गणेशोत्सवात डीजे व साउंड सिस्टीमवर सरसकट बंदी घालण्यावरून पुण्यात सध्या तीव्र वाद सुरू आहे. आता ‘पुणे जिल्हा साउंड, लाईव्ह, जनरेटर ओनर्स असोसिएशन’ने आपली स्पष्ट भूमिका मांडली आहे. प्रशासनाने घातलेले नियम व सर्वोच्च न्यायालयाची डेसिबल मर्यादा पाळण्यास आम्ही पूर्णपणे तयार आहोत, मात्र सरसकट बंदी किंवा निर्बंध लादून मराठी व्यावसायिकांना उद्ध्वस्त करू नका, अशी आर्त हाक या व्यावसायिकांनी दिली आहे.
तीन लाख कुटुंबांच्या उदरनिर्वाहाचा प्रश्न
असोसिएशनच्या पदाधिकाऱ्यांनी दिलेल्या माहितीनुसार, पुणे जिल्ह्यात साउंड, लाईट, जनरेटर, ट्रॅक्टर आणि ट्रान्सपोर्ट अशा संपूर्ण साखळीवर सुमारे ३० हजार कुटुंबे आणि ३ लाखांहून अधिक लोकांचा उदरनिर्वाह अवलंबून आहे. हा व्यवसाय हंगामी असून बँकांचे कर्ज काढून, सोने गहाण ठेवून परदेशातून महागड्या सिस्टीम खरेदी केल्या जातात. त्यावर जीएसटी व कर भरला जातो. मात्र, ऐन सणासुदीच्या काळात बंदी घातल्यास कर्जाचे हप्ते कसे फेडायचे? अशी वेळ आल्यास शेतकर्यांप्रमाणे साउंड व्यावसायिकांवरही आत्महत्येची वेळ येईल, अशी भीती त्यांनी व्यक्त केली.
नियमांचे पालन करण्याची तयारी
व्यवसायातील त्रुटींवर बोलताना पदाधिकाऱ्यांनी स्पष्ट केले की, ते ‘प्रेशर मिड’ आणि ‘प्लाझ्मा सिस्टीम’ पूर्णपणे बंद करण्यास तयार आहेत. पुणेकरांना आणि प्रशासनाला हवे तसे ‘क्लीन आणि क्लिअर साउंड’ वाजवण्याची त्यांची तयारी आहे. पोलिस प्रशासनाने दिलेल्या ‘४ बेस ४ टॉप’च्या नियमांचे गणेश मंडळांनीही पालन करावे, असे आवाहन त्यांनी केले. बंदीच्या चर्चांमुळे आधी झालेली बुकिंग्स मंडळे रद्द करत असल्याने मोठे आर्थिक नुकसान होत असल्याचेही त्यांनी नमूद केले.
मोठ्या आंदोलनाचा इशारा
सरकारने मराठी तरुणांचा विचार करून तातडीने योग्य नियमावली जाहीर करावी, अन्यथा येत्या तीन-चार दिवसांत हजारो गणेश मंडळांना सोबत घेऊन १० हजारांपेक्षा जास्त संख्येने मोठा मोर्चा काढू, असा इशारा व्यावसायिकांनी दिला आहे. पारंपरिक आणि मर्यादित आवाजात सण साजरा करण्यास विरोध नसून, केवळ रोजगाराचे साधन हिरावून घेऊ नये, हीच त्यांची प्रमुख मागणी आहे.
