राज्यातील पुणे पदवीधर आणि शिक्षक मतदारसंघाच्या निवडणुकीतील उमेदवारी अर्ज मागे घेण्याची मुदत संपल्याने अंतिम निवडणूक चित्र स्पष्ट झाले आहे. बंडखोरांनी माघार घेतल्याने पदवीधर मतदारसंघात महायुतीविरुद्ध महाविकास आघाडी अशी थेट लढत होणार आहे. सत्ता असतानाही यापूर्वी गमावलेली जागा आपल्या ताब्यात ठेवण्यासाठी भारतीय जनता पक्षाने कंबर कसली असून आवश्यक ती खबरदारी म्हणून सर्व बंडखोरांची मनधरणी करण्यात भारतीय जनता पक्षाला यश आले आहे. वरकरणी पुणे पदवीधर मतदारसंघ भारतीय जनता पक्ष व महायुतीला सहज सोप्पा वाटत असला तरी सुद्धा एनवेळी पसंती क्रमांक मध्ये तयारी केलेले इच्छुक कोणाला पसंती देतात यावरच या मतदारसंघाची विजयाची गणिते अवलंबून आहेत.
महायुती चाणाक्षांच्या मते पुणे विभागातील दोन्ही जागेवर महायुतीचा विजय साकार करण्यासाठी जी रणनीती आखली आहे त्यानुसार शिक्षक मतदारसंघात थेट लढत झाल्यास महायुतीला फटका बसण्याची शक्यता लक्षात घेऊन विभागवार विभागणी व्हावी या हेतूने पुणे सोलापूर या भागातून बंडखोरीला पाठबळ देण्याचे काम केले आहे की काय अशी चर्चा सध्या सुरू आहे. सोलापूर जिल्ह्यातील माजी आमदार दत्ता सावंत यांना मागील वेळी सुद्धा दुसऱ्या क्रमांकाची (महायुती उमेदवारापेक्षा जास्त) मते मिळालेली असल्याने त्यांची उमेदवारी कायम ठेवण्याचे काम भारतीय जनता पक्षाच्या वतीने करण्यात आले आहे तर पुणे विभागातूनही महायुती विचारसरणीच्या उमेदवाराने आपला अर्ज कायम ठेवल्याने फारशी महायुतीच्या ताब्यात नसलेली ही शिक्षक मतदार संघाची जागा ही मिळवण्यासाठी नवी रणनीती असण्यात आली आहे. या मतदारसंघात विभागवार असलेल्या अपक्ष उमेदवाराच्या उपस्थितीमुळे रंगतदार सामना पाहायला मिळणार आहे.
पुणे पदवीधर मतदारसंघात महायुतीकडून नुकत्याच भाजपवासी झालेल्या डॉ. स्मिता योगेश जाधव आणि महाविकास आघाडीकडून राष्ट्रवादी काँग्रेस शरदचंद्र पवार पक्षाच्या हर्षदा देशमुख-जाधव यांच्यात थेट ‘जाधव विरुद्ध जाधव’ अशी चुरशीची लढत होणार आहे. पुणे पदवीधर मतदारसंघासाठी सुरुवातीपासून माजी आमदार अरुण लाड यांचे सुपुत्र शरद लाड आणि कोल्हापूर विभागातील राष्ट्रवादी काँग्रेस पक्षाचे प्रताप माने यांच्या वतीने जोरदार तयारी करण्यात आली होती. दोघांनाही उमेदवारी मिळण्याची शक्यता असताना अचानक पक्ष प्रवेश करून उमेदवार झालेल्या डॉक्टर स्मिता जाधव यांच्या समर्थनार्थ हे दोन्ही इच्छुक नेमकी कोणती भूमिका घेतात यावरच या मतदारसंघाचा निकाल अवलंबून राहणार आहे. महायुती सदस्य राष्ट्रवादीचे बंडखोर उमेदवार प्रताप उर्फ भैय्या माने यांनी अखेरच्या क्षणी माघार घेतल्यामुळे या मतदारसंघातील बंडखोरी शमली असून आता दोन महिला उमेदवारांमधील थेट संघर्ष लक्षवेधी ठरणार आहे.
दुसऱ्या बाजूला, पुणे शिक्षक मतदारसंघात तिरंगी लढत निश्चित झाली आहे. भाजपने अधिकृत उमेदवारी दिलेले कौस्तुभ गावडे, काँग्रेसचे विद्यमान आमदार जयंत आसगावकर आणि अपक्ष रिंगणात उतरलेले दत्ता सावंत, बी. आर. रोंगे (सोलापूर), सचिन सानप यांच्यात ही लढत होईल. शिवसेना (शिंदे गट) कडून उमेदवारी मिळवण्यासाठी आग्रही असलेले सचिन सानप यांनी अपक्ष म्हणून आपले आव्हान कायम ठेवले आहे. मात्र, शिवसेनेचे मंगेश चिवटे आणि राष्ट्रवादी काँग्रेस शरदचंद्र पवार पक्षाच्या अश्विनी कदम यांनी उमेदवारी अर्ज मागे घेतल्याने निवडणुकीतील बंडोबा थंडोबा करण्यात पक्षांच्या नेतृत्वाला यश आले आहे.
पुणे, सातारा, सांगली, कोल्हापूर आणि सोलापूर या पाच जिल्ह्यांचे कार्यक्षेत्र असलेल्या या निवडणुकीत उमेदवारी अर्ज माघारीनंतर राजकीय समीकरणे पूर्णपणे स्पष्ट झाली आहेत. बंडखोरांची समजूत काढण्यात दोन्ही आघाड्यांना बहुतांशी यश आले असले, तरी शिक्षक मतदारसंघातील दत्ता सावंत, बी. आर. रोंगे (सोलापूर), सचिन सानप यांची अपक्ष उमेदवारी नेमका कुणाचा गेम करणार, याकडे सर्वांचे लक्ष लागले आहे. दोन्ही मतदारसंघांतील थेट आणि तिहेरी लढतींमुळे पश्चिम महाराष्ट्रातील राजकीय वातावरण आता चांगलेच तापू लागले आहे.
