आगामी गणेशोत्सवानिमित्त कोथरूड विधानसभा मतदारसंघातील कोकणकर बांधवांना त्यांच्या मूळ गावी सुरक्षित व सुखकर प्रवास करता यावा, या उद्देशाने *”आम्ही कोकणकर फाउंडेशन” यांच्या वतीने विशेष बससेवेचे आयोजन करण्यात आले. दिनांक १२ सप्टेंबर २०२६ रोजी छत्रपती शिवाजी महाराज स्मारक, कोथरूड येथून चिपळूण, गुहागर, संगमेश्वर आणि लांजा या ठिकाणांसाठी बस रवाना करण्यात आल्या.
या प्रसंगी संदिपजी बुटाला, अल्पना ताई वरपे, गणेश भाऊ वरपे, अनिल अण्णा घोलप तसेच गणेशजी माथवड आदी मान्यवरांची प्रमुख उपस्थिती होती. यावेळी प्रवाशांच्या सुरक्षित प्रवासाची जबाबदारी पार पाडणाऱ्या ड्रायव्हर व कंडक्टर यांचा भगवी मफलर घालून सन्मान करण्यात आला. तसेच सर्व प्रवाशांना आगामी गणेशोत्सवासाठी शुभेच्छा देण्यात आल्या.
गणेशोत्सव हा कोकणच्या सांस्कृतिक आणि भावनिक जीवनाचा अविभाज्य भाग आहे. पुणे शहरात वास्तव्यास असलेल्या कोकणकर बांधवांना गणेशोत्सवासाठी आपल्या गावाकडे जाता यावे आणि आपल्या मातीशी असलेले नाते अधिक दृढ व्हावे, या भावनेतून हा उपक्रम राबविण्यात आला.
या उपक्रमाच्या यशस्वी आयोजनासाठी आम्ही कोकणकर फाउंडेशनच्या सर्व पदाधिकारी, कार्यकर्ते व सहकाऱ्यांनी केलेले नियोजन आणि अथक परिश्रम महत्त्वपूर्ण ठरले. कोकणकर बांधवांच्या सुख-दुःखात सहभागी होऊन सामाजिक बांधिलकी जपण्याचा आणि “कोकणच्या मातीशी नातं जोडण्याचा” फाउंडेशनचा हा प्रयत्न यापुढेही सुरू राहील.
