पुणे: गणेशोत्सवाच्या पावन पर्वानिमित्त मिस्टिक वंडर सोसायटी, नार्हे येथे ऑल आयकॉनिक सीनियर सिटिझन्स असोसिएशन (AISCA) तर्फे आयोजित करण्यात आलेल्या सांस्कृतिक मनोरंजन कार्यक्रमाला रहिवाशांचा उत्स्फूर्त प्रतिसाद लाभला. सायंकाळी ६ ते ८ या वेळेत पार पडलेल्या या कार्यक्रमाने संपूर्ण परिसर आनंद, उत्साह आणि संगीताच्या सुरांनी भारावून गेला.
कार्यक्रमाची सुरुवात श्री गणेश वंदनेने झाली. त्यानंतर AISCA सदस्यांनी सादर केलेल्या सुरेल गीतांनी, मनोरंजक सादरीकरणांनी आणि सांस्कृतिक कार्यक्रमांनी उपस्थितांची मने जिंकली. ज्येष्ठ नागरिकांच्या उत्साहपूर्ण सहभागामुळे कार्यक्रमाला विशेष रंगत आली.
या कार्यक्रमात AISCA अध्यक्षा शकीला शेख, सुनिला कवितकर, चिंतामणी कवितकर, सुहास घोडके, शीतल वाघ, श्रावणी राजहंस तसेच प्रसिद्ध गायक अशफाक शेख यांनी आपल्या कलागुणांचे उत्कृष्ट सादरीकरण केले. त्यांच्या सादरीकरणाला उपस्थितांनी भरभरून दाद दिली. या वेळी स्नेहकुंज च्या संचालिका मृणाल राजहंस उपस्थित होत्या.
सोसायटीचे अध्यक्ष राहुल येवले तसेच अन्य कार्यकारिणी सदस्यांनी योगेश इंगळे, योगिता देशमुख, निलेश साळुंके, जमीर पटवेकर, गिरीश चोरगे यांनी AISCA च्या उपक्रमांचे कौतुक करत अशा कार्यक्रमांमुळे ज्येष्ठ नागरिकांना सामाजिक व्यासपीठ मिळते आणि सोसायटीमधील आपुलकी व एकोपा अधिक दृढ होतो, असे मत व्यक्त केले.
कार्यक्रमाच्या शेवटी सर्व उपस्थितांनी गणरायाच्या चरणी सुख, समृद्धी आणि उत्तम आरोग्यासाठी प्रार्थना केली. मिस्टिक वंडर सोसायटी आणि AISCA यांच्या संयुक्त प्रयत्नातून साकारलेला हा कार्यक्रम रहिवाशांसाठी एक संस्मरणीय अनुभव ठरला.
