मकता वाढण्यास मदत होते असे सांगितले. कार्यक्रमाच्या यशस्वी आयोजनासाठी सोसायटीच्या पदाधिकाऱ्यांनी आणि रहिवाशांनी AISCA टीमचे कौतुक केले.
या कार्यक्रमात सुनिला कविटकर, सुहास घोडके, शीतल वाघ, श्रावणी राजहंस, चिंतामणी कविटकर तसेच प्रसिद्ध गायक अशफाक शेख यांनी आपल्या कलागुणांचे सादरीकरण करून उपस्थितांची दाद मिळवली. सोसायटीतर्फे डॉक्टर गुप्ते यांनी सर्वांचे स्वागत केले. कार्यक्रमाच्या शेवटी सर्वांनी श्री गणरायाच्या चरणी प्रार्थना करून समाजात सुख, समृद्धी आणि सौहार्द नांदावे अशी प्रार्थना केली. यशदा ज्युबिली सोसायटी आणि AISCA यांच्या संयुक्त विद्यमाने आयोजित हा कार्यक्रम रहिवाशांसाठी अविस्मरणीय ठरला.
