पुणे गणेशोत्सवाच्या काळात मध्यवर्ती पुण्यात वाढणारी गर्दी, वाहतूक कोंडी आणि पार्किंगच्या समस्येवर मात करण्यासाठी पुणेकरांनी मेट्रो प्रवासाला मोठी पसंती दिली आहे.शनिवार आणि रविवार या अवघ्या दोन दिवसांत तब्बल ८ लाख ७७ हजार ३७७ प्रवाशांनी मेट्रोने प्रवास केला. या प्रवासातून पुणे मेट्रोला १ कोटी ११ लाख ७४ हजार ५०८ रुपयांचा महसूल मिळाला आहे.
शनिवारी मेट्रो स्थानकांवर प्रवाशांची सर्वाधिक गर्दी पाहायला मिळाली. या एकाच दिवशी ४ लाख ७८ हजार ४७७ प्रवाशांनी प्रवास केला, ज्यातून ६० लाख २५ हजार २७१ रुपयांचे उत्पन्न मिळाले. तर रविवारी ३ लाख ९८ हजार ९०० नागरिकांनी मेट्रोचा वापर केला असून त्यातून ५१ लाख ४९ हजार २३७ रुपयांचा महसूल जमा झाला.
स्वारगेट-पिंपरी मार्गावर सर्वाधिक गर्दीप्रवाशांची पहिली पसंती स्वारगेट ते पिंपरी-चिंचवड या मार्गाला राहिली. दोन दिवसांत एकट्या याच मार्गावर ४ लाख ९८ हजार ७६२ प्रवाशांनी प्रवास केला. गणेशोत्सवानिमित्त मध्यवर्ती पेठांमध्ये गणपती दर्शनासाठी जाणाऱ्या नागरिकांनी या मार्गाचा मोठ्या प्रमाणावर वापर केला.
दुसरीकडे, वनाज ते रामवाडी या मार्गावर शनिवारी २ लाख ९ हजार ५३९, तर रविवारी १ लाख ६९ हजार ७६ प्रवाशांनी प्रवास केला. गणेशोत्सवातील गर्दी लक्षात घेता मेट्रो प्रशासनाने फेऱ्यांची संख्या आणि सेवेची वेळ वाढवली आहे. वाहतूक कोंडी अन् पार्किंगच्या कटकटीपासून वाचण्यासाठी नागरिक खाजगी वाहनांऐवजी मेट्रोसारख्या सार्वजनिक वाहतूक व्यवस्थेला प्राधान्य देत आहेत.
गणेशोत्सवाच्या पार्श्वभूमीवर मध्यवर्ती पुण्यातील गर्दी वाढत असताना, उपनगरांतून शहराच्या मध्यवर्ती भागात पोहोचण्यासाठी पुणेकरांकडून मेट्रोला मोठी पसंती मिळत आहे. गणेशोत्सवाच्या पहिल्या दिवसापासून मेट्रोच्या प्रवासीसंख्येत सातत्याने वाढ होत असून, अवघ्या चार दिवसांत दैनंदिन प्रवासीसंख्येत तब्बल १ लाख १० हजारांहून अधिक वाढ झाली आहे. याचा परिणाम मेट्रोच्या दैनंदिन महसुलावरही झाला आहे.
वनाज-रामवाडी आणि पिंपरी-चिंचवड-स्वारगेट या दोन्ही मार्गांवर १४ सप्टेंबर रोजी एकूण २ लाख ६२ हजार ६७१ प्रवाशांनी प्रवास केला. त्यानंतर प्रवासीसंख्येत सातत्याने वाढ झाली. १५ सप्टेंबरला २ लाख ८७ हजार ९००, १६ सप्टेंबरला ३ लाख १९ हजार ९१५, तर १७ सप्टेंबरला तब्बल ३ लाख ७२ हजार ८३२ प्रवाशांनी मेट्रोचा वापर केला.
