पुणे: कामावर वेळेत पोहोचण्याची धावपळ असो, महाविद्यालय गाठणारे विद्यार्थी असोत किंवा सुटीच्या दिवशी कुटुंबासह शहरभ्रमंती करणारे पुणेकर… शहराच्या दैनंदिन प्रवासात मेट्रोचा वाटा झपाट्याने वाढत आहे. ऑगस्टमध्ये तब्बल ७४ लाख २४ हजार ४३३ प्रवाशांनी पुणे मेट्रोतून प्रवास केला. या वर्षात आतापर्यंतची एका महिन्यातील सर्वाधिक प्रवासी संख्या ठरली असून, जुलैच्या तुलनेत नऊ लाखांनी प्रवासी संख्या वाढली आहे.
उत्पन्न ११ कोटी ३३ लाख रुपयांवर
या वर्षाच्या सुरुवातीला मेट्रोची दैनंदिन प्रवासी संख्या दोन लाखांच्याजवळ होती. प्रवासी संख्या वाढवण्यासाठी ‘महामेट्रो’कडून जोरदार प्रयत्न केले. शैक्षणिक वर्ष सुरू होताच प्रवासी संख्या लक्षणीय वाढली आहे. या महिन्यात रोज सरासरी दोन लाख ३९ हजार प्रवासी होते. ऑगस्टमधील उत्पन्न ११ कोटी ३३ लाख रुपयांवर गेले.
४० लाख प्रवासी
प्रवासी संख्येत वनाझ ते रामवाडी लाइन-२ अर्थात ‘ॲक्वा लाइन’ आघाडीवर आहे. या मार्गावरून ऑगस्टमध्ये ४० लाख ४८ हजार २५ प्रवाशांनी प्रवास केला. एकूण प्रवासीसंख्येत ॲक्वा लाइनचा वाटा ५४.५ टक्के राहिला. मेट्रो सुरू झाल्यापासूनच या मार्गावर प्रवासी संख्या जास्त होती.
‘पर्पल लाइन’वर प्रवाशांची नोंद
तर, स्वारगेट ते पिंपरी चिंचवड लाइन-१ अर्थात ‘पर्पल लाइन’वर ३३ लाख ७६ हजार ४०८ प्रवाशांची नोंद झाली. एकूण प्रवासीसंख्येत या मार्गाचा वाटा ४५.५ टक्के होता. या मार्गातून सुमारे पाच कोटी ९६ लाख रुपये, तर ‘पर्पल लाइन’मधून सुमारे पाच कोटी ३८ लाख रुपयांचे उत्पन्न मिळाले.
२७ ऑगस्टला उच्चांक
मेट्रोसाठी ऑगस्टमध्ये २७ ऑगस्ट हा सर्वाधिक गर्दीचा दिवस ठरला. त्या दिवशी दोन लाख ६५ हजार ६४ प्रवाशांनी मेट्रोतून प्रवास केला. पिंपरी-चिंचवड ते स्वारगेट (पर्पल लाइन) या मार्गावर एका दिवसातील सर्वाधिक एक लाख २८ हजार ७५६ प्रवासी १५ ऑगस्टला नोंदविण्यात आले.
महामेट्रोची माहिती
वनाझ ते रामवाडी मार्गावर (ॲक्वा लाइन) ११ ऑगस्टला सर्वाधिक एक लाख ५० हजार ३४९ प्रवाशांनी प्रवास केला, अशी माहिती ‘महामेट्रो’च्या वतीने देण्यात आली.
