वेस्ट इंडीजचा दिग्गज अष्टपैलू खेळाडू आंद्रे रसेल याने आंतरराष्ट्रीय क्रिकेटमधून निवृत्ती जाहीर केली आहे. ऑस्ट्रेलियाविरुद्धच्या टी२० मालिकेतील दोन सामन्यांनंतर तो क्रिकेटला अलविदा करणार आहे. त्यामुळे या मालिकेकडे क्रिकेटप्रेमींचं विशेष लक्ष लागलं होतं. मात्र, पहिल्याच सामन्यात रसेलने आपल्या अपयशामुळे चाहत्यांची मोठी निराशा केली आणि वेस्ट इंडीजच्या पराभवाला कारणीभूत ठरल्याचा आरोपही सहन करावा लागला.
जमैका येथे झालेल्या या सामन्यात ऑस्ट्रेलियाने नाणेफेक जिंकून वेस्ट इंडीजला प्रथम फलंदाजीसाठी पाचारण केलं. वेस्ट इंडीजने २० षटकांत १८९ धावा केल्या. टीमचे कर्णधार शे होप (५५) आणि रोस्टन चेस (६०) यांनी अर्धशतकी खेळी करत संघाला मजबूत स्थितीत नेलं. मात्र, आंद्रे रसेल फक्त ८ धावांवर बाद झाला. ९ चेंडूंमध्ये केवळ ८ धावांची भर घालणाऱ्या रसेलची ही खेळी अत्यंत निराशाजनक ठरली.
रसेलकडून अपेक्षा होती की, फलंदाजीत अपयश आलं तरी तो गोलंदाजीत चमत्कार करेल. पण त्याने तिथेही अपेक्षांना तडा दिला. केवळ २ षटकांत त्याने ३७ धावा दिल्या आणि एकही बळी घेतला नाही. त्यामुळे तो संघाचा सर्वात महागडा गोलंदाज ठरला.
ऑस्ट्रेलियाच्या फलंदाजांनी या अपयशाचा पुरेपूर फायदा घेतला. कॅमेरून ग्रीनने ५१ आणि आंतरराष्ट्रीय पदार्पण करणाऱ्या मिचेल ओवनने ५० धावांची खेळी करत सामन्यावर शिक्कामोर्तब केलं. ऑस्ट्रेलियाने १९० धावांचं लक्ष्य ७ चेंडू राखून आणि ७ गडी राखून पूर्ण केलं.
या सामन्याद्वारे आंद्रे रसेलने निवृत्तीकडे वाटचाल करताना आपली छाप सोडण्याऐवजी अधिक निराशा निर्माण केली. अशा प्रकारचा निरोप कुणालाच नकोसा वाटावा, असाच रसेलचा खेळ ठरला. आता दुसऱ्या सामन्यात तो कसं प्रदर्शन करतो, याकडे सर्वांचे लक्ष लागलं आहे.
