पुणे: व्यावसायिक केतन अग्रवाल याचा लोहगड किल्ल्यावरून दरीत ढकलून खून करण्यासाठी त्याची नियोजित वधू सिया गोयल आणि तिचा प्रियकर चेतन चौधरी आणि त्याचा मित्र रितेश हंगे यांनी ‘माही’ नावाच्या बनावट समाजमाध्यम खात्याचा वापर केला, असे पुणे ग्रामीण पोलिसांनी न्यायालयात दाखल केलेल्या आरोपपत्रात नमूद करण्यात आले आहे. आरोपींनी ‘माही’ सियाची मैत्रीण असल्याचे भासवून, तिचा वाढदिवस ‘सरप्राइज’ पद्धतीने साजरा करण्याच्या बहाण्याने केतनला तिसऱ्यांदा लोहगडावर बोलवले आणि खुनाचा कट अंमलात आणल्याचे पोलिसांच्या तपासात निष्पन्न झाले. केतन अग्रवाल याचा १८ जूनला लोहगड किल्ल्यावरून दरीत कोसळून खून करण्यात आला. या प्रकरणी सिया प्रवीण गोयल, चेतन बाबुलाल चौधरी आणि रितेश संजय हंगे या तिघांना अटक करण्यात आली असून, त्यांच्याविरोधात पाच हजार ५३ पानांचे आरोपपत्र शनिवारी वडगाव मावळ सत्र न्यायालयात दाखल करण्यात आले.
खुनाच्या कटाचा सल्लागार कोण?
केतन अग्रवालच्या खुनाच्या कटात चेतनचा वर्गमित्र रितेश हंगे याने सल्लागाराची भूमिका बजावल्याचे पोलिस तपासात निष्पन्न झाले. केतनचे हात-पाय तोडायचे की अन्य व्यक्तीकडून हत्या करून घ्यायची, या संदर्भातील चर्चेत रितेश सहभागी होता. गुन्ह्यानंतर पोलिसांच्या कारवाईपासून कसे वाचायचे, सीसीटीव्हीपासून स्वतःचा बचाव कसा करायचा, मोबाइलचा वापर कसा टाळायचा, याबाबत रितेशने चेतन आणि सियाला माहिती दिल्याचे आरोपपत्रात म्हटले आहे. अधीक्षक संदीपसिंग गिल यांच्या नेतृत्वाखाली पुणे ग्रामीण पोलिसांनी या प्रकरणाचा छडा लावला आहे.
सिनेमे पाहून कट
मेघालयात मधुचंद्रासाठी गेलेल्या सोनम रघुवंशीने प्रियकराच्या मदतीने पतीची दरीत ढकलून खून केल्याची घटना मे २०२५मध्ये देशात ‘ऑपरेशन हनीमून’ म्हणून चर्चेत आली होती. सिया, चेतन आणि रितेश यांनी या हत्याकांडाचा अभ्यास केला होता. इतकेच नव्हे तर, त्यांनी खुनाच्या घटनांवर आधारित चित्रपटही पाहून केतनला दरीत ढकलण्याचे ठरवल्याचे आरोपपत्रात म्हटले आहे.
पाहणीनंतर लोहगड निवडला
केतनचा खून करण्यासाठी आरोपींनी २१ मे रोजी लोणावळ्यातील प्रसिद्ध टायगर पॉइंटसह विविध दऱ्या-खोऱ्यांची पाहणी केली. आरोपींना इंटरनेटवर मार्च २०२५मध्ये सांगवीतील २१ वर्षीय तरुणीचा लोहगडावरून पडून मृत्यू झाल्याच्या घटनेची माहिती मिळाली होती. त्यानंतर २९ मे रोजी सिया आणि केतन लोहगडावर ट्रेकिंगसाठी गेले. तिथे तिने केतनला दरीत ढकलण्याची जागा निश्चित केली, असे पोलिसंनी आरोपपत्रात म्हटले आहे.
