आपल्याकडे परतीचा मॉन्सून येतो, त्यामुळे आपल्याला ५ ऑक्टोबरला दुष्काळ जाहीर करताच येत नाही. कायदा आणि नियमाने आपले हात बांधलेले आहेत. पाऊस पडण्याचे दिवस संपल्याशिवाय आपल्याला दुष्काळ जाहीर करता येत नाही. त्यामुळे शेतकऱ्यांनी आपली पिके न नांगरता पंचनाम्यासाठी वाट पाहिली पाहिजे, असे विधान पालकमंत्री जयकुमार गोरे यांनी केले आहे.
सोलापुरात आज (ता. 21 सप्टेंबर) पालकमंत्री जयकुमार गोरे यांनी जिल्ह्यातील दुष्काळी परिस्थितीचा आढावा घेण्यात आला. त्यानंतर माध्यमांशी बोलताना पालकमंत्री गोरे यांनी हे विधान केले आहे.
ते म्हणाले, दुष्काळ जाहीर करण्याचे काही निकष असतात. पाच आक्टोंबर ही केंद्र सरकारची परतीचा मॉन्सून संपण्याची शेवटची तारीख आहे. त्यानंतर दुष्काळी परिस्थिती पाहून निर्णय घेतला जातो. त्यावर सरकार पूर्वतयारी करत आहे. जापेर्यंत पावसाच्या तारखा आहेत, तोपर्यंत आपल्याला पावसाची वाट बघावी लागेल. त्यानंतरच दुष्काळी उपाययोजना करण्यात येतील.
आपल्याकडे परतीचा मॉन्सून येतो, त्यामुळे आपल्याला पाच ऑक्टोबर रोजी दुष्काळ जाहीर करताच येत नाही. कायदा आणि सगळ्या नियमाने आपले हात बांधलेले आहेत. पाऊस पडण्याचे दिवस जेव्हा संपतात, तेव्हाच आपण दुष्काळ जाहीर करतो, असेही त्यांनी नमूद केले.
कधी कधी एकाच दिवशी प्रचंड पाऊस पडतो, पण सध्या तशी परिस्थिती नाही. आपण सध्या प्रचंड संकटात आहोत. सर्व निकष पूर्ण करून आपले प्रस्ताव वेळेत सरकारकडे पाठविण्यासाठी आजची बैठक होती, असेही ग्रामविकास मंत्री गोरे यांनी स्पष्ट केले.
शेतकऱ्यांनी पिके नांगरू नयेत
ते म्हणाले, शेतकऱ्यांनी आपली पिके नांगरून न टाकता थांबलं पाहिजे. आपल्याला पंचनामे करेपर्यंत थांबलं पाहिजे. पण, अधिकाऱ्यांनी पिकांची माहिती घेतलेली आहे. काही पिकांना पाऊस पडूनही फायदा होणार नाही. काही पिकांना पाऊस पडला तर पुन्हा उभारी येऊ शकते. थोडीशी पिकं सुस्थितीत आहेत, ती बाहेरही पडू शकतात. कायद्याने सगळ्यांचे हात बांधलेले आहेत. सरकार म्हणून निर्णय जाहीर केला, तर ते तसे होत नाही, त्यामुळे शेतकऱ्यांनी आपली पिके न नांगरता पंचनाम्यासाठी वाट पाहिली पाहिजे.
