महाराष्ट्राच्या राजकारणात सध्या पुन्हा एकदा राष्ट्रवादी काँग्रेसच्या दोन्ही गटांच्या विलीनीकरणाच्या जोरदार चर्चा सुरु झालीय. गेल्या काही दिवसांपासून दोन्ही बाजूच्या नेत्यांकडून विलीनीकरणाबाबत सातत्याने भाष्य केलं जात होतं. याबाबत शरद पवार यांच्यासोबत काही मुद्द्यावर बैठक देखील होणार असल्याचे म्हटलं जात होतं. त्यानंतर आता उपमुख्यमंत्री सुनेत्रा पवार यांनी बारामती येथे घेतलेल्या पत्रकार परिषदेत विलीनीकरणाबाबतच्या प्रश्नांवर आणि सुरू असलेल्या चर्चांवर प्रतिक्रिया दिली आहे.
माजी उपमुख्यमंत्री अजित पवार यांच्या २८ जानेवारी रोजी झालेल्या आकस्मिक विमान अपघातामुळे पवार कुटुंबाला मोठा धक्का बसला होता. अजितदादांच्या अकाली जाण्याने राष्ट्रवादी पक्षात मोठी पोकळी निर्माण झाली. अजित पवार असताना त्यांनी दोन्ही पक्षांनी एकत्र यावं अशी भूमिका मांडल्याचे शरद पवार गटाने म्हटलं होतं. त्यानंतर काही राजकीय घडामोडींमध्ये अजित पवार गटाच्या काही आमदारांनी शरद पवारांची भेट घेतल्याची जोरदार चर्चा रंगली होती. अशातच शरद पवार रुग्णालयात उपचार घेत असताना, दोन्ही गटांच्या नेत्यांमध्ये भेटीगाठी वाढल्याने विलीनीकरणाच्या चर्चांना अचानक वेग आला होता.
सुनील तटकरे आणि प्रफुल्ल पटेल यांच्या विधानांनी चर्चांना उधाण
अजित पवार गटाचे पक्षाचे ज्येष्ठ नेते प्रफुल्ल पटेल यांनीही रुग्णालयात शरद पवारांची भेट घेऊन, दिवाळीनंतर यावर चर्चा करूया, असे म्हटले होते. यानंतर काही वेळातच प्रदेशाध्यक्ष सुनील तटकरे यांनी एक मोठे विधान केले. “जर आज अजितदादा हयात असते, तर राष्ट्रवादीचे दोन्ही गट आज एकत्र पाहायला मिळाले असते. मात्र, अजितदादांच्या दुर्दैवी निधनामुळे सध्या विलीनीकरणाची चर्चा मागे पडली आहे,” असा दावा त्यांनी केला होता. त्यानंतर एकत्र येण्याच्या चर्चांना आणखी वाढल्या.
या सर्व घडामोडींच्या पार्श्वभूमीवर आज बारामतीमध्ये सुनेत्रा पवार नेमकी काय भूमिका मांडणार याकडे संपूर्ण राज्याचे लक्ष लागून होते. पत्रकार परिषदेत सुनेत्रा पवार यांनी “जशी वेळ येईल तशा गोष्टी आपल्याला कळतीलच”, या एका वाक्यात आपली भूमिका स्पष्ट केली.
दरम्यान, सुनेत्रा पवारांनी विलीनीकरणाची चर्चा नाकारलीही नाही आणि ती खरी असल्याचेही मान्य केले नाही. त्यामुळे दोन्ही गट भविष्यात एकत्र येणार का? याकडे आता संपूर्ण महाराष्ट्राचे लक्ष लागले आहे.




