गुहागर दि. २७ (रामदास धो. गमरे) बौद्धजन मागासवर्गीय नागरी सहकारी पतसंस्था (मर्या.) या पतसंस्थेची दुसरी वार्षिक सर्वसाधारण सभा रविवार दि २७ सप्टेंबर २०२६ रोजी सकाळी ठीक ११:०० वाजता संत तुकाराम महाराज सभागृह (गुहागर बाजार) शृंगारतळी येथे चेअरमन के. सी. जाधव यांच्या अध्यक्षतेखाली मोठ्या उत्साहात आणि सभासदांच्या उस्फुर्त प्रतिसादात संपन्न झाली.
सदर सभेचे सूत्रसंचालन पतसंस्थेचे चिटणीस महेंद्र महादेव मोहिते यांनी आपल्या भारदस्त आणि पहाडी आवाजात लाघवी भाषाशैलीत करत वार्षिक सर्वसाधारण सभेच्या परिपत्रकाचे वाचन करून सभेत घेतल्या जाणाऱ्या विषयांची गोषवारा सादर केला, तद्नंतर सर्वच विषय, प्रश्न सर्वांच्या उपस्थितीत खेळीमेळीच्या वातावरणात अहवाल मांडण्यात आला व त्याचे सर्वच सभासदांनी टाळ्यांच्या गजरात स्वागत केले. तसेच लेखापरीक्षकांनी ३१ मार्च २०२५ ते ३१ मार्च २०२६ चा तयार केलेला नफा-तोटा ताळेबंद अहवाल सर्वानुमते मंजूर करून घेण्यात आला. सभागृहात उपस्थित काही सभासदांनी सहकार विषयावर काही प्रश्न मांडले त्या सर्वांना संचालक मंडळाने समर्पक अशी उत्तरे देऊन त्यांच्या प्रश्नांचे व शंकाचे निरसन केले. सदर अहवालाच्या संदर्भात प्रत्येक सभासदाने कौतुकास्पद उद्गार काढले तसेच आर्थिक वर्षाचे अंदाजपत्र देखील सदर सभेत मांडून ते सर्वानुमते मंजूर करण्यात आले.
सदर सभेस पतसंस्थेचे उपाध्यक्ष सुनील सखाराम जाधव, तज्ञ संचालक शैलेंद्र शांताराम पवार, संचालक संजय भिकाजी तांबे, संचालक रामदास धों. गमरे, संचालक संजय रामचंद्र पवार, संचालिका मनिषा महेंद्र जाधव आदींनी आपले मौलिक विचार मांडून उपस्थित सभासदांना मार्गदर्शन केले. सदर सभेत पतसंस्थेने एक वर्ष नऊ महिने इतक्या कालावधीतच “बी” ग्रेड प्राप्त केल्याबद्दल सर्व सभासदांनी संचालक मंडळाच्या नियोजनबद्ध कार्याच व पारदर्शक कार्यप्रणालीचे कौतुक केले आणि यापुढेही ही पतसंस्था गतिमान आणि गतिशील राहून आपले कार्य करत राहील अशा शुभेच्छारुपी भावना व्यक्त करीत भविष्यातही पतसंस्था अधिक गतिमान आणि प्रगतिशील पद्धतीने कार्यरत राहून सभासदांच्या हितासाठी नवनवीन उपक्रम राबवेल असा विश्वासही सभासदांच्या वतीने व्यक्त करण्यात आला.
अशा प्रकारे सभासदांचा उत्स्फूर्त सहभाग, खेळीमेळीचे वातावरण आणि संस्थेच्या प्रगतीबद्दल व्यक्त झालेला विश्वास यामुळे पतसंस्थेची दुसरी वार्षिक सर्वसाधारण सभा यशस्वीरीत्या संपन्न झाली; सरतेशेवटी सदर सभा यशस्वीपणे पार पाडण्यासाठी अथक परिश्रम घेणाऱ्या सर्वांचे आणि उपस्थितांचे आभार मानून ज्येष्ठ संचालक संजय भिकाजी तांबे यांनी सभेची सांगता केली.
