भाजपाच्या नेत्या, अमरावतीच्या माजी खासदार नवनीत राणा यांना कोर्टाने नोटिस धाडली असून येत्या २८ फेब्रुवारी रोजी कोर्टात हजर होण्याचे आदेश दिले आहेत. हैदराबादमध्ये एमआयएमचे खासदार असदुद्दीन ओवैसी यांना धमकी दिल्या प्रकरणात नवनीत राणा यांना कोर्टाने ही नोटिस बजावली आहे. नवनीत राणा यांनी ओवैसी यांना एका भाषणात आव्हान दिले होते.त्या प्रकरणात कोर्टाने ही नोटिस बजावली आहे.

अमरावतीतील भाजपाच्या माजी खासदार नवनीत राणा यांनी लोकसभा निवडणूकीच्या दरम्यान ओवैसी भावांना आव्हान दिले होते. या प्रकरणी असदुद्दीन ओवैसी यांचे धाकटे बंधू अकबरुद्दीन ओवैसी यांनी लोकसभा दरम्यान १५ मिनिटांसाठी पोलिस हटवा मग आम्ही दाखवतो. आम्ही काय करु शकतो ते ? असे वक्तव्य केले होते. या प्रकरणात हैदराबादमधील भाजपा उमेदवार माधवी लता यांच्या प्रचारासाठी केलेल्या भाषणात भाजपाच्या नेत्या नवनीत राणा यांनी ओवैसी भावांना प्रत्युत्तर देताना त्यांचे नाव न घेता धाकटा भाऊ बोलतो की १५ मिनिटांसाठी पोलिसांना हटवा आणि मग आम्ही तुम्हाला दाखवू की आम्ही काय करतो ते पण मी म्हणते जर १५ सेकंदांसाठी पोलिसांना हटवले तर ओवैसी भावांचा पत्ता देखील लागणार नाही ते कुठेन आले होते आणि कुठे गेले होते.

नवनीत राणा साल 2019 अपक्ष खासदार झाल्या

2019 मध्ये अमरावतीतून नवनीत राणा यांनी शरद पवार यांच्या अखंड राष्ट्रवादी काँग्रेसच्या पाठिंब्याने खासदारकीची निवडणूक लढवून त्या खासदार म्हणून निवडून आल्या होत्या. त्यानंतर अचानक त्यांनी भाजपासाठी काम करणे सुरु केले होते. आमदार रवी राणा यांचा स्वत:चा पक्ष आहे हे परंतू महाविकास आघाडीच्या काळात दोघा पती – पत्नी भाजपाच्या कळपात जाऊन तत्कालिन मुख्यमंत्री उद्धव ठाकरे यांच्या वांद्रे येथील कलानगर या निवासस्थानी जाऊन हनुमान चालीसा म्हणण्याचे आंदोलन केले होते. त्यानंतर नवनीत राणा यांना अटक करण्यात आली होती. त्यानंतर बक्षिस म्हणून भाजपाने त्यांना नुकत्याच झालेल्या लोकसभा निवडणूकीवेळी भाजपात अधिकृत प्रवेश केला होता.

नवनीत राणा यांच्या वक्तव्यानंतर असदुद्दीन ओवैसी आणि कांग्रेस पक्षाने भाजपा नेता नवनीत राणा यांच्यावर टीका केली होती.ओवैसी यांनी म्हटले होती की, “मी पंतप्रधान मोदींकडून 15 सेकंद,नव्हे एक तास देण्याची मागणी करतो, आम्हाला कोणतीही भीती नाही.आम्ही पाहू इच्छतो की मानवता किती शिल्लक राखली आहे.”

या संपूर्ण विवादानंतर, हैदराबाद कोर्टाने नवनीत राणा यांना नोटिस जारी केली आहे त्यांना 28 फेब्रुवारी रोजी कोर्टात हजर राहण्याचे आदेश दिले आहेत. आता ही कायदेशीर लढाई कुठल्या पातळीवर जाणार हे येणारा काळच ठरवणार आहे.

“राष्ट्रासमोर दोन संकल्प ठेवले आहेत. या देशाला 2047 पर्यंत पूर्णत: विकसित राष्ट्र बनवणं. तसच या देशाला 2027 पर्यंत 5 ट्रिलियन डॉलरची इकोनॉमी बनवणं. संकल्प सहकार क्षेत्राचं विकास करू शकले नाहीत, तर ते अपूर्ण राहतील. 5 ट्रिलियन डॉलरची इकोनॉमी तयार होऊ शकते. 2047 पर्यंत आपला संपूर्ण राष्ट्र पूर्णपणे विकसित झालेला असेल. पण प्रत्येक कुटुंबात समृद्धीचा संकल्प पूर्ण झाला नाही, तर दोन्ही संकल्प अपूर्ण राहतील. प्रत्येक व्यक्तीला त्याच्या क्षमतेनुसार काम देणं आणि प्रत्येक व्यक्तीला देशाच्या विकासासोबत जोडणं, हे फक्त सहकारी चळवळीतूनच घडत आहे. यासाठी मोदींनी सहकार मंत्रालयाची स्थापना केलीय, असं मोठं विधान केंद्रीय गृहमंत्री आणि सहकारमंत्री अमित शाहा यांनी केलं आहे. ते पुण्यात जनता सहकारी बँकेच्या हीरक महोत्सवी वर्षाच्या समारोप सोहळ्यात बोलत होते.

अमित शाहा जनतेला संबोधीत करताना म्हणाले, “मोदींनी दहा वर्षात देशातील 70 कोटी गरिबांच्या जीवनात अनेक काम केले, जे गेल्या कित्येक पिढ्यांपासून केले गेले नाहीत. घर, घरात वीज, घरात पाणी, घरात शौचालय, गॅस, आरोग्य विमा आणि 5 किलोपर्यंत प्रत्येक व्यक्तीला रेशन..आता 70 कोटी लोकांच्या समोर एक समस्या आहे. संपूर्ण आयुष्यात ज्यासाठी मेहनत करत होतो, ते तर संपलंय. मग पुढे काय करायचं? त्यांना पुढे जायचं आहे. देशाच्या विकासात त्यांना योगदान द्यायचं आहे. परंतु, त्यांच्याकडे पैसे नाहीत. पैशांशिवाय आपल्या कुटुंबाचा विकास करायचा आहे आणि आपल्या देशाच्या विकासात योगदान द्यायचं आहे. त्याचा एकमेव उपाय कोऑपरेटीव्ह आणि सहकार आहे”.

“थोडे थोडे पैसे जमा करून खूप मोठं काम करणं, याला सहकारिता म्हणतात. जनता सहकारी बँक याचं खूप मोठं उदाहरण आहे. छोट्या लोकांची मोठी बँक या सूत्राला जनता सहकारी बँकेने सार्थक केलं आहे. कोऑपरेटिव्ह डेव्हलोपमेंटला मोदींनी दिशा देण्याचं काम केलं आहे.

ज्या बँकेचे सर्वात जास्त लाभार्थी असतात, तीच बँक यशस्वी होते, असं मानलं पाहिजे. जनता सहकारी बँकेची जमा रक्कम 9600 कोटींहून अधिक आहे. हे लोकांचं बँकेवर असलेलं विश्वास दाखवतं. समाजसेवेतही जनता सहकारी बँकेने मोलाचं योगदान दिलं आहे. लातूरचा भूकंप, कोल्हापूर, सांगली, चिपळूणचा पूर किंवा कोविड असेल, बँक समाजासोबत मजबुतीने उभी राहिली. देशातील सर्वात पहिलं सीआरसीएसचं विभागीय कार्यालय पुण्यात सुरु होणार आहे. याचं संपूर्ण श्रेय मुरलीधर मोहोळ यांना जातंय”, असंही अमित शाहा म्हणाले.

दुबई : पाकिस्तानच्या महत्वापूर्ण सामन्यासाठी आता भारताच्या संघात एका मॅचविनर खेळाडूची एंट्री होणार असल्याचे आता समोर आले आहे. त्यामुळे पाकिस्तानच्या सामन्यापूर्वी आता रोहित शर्माची चिंता मिटल्याचे पाहायला मिळत आहे.

भारताचा बांगलादेशबरोबर चॅम्पियन्स ट्रॉफीमध्ये पहिला सामना झाला होता. या सामन्यात मोहम्मद शमीने पाच विकेट्स घेत इतिहास रचला होता, तर अक्षर पटेलची हॅट्रीक हुकली होती. हर्षित राणानेही या सामन्यात दमदार कामगिरी केली होती. फलंदाजी रोहित आणि विराट यांना स्थिरस्थावर झाल्यावरही मोठी खेळी साकारता आली नव्हती. पण शुभमन गिलने शतक साकारत ही कसर भरून काढली होती. पण या सामन्यात जे खेळाडू अपयशी ठरले, त्यांच्याजागी मोठा बदल होऊ शकतो, असे आता समोर येत आहे.

पहिल्या सामन्यात रवींद्र जडेजा आणि कुलदीप यादवला एकही विकेट मिळवता आली नव्हती. हार्दिक पंड्याही बळी मिळवू शकला नव्हता. फलंदाजीमध्ये श्रेयस अय्यर हा अपयशी ठरला होता, पण आता पाकिस्तानविरुद्धच्या सामन्यासाठी भारतीय संघात गोलंदाजीत मोठा बदल होणार असल्याचे आता स्पष्ट होत आहे.

भारतीय संघात या महत्वाच्या सामन्यासाठी आता गौतम गंभीर यांच्या लाडक्या खेळाडूचा समावेश करण्यात येणार आहे. गौतम गंभीर यांचा लाडका खेळाडू आहे तो वरुण चक्रवर्ती. वरुणने इंग्लंडविरुद्धच्या मालिकेत आपली छाप पाडली होती. त्यामुळे अखेरच्या क्षणी चॅम्पियन्स ट्रॉफीमध्ये वरुण चक्रवर्तीचा समावेश करण्यात आला होता. त्यामुळे आता वरुणचा पाकिस्तानविरुद्धच्या सामन्यात समावेश होणार असल्याचे समोर येत आहे. पण वरुणला संघात स्थान देण्यासाठी कोणाला डच्चू देणार, याचा निर्णय भारतीय संघासाठी कठीण असेल. कारण रवींद्र जडेजा आणि कुलदीप यादव यांच्यापैकी एकाला भारताला संघाबाहेर करावे लागणार आहे.

वरुण चक्रवर्ती जर संघात आला तर जडेजाला संघाबाहेर करता येईल का, असा विचार सुरु होता. पण रवींद्र जडेजा हा अष्टपैलू खेळाडू आहे. त्यामुळे जडेजाला संघाबाहेर करता येणार नाही. त्यामुळे जर वरुण चक्रवर्तीला संधी द्यायची असेल तर त्यासाठी कुलदीप यादवलाच संघाबाहेर केले जाऊ शकते. त्यामुळे पाकिस्तानविरद्धच्या सामन्यात कुलदीप यादवच्या जागी वरुण चक्रवर्तीला संधी दिली जाऊ शकते.

पाकिस्तानला सरप्राइज धक्का देण्यासाठी आता भारतीय संघ हा एक मोठा बदल भारताच्या संघात करू शकते, अशी माहिती आता समोर आली आहे. त्यामुळे भारतीय संघात पाकिस्तानच्या सामन्यासाठी अजून कोणाला संधी मिळणार, याची उत्सुकता सर्वांना लागलेली असेल.

भारतीय संघ उद्या पाकिस्तानविरूद्ध चॅम्पियन्स ट्रॉफी स्पर्धेतील दुसरा सामना खेळणार आहे. दुबई आंतरराष्ट्रीय मैदानावर दुपारी २.३० वाजता कट्टर प्रतिस्पर्ध्यांचा सामना सुरू होईल. पण सामन्यापूर्वीच्या पत्रकार परिषदेत भारताचा उपकर्णधार शुभमन गिलने महत्त्वाचे अपडेट्स दिले आहेत. उद्याच्या सामन्याला भारताचा स्टार क्रिकेटपटू मूकणार आहे. भारताच्या विकेटकीपर फलंदाज पाकिस्तान सामन्यापूर्वी आजारी पडल्यामुळे तो उद्याचा सामना खेळू शकणार नाही.

पाकिस्तानविरूद्ध सामन्यापूर्वीच्या पत्रकार परिषदेत शुभमन गिलने भारत-पाकिस्तान सामन्याचा फरक पडत नसल्याचे सांगितले. गिल म्हणाला, ” भारत-पाकिस्तान सामन्याचा आम्हाला फरक पडत नाही. अंतिम सामना हा कोणत्याही स्पर्धेतील मोठा सामना असतो. आम्ही प्रत्येक सामना जिंकण्यासाठी खेळतो.’

‘त्याचबरोबर उपकर्णधारपदाचा देखील माझ्या फलंदाजीवर परिणाम होत नाही. ज्यावेळी मी फलंदाजी करतो, त्यावेळी मी एक फलंदाज म्हणून खेळत असतो. अफगाणिस्तानविरूद्ध मी समाधानकारक शतकी कामगिरी केली. तिथे दबाव नक्कीच होता, पण आम्हाला खात्री होती की आम्ही हा सामना जिंकू, कारण लक्ष्य छोटे होते.’

‘माझा प्रत्येक सामन्यात शतकी खेळी करण्याचा प्रयत्न असतो. जर मी चांगली सुरूवात केली, तर मी मोठी खेळी करण्याचा प्रयत्न करतो. कोणत्याही फलंदाजाला एकदा सेट झाल्यावर मोठी खेळी करायची असते,” गिल पुढे म्हणाला.

त्याचबरोबर गिलने भारतीय विकेटकीपर रिषभ पंत आजारी असल्याचेही पत्रकार परिषदेत सांगितले. रिषभने आजच्या सराव सत्राला देखील अनुपस्थिती दाखवली. त्यामुळे रिषभ पंत दुसऱ्या सामन्यातही प्लेईंग इलेव्हनचा भाग नसेल, हे निश्चित झाले आहे.

भारतीय संभाव्य प्लेईंग इलेव्हन

रोहित शर्मा (कर्णधार), शुभमन गिल, विराट कोहली, श्रेयस अय्यर, लोकेश राहुल, हार्दिक पांड्या, अक्षर पटेल, रवींद्र जडेजा, कुलदीप यादव, मोहम्मद शमी, हर्षित राणा.

चॅम्पियन्स ट्रॉफी २०२५ स्पर्धेत इंग्लंड आणि ऑस्ट्रेलिया संघात शनिवारी (२२ फेब्रुवारी) होत आहे. या सामन्यात इंग्लंडला शानदार सुरुवात मिळाली असून त्यांनी ऑस्ट्रेलियाविरुद्ध मोठी धावसंख्या उभारली आहे. सलामीवीर बेन डकेटने शतकी खेळी केली, त्याला जो रुटचीही चांगली साथ मिळाली.

या सामन्यात ऑस्ट्रेलियाचा कर्णधार स्टीव्ह स्मिथने नाणेफेक जिंकली आणि प्रथम गोलंदाजी करण्याचा निर्णय घेतला होता. ऑस्ट्रेलियाने गोलंदाजीची सुरुवातही चांगली केली होती. सलामीवीर फिल सॉल्टला दुसऱ्याच षटकात १० धावांवर बेन ड्वारशुईने बाद केले. त्याचा अफलातून झेल ऍलेक्स कॅरेने पकडला.

त्यानंतर ६ व्या षटकात ड्वारशुईनेच जॅमी स्मिथ यालाही कॅरेच्याच हातून झेलबाद केले. पण यानंतर सलामीवीर बेन डकेटला जो रुटची साथ मिळाली. या दोघांनी खराब चेंडूंचा समाचार घेत मोठ्या भागीदारीकडे वाटचाल केली.

त्यांनी या भागीदारी दरम्यान त्यांची अर्धशतकेही पूर्ण केली. त्यांची दीडशतकी भागीदारीही झाली. त्यामुळे इंग्लंडने ३१ षटकातच २०० धावांचा टप्पा गाठला. पण ३१ व्या षटकाच्या शेवटच्या चेंडूवर ऍडम झाम्पाने जो रुटला ६८ धावांवर पायचीत पकडले, त्यामुळे त्याची डकेट सोबतची भागीदारी तुटली.

रुट आणि डकेट यांच्यात १५८ धावांची भागीदारी झाली. चॅम्पियन्स ट्रॉफी स्पर्धेत ऑस्ट्रेलियाविरुद्ध केलेली ही दुसऱ्या क्रमांकाची सर्वोच्च भागीदारी ठरली. त्यांनी राहुल द्रविड आणि सचिन तेंडुलकरच्या विक्रमाला मागे टाकले आहे.

द्रविड आणि सचिन यांनी १९९८ सालच्या पहिल्या चॅम्पियन्स ट्रॉफीमध्ये ऑस्ट्रेलियाविरुद्ध ढाकामध्ये १४० धावांची भागीदारी केली होती. तसेच मार्कस ट्रेस्कोथिक आणि मायकल वॉन यांनीही २००४ मध्ये बर्मिंगहॅम येथे खेळताना ऑस्ट्रेलियाविरुद्ध १४० धावांची भागीदारी केली आहे.

या यादीत अव्वल क्रमांकावर ओएन मॉर्गन आणि बेन स्टोक्स आहेत. मॉर्गन आणि स्टोक्स यांनी २०१७ चॅम्पियन्स ट्रॉफीध्ये ऑस्ट्रेलियाविरुद्ध १५९ धावांची भागीदारी केली होती. त्यांना विक्रम मोडण्यासाठी डकेट आणि रुट यांना केवळ २ धावा कमी पडल्या.

डकेटचं शतक

दरम्यान, डकेटने रुट बाद झाल्यानंतर लगेचच शतक झळकावले. त्याने ९५ चेंडूत त्याचे शतक केले. हे त्याचे तिसरे वनडे शतक आहे, तर ऑस्ट्रेलियाविरुद्धचे दुसरे शतक आहे. तसेच इंग्लंडसाठी चॅम्पियन्स ट्रॉफीमध्ये शतक करणारा तो पाचवा इंग्लंडचा खेळाडू आहे.

यापूर्वी जो रुट, मार्कस ट्रेस्कोथिक, अँड्र्यू फ्लिंटॉफ आणि बेन स्टोक्स यांनी इंग्लंडसाठी चॅम्पियन्स ट्रॉफीमध्ये शतके केली आहेत.

१३३ नाबाद धावा – जो रुट – विरुद्ध बांगलादेश, २०१७

११९ धावा – मार्कस स्ट्रेस्कोथिक, विरुद्ध झिम्बाब्वे, २००२

१०४ धावा – अँड्र्यू फ्लिंटॉफ, विरुद्ध श्रीलंका, २००४

१०४ धावा – मार्कस स्ट्रेस्कोथिक, विरुद्ध वेस्ट इंडिज, २००४

१०२ नाबाद धावा – बेन स्टोक्स, विरुद्ध ऑस्ट्रेलिया, २०१७

१०० नाबाद धावा – बेन डकेट, विरुद्ध ऑस्ट्रेलिया, २०२५

काल रात्री कर्नाटक राज्यातील चित्रदुर्ग येथे महाराष्ट्र राज्य मार्ग परिवहन महामंडळाच्या चालकांना कर्तव्यावर असताना काही समाजकंटकांनी धक्काबुक्की करून काळे फासले. ही घटना अत्यंत दुर्दैवी असून त्याचा आम्ही निषेध करतो. प्रवासी आणि आमच्या कर्मचाऱ्यांची सुरक्षितता लक्षात घेऊन पुढील अनिश्चित काळासाठी कोल्हापूर विभागातून कर्नाटक राज्यात जाणाऱ्या महाराष्ट्राच्या एसटी बसेस रद्द करण्यात याव्यात, असे निर्देश राज्याचे परिवहन मंत्री प्रताप सरनाईक यांनी एस. टी. महामंडळाचे उपाध्यक्ष व व्यवस्थापकीय संचालक (प्रभारी) विवेक भीमनवार यांना दिले आहेत.

परिवहन मंत्री सरनाईक यांनी या घटनेत जखमी झालेले चालक भास्कर जाधव यांच्याशी दूरध्वनीवर बोलून त्यांना धीर दिला. तसेच या प्रकरणात तुम्ही एकटे नसून, आपले सरकार तुमच्या खंबीरपणे पाठीशी आहे.” अशी ग्वाही देखील दिली. तसेच कर्नाटक शासन या संदर्भात स्पष्ट भूमिका घेऊन जोपर्यंत आपल्या शासनाची चर्चा करत नाही तोपर्यंत त्या भागातील महाराष्ट्राच्या एसटी बसेस रद्द करण्यात येतील. असे निर्देश देखील त्यांनी एसटी महामंडळाला यावेळी दिले.

काल रात्री दि.२१/०२/२०२५ रोजी ठिक २१.१० वाजता मुंबई आगाराची बस बंगळुरू -मुंबई येत असताना (बस क्रमांक MH14 K Q 7714) ही बस चित्रदुर्ग च्या पाठीमागे दोन किलोमीटर आली असता तथाकथित कर्नाटक संघटनेचे कार्यकर्ते यांनी गाडी थांबवून बस व चालकाला काळे फासले. तसेच कर्तव्यावर असणाऱ्या चालक भास्कर जाधव यांना मारहाण देखील करण्यात आली. हे दोघेही कोल्हापूर आगारात कार्यरत आहेत.

त्यानंतर वरिष्ठांच्या सुचनेनुसार त्यांनी संबंधित पोलीस स्टेशनला जाऊन तक्रार नोंदवली आहे. आज सकाळी विभाग नियंत्रक कोल्हापूर यांनी बस व चालक – वाहक यांना सुखरूप कोल्हापूर येथे आणले. तथापि, सीमावर्ती भागातील तणाव लक्षात घेता, परिवहन मंत्री श्री ‌प्रताप सरनाईक यांच्या निर्देशानुसार महाराष्ट्र राज्य मार्ग परिवहन महामंडळाच्या बसमधून प्रवास करणारे प्रवासी आणि कर्मचाऱ्यांच्या सुरक्षिततेच्या दृष्टीने कोल्हापुरातून कर्नाटक राज्यात जाणाऱ्या एसटी बसेस रद्द करण्यात आल्या आहेत. असे एसटी महामंडळ कडून कळवण्यात आले आहे.

महाराष्ट्राच्या राजकारणात ’50 खोके एकदम ओके’ वाक्यानं जनसामान्याचं लक्ष वेधून घेतलं होतं. आता कोल्हापुरात अवतरलेला 25 खोक्यांचा ‘आमदार’ पाहण्यासाठी भीमा कृषी प्रदर्शनात तुडुंब गर्दी झाली आहे. हा आमदार म्हणजे दुसरं तिसरं कुणी नसून महाकाय रेडा आहे. पानिपतवरून थेट कोल्हापुरात अवतरलेला हा आमदार म्हणजे जगातील सर्वात मोठा रेडा होय. त्याचं नाव ऐकून तुम्हाला आश्चर्य वाटलं असेल पण खरोखरच त्याचं नाव आमदार आहे. या ‘आमदार’चं वय अवघं 4 वर्षे. वजन तब्बल दीड टन, उंची 6 फूट, लांबी 14 फूट आणि किंमत तब्बल 25 कोटी. देशात कुठेही फिरण्यासाठी एसी वाहनाची खास सोय. मुऱ्हा जातीच्या या रेड्याला महिन्याकाठी एक लाखांचा नुसता खुराकचं लागतो. भर-भक्कम शरीरयष्टी, देखणं रूप आणि 25 कोटी किंमत यामुळे हे जनावर नेमकं आहे तरी कसं हे पाहण्यासाठी कोल्हापूरकरांची अक्षरशः रीघ लागली आहे.

राज्यसभेचे खासदार धनंजय महाडिक यांच्याकडून दरवर्षी भीमा कृषी प्रदर्शनाचा आयोजन करण्यात येतं. अत्याधुनिक तंत्रज्ञान आणि नवीन विकसित झालेली बी-बियाणे तसेच पाळीव पशुपक्षी हे या प्रदर्शनाचे प्रमुख आकर्षण असतात. यंदा या कृषी प्रदर्शनात हरियाणातील पानिपतमधून नरेंद्र सिंह यांचा आमदार रेडा प्रमुख आकर्षण ठरत आहे. या रेड्याच्या देखरेखीसाठी दोघांची नियुक्ती करण्यात आली आहे.

आमदार रेड्याचा दिवसभराचा खुराक कसा असतो?

– आमदार रेड्याच्या शारीरिक मसाजसाठी एक जण तर चारा आणि देखभालीसाठी एक जण.

– आमदाराला दिवसाला 20 लिटर दूध, 20 किलोफिड आणि 30 किलोंचा चारा आणि भुसा या रेड्याचं दिवसभराचं अन्न आहे.

– दिवसभरातून तीन वेळा रेड्याला आंघोळ घातली जाते.

– वातानुकूलित कक्षातच रेड्याची देखरेख दररोज राखली जाते.

नरेंद्र सिंग यांच्याकडे आमदार आहे म्हटल्यानंतर मंत्री देखील असणारच. आमदार नावाच्या रेड्याच्या लहान भावाचं नाव त्यांनी मंत्री असं ठेवलं आहे.

खासदार धनंजय महाडिक यांच्या मातोश्रीने देखील या रेड्याची पाहणी केली. हा किती वर्षा वर्षाचा आहे, त्याचे दात किती आहेत, त्याचा खुराक काय असतो ही सगळी माहिती त्यांनी घेतली.

जगातील सर्वात महागडा आणि महाकाय रेडा म्हणून या रेड्याची ओळख आहे. सात वेळा तो वर्ल्ड चॅम्पियन झाला आहे. त्यामुळे या रेड्याला पाहण्यासाठी संपूर्ण पश्चिम महाराष्ट्रातून शेतकरी या कृषी प्रदर्शनाला भेट देत आहेत.

पिंपरी-चिचवड दि.:- डिजिटल मिडिया संपादक पत्रकार संघटना महाराष्ट्राच्या पुणे जिल्हा अध्यक्षपदी गणेश हुंबे,प.महाराष्ट्र सहसचिवपदी अजिंक्य स्वामी तर पिंपरी-चिचवड शहर अध्यक्षपदी प्रशांत साळुंखे यांची एकमताने निवड करण्यात आल्याची घोषणा संघटनेचे संस्थापक अध्यक्ष राजा माने यांनी येथे केली.

राज्य कार्यकारिणी व जिल्हा अध्यक्ष गणेश हुंबे लवकरच पुणे जिल्ह्यातील सर्व तालुकाध्यक्ष आणि जिल्हा पदाधिकाऱ्यांच्या निवडी जाहीर करणार असल्याचेही राजा माने यांनी सांगितले.पुणे जिल्हा अध्यक्ष अजिंक्य स्वामी, पिंपरी-चिंचवड शहर अध्यक्ष विकास शिंदे यांच्या उपस्थितीत संघटनेचे संस्थापक अध्यक्ष राजा माने यांच्या अध्यक्षतेखाली झालेल्या बैठकीत नव्या पदाधिकाऱ्यांच्या निवडी एकमताने करण्यात आल्या.या बैठकीला संघटनेचे राज्य सचिव महेश कुगांवकर,राज्य सहसचिव केतन महामुनी,संघटक अमोल पाटील,राज्य सरपंच परिषदेचे नेते व ज्येष्ठ पत्रकार संजयबापू जगदाळे आणि पिंपरी-चिंचवड शहरातील सदस्य या बैठकीला उपस्थित होते.

आयसीसीच्या चॅम्पियन्स ट्रॉफी स्पर्धेत आज ऑस्ट्रेलिया आणि इंग्लंड यांच्यात सामना सूरू आहे.या सामन्याच्या सूरूवातीला एक मोठी घटना घडली आहे. त्याचं झालं असं की दोन्ही संघ राष्ट्रगीतासाठी मैदानात आले असताना अचानक भारतीय राष्ट्रगीत वाजल्याची घटना घडली आहे. या घटनेचा होत आहे.

चॅम्पियन्स ट्रॉफीमध्ये आज ऑस्ट्रेलिया आणि इंग्लंड संघ आमनेसामने आले आहेत. दोन्ही संघांमधील सामना लाहोरच्या गदाफी स्टेडिअमवर खेळवला जातोय. हा सामना सुरू होण्यापूर्वी मैदानावर एक मजेशीर घटना घडली आहे. त्याचं झालं असं की ऑस्ट्रेलिया आणि इंग्लंड संघ राष्ट्रगीतासाठी आले असता भारताचे राष्ट्रगाण वाजल्याची घटना घडली आहे. टीम इंडियाचे सर्व सामने दुबईत असताना हे कसे घडले? हे जाणून घेऊयात.

खरंतर, जेव्हा ऑस्ट्रेलिया आणि इंग्लंड संघ त्यांच्या राष्ट्रगीतासाठी मैदानावर आले तेव्हा मैदान व्यवस्थापनाने ऑस्ट्रेलियन राष्ट्रगीताऐवजी भारतीय राष्ट्रगीत वाजवले. व्हिडिओमध्ये भारत भाग्य विधाता ऐकू येते. तथापि, काही सेकंदातच भारतीय राष्ट्रगीत थांबवण्यात आले आणि ऑस्ट्रेलियन राष्ट्रगीत पुन्हा वाजवण्यात आले. त्यानंतर ऑस्ट्रेलियाने शांततेत आपले राष्ट्रगीत पूर्ण केले. इथे कदाचित पीसीबीच्या एखाद्या कर्मचाऱ्याची चूक असावी ज्याने ऑस्ट्रेलियाऐवजी भारताचे राष्ट्रगीत वाजवले.

या सामन्यात ऑस्ट्रेलियाने नाणेफेक जिंकून प्रथम गोलंदाजी करण्याचा निर्णय घेतला. स्टीव्ह स्मिथच्या नेतृत्वाखाली संघ प्रथम गोलंदाजी करण्यासाठी उतरला आहे. त्याची सुरुवात चांगली झाली आहे. त्याने १०० धावांपर्यंत २ बळी घेतले आहेत.