पितृपक्षाला हिंदू धर्मशास्त्रामध्ये विशेष महत्त्व आहे. पितृपक्षाला पितृ पंधरवाडा असं देखील म्हटलं जातं. पितृपक्षामध्ये आपल्या पूर्वजांचं स्मरण केलं जातं. तसेच पूर्वजांच्या नावानं तर्पण, श्राद्ध आणि दानधर्म आदी विधी देखील केले जातात.
यंदा 26 सप्टेंबरपासून पितृपक्षाला सुरुवात होत आहे. तर दहा ऑक्टोबर रोजी पितृपक्षाची सांगता होणार आहे. दरम्यान पितृपक्षात आपल्या पूर्वजांच्या नावाने तर्पण केलं जातं. दानधर्म केला जातो. मात्र हे करत असतानाच वास्तुशास्त्रानुसार पितृपक्ष सुरू होण्यापूर्वी देखील घरातील काही काम करणं महत्त्वाचं असतं. यामुळे तुमचे पूर्वज तुमच्यावर प्रसन्न होतात. घरातील पितृदोष दूर होतो. तसेच घरात सुख, शांती आणि समृद्धी येते. चला तर मग जाणून घेऊयात वास्तुशास्त्रामध्ये नेमकं काय सांगितलं आहे? त्याबद्दल.
घराची स्वच्छता – पितृपक्ष सुरू होण्यापूर्वी सर्व घराची व्यवस्थित साफ-सफाई करणं गरजेचं असतं. कारण या काळात तुमच्या पूर्वजांचा वास हा तुमच्या घरात असतो असं म्हटलं जातं. तसेच ज्या घरात स्वच्छता असते, अशा घरात कधीही पैशांची कमी भासत नाही, असंही वास्तुशास्त्रात सांगण्यात आलं आहे.
खराब झालेल्या वस्तू बाहेर काढा – घरामध्ये कुठल्याही तुटलेल्या, खराब झालेल्या इलेक्टॅनिक, इलेक्ट्रिक वस्तू, तसेच बंद पडलेली घड्याळं नसावीत असं वास्तुशास्त्रात सांगण्यात आलं आहे. कारण या वस्तूंमुळे घरात नकारात्मक ऊर्जा तयार होते, ज्याचा परिणाम हा तुमच्या कुटंबावर होत असतो, घरात सतत भांडणं होणं, आर्थिक नुकसान या सारख्या घटना घडू शकतात.
दक्षिण दिशेला अडथळा नसावा – वास्तुशास्त्र आणि हिंदू धर्मशास्त्रानुसार दक्षिण दिशा ही तुमच्या पित्रांची दिशा असते, त्यामुळे पितृपक्षामध्ये तुमच्या घराची दक्षिण दिशा ही नेहमी स्वच्छ ठेवावी, या दिशेला कोणताही अडथळा निर्माण होणार नाही, याची काळजी घ्यावी, असं वास्तुशास्त्रामध्ये सांगण्यात आलं आहे.
(तळटीप: वरील माहिती उपलब्ध स्रोतावरून आहे. आमचा याच्या तथ्यांबद्दल कुठलाही दावा करीत नाही, अंधश्रद्धेला दुजोरा देत नाही)
