भारतीय वाहन उद्योगासाठी 2025-26 या आर्थिक वर्षाच्या पहिल्या तिमाहीत निर्यातीच्या बाबतीत ऐतिहासिक यश मिळाले आहे. भारतीय ऑटोमोबाईल उत्पादक संघटना (SIAM) ने जाहीर केलेल्या अहवालानुसार, एप्रिल ते जून 2025 या कालावधीत एकूण 14.57 लाख युनिट्स वाहनांची निर्यात झाली असून ती मागील वर्षाच्या तुलनेत तब्बल 22.2 टक्क्यांनी वाढली आहे. मेड-इन-इंडिया वाहनांना आता आंतरराष्ट्रीय बाजारात मोठी मागणी निर्माण होत असल्याचे यावरून स्पष्ट झाले आहे.

या तिमाहीत जरी एकूण वाहन विक्रीत 5.1 टक्क्यांची घसरण झाली असली तरी निर्यातीच्या आकड्यांनी या घटेवर मात केली आहे. विशेषतः कमर्शियल वाहने, टू-व्हीलर आणि युटिलिटी वाहनांच्या निर्यातीने लक्षणीय वाढ नोंदवली आहे. कमर्शियल वाहन निर्यातीमध्ये सर्वाधिक म्हणजेच 52.8 टक्क्यांची वाढ झाली असून, 6,439 युनिट्स परदेशात पाठवण्यात आले आहेत. टू-व्हीलर निर्यातीतही 23.2 टक्क्यांनी वाढ झाली आहे. यामध्ये 11.36 लाख युनिट्सचा समावेश आहे.

प्रवासी वाहन (फोर-व्हीलर) निर्यातीमध्ये 13.2 टक्क्यांची वाढ झाली असून व्हॅन आणि युटिलिटी वाहनांच्या विक्रीत अनुक्रमे 34 टक्के आणि 26.2 टक्क्यांची वाढ नोंदवली गेली आहे. मोपेड निर्यातीत तर तब्बल 316 टक्क्यांची झपाट्याने वाढ झाली आहे.

SIAM ने म्हटले आहे की, दुसऱ्या तिमाहीसाठी उद्योगाच्या दृष्टीने संयमित आणि काळजीपूर्वक पुढे जाण्याचा अंदाज आहे. पहिल्या तिमाहीतल्या आव्हानांचा काही काळ परिणाम राहू शकतो, पण देशातील अर्थव्यवस्थेतील आणि हंगामी परिस्थितीतील काही सकारात्मक संकेत पुढील काळात सुधारणा घडवून आणू शकतात.

भारतीय वाहन उत्पादकांसाठी ही निर्यात वृद्धी निश्चितच मोठा आत्मविश्वास वाढवणारी आहे आणि ‘मेक इन इंडिया’ उपक्रमाचा जागतिक प्रभाव वाढत असल्याचे ठोस उदाहरण आहे.

काँग्रेसचे नेते आणि लोकसभेतील विरोधी पक्षनेते राहुल गांधी यांच्यावर देशभरात सुमारे दोन डझन म्हणजेच २४ हून अधिक गुन्हेगारी व मानहानीचे खटले सुरू असून त्यातील बहुतेक खटले राजकीय विधानांशी संबंधित आहेत. अलीकडेच ते लखनऊ येथील एमपी-एमएलए कोर्टात मानहानीप्रकरणी हजर राहिले होते आणि त्यांना जामिनाही मिळाला. मात्र ही फक्त एक केस नाही, तर देशभरात त्यांच्यावर सुरू असलेल्या गुन्ह्यांची ही साखळी आहे.
मुख्य मुद्दे सविस्तर:

1. भारत जोडो यात्रा व सेना मानहानी प्रकरण (लखनऊ)
तारीख: 16 डिसेंबर 2022 चा उल्लेख
विवाद: भारत-चीन सीमेवरील झटापटीचा उल्लेख करताना राहुल गांधींनी “आपल्या सैनिकांची पिटाई झाली, कोणी विचारले नाही” असे वक्तव्य केले.
स्थिती: कोर्टात हजर, जामिनावर मुक्त

2. नेशनल हेरॉल्ड मनी लॉन्ड्रिंग प्रकरण (दिल्ली)
आरोप: बनावट कंपनी Young Indian Pvt. Ltd. मार्फत ₹2,000 कोटींची संपत्ती हडप केली.
सहआरोपी: सोनिया गांधी व इतर
स्थिती: सुप्रीम कोर्टाकडून नियमित जामीन; पुढील सुनावणी 29 जुलै 2025

3. सावरकर यांच्यावरील टिप्पणी (पुणे, ठाणे, लखनऊ)
आरोप: “सावरकरांनी मुस्लीम व्यक्तीला मारल्याची मजा घेतल्याचे पुस्तकात नमूद” – अशा खोट्या विधानाचा आरोप
केस दाखल: सत्यकी सावरकर (पुणे), वंदना डोंगरे (ठाणे), अज्ञात व्यक्ती (लखनऊ)
स्थिती: प्रलंबित, विविध न्यायालयांत सुनावणी सुरू

4. मोदी सरनेम मानहानी प्रकरण (सूरत, पटणा, रांची)
मुख्य प्रकरण: 2019 मध्ये “सर्व चोरांचे आडनाव मोदी का असते?” असा सवाल कोलारमधील भाषणात
निकाल: सूरत कोर्ट – २ वर्षांची शिक्षा, लोकसभा सदस्यता रद्द; सुप्रीम कोर्टाने शिक्षा स्थगित केली.
इतर ठिकाणी: पटणा (सुशील मोदी), रांची (प्रदीप मोदी) – प्रलंबित

5. द्वैतीय नागरिकत्व प्रकरण (लखनऊ हायकोर्ट, दिल्ली HC)
आरोप: राहुल गांधी ब्रिटनचे नागरिक असल्याचा आरोप
याचिकाकर्ते: एस. विग्नेश शिशिर, सुब्रमण्यम स्वामी
स्थिती: तपास सुरू; केंद्राने माहिती युकेकडून मागवली

6. RSS विरुद्ध टिप्पणी (भिवंडी, गुवाहाटी, रांची, हरिद्वार)
केस दाखल:
भिवंडी (2014): “गांधी हत्या RSS ने केली” – राजेश कुंटे
गुवाहाटी (2016): “RSS ने मंदिरात प्रवेश नाकारला” – अंजन बोरा
रांची/हरिद्वार (2023): “RSS म्हणजे 21व्या शतकातील कौरव” – कमल भदौरिया
स्थिती: सर्व खटले प्रलंबित, काही ठिकाणी समन्स बजावले

7. राफेल व्यवहार मानहानी प्रकरण (मुंबई, गिरगाव कोर्ट)
आरोप: राफेल व्यवहारात नरेंद्र मोदी यांच्यावर भ्रष्टाचाराचा आरोप
केस दाखल: भाजप नेते महेश श्रीश्रीमल
स्थिती: न्यायप्रक्रिया सुरू

8. संसद गोंधळ प्रकरण (2024)
घटना: संसदेत अमित शाह यांच्या वक्तव्यावरून हंगामा, भाजप खासदारांशी धक्काबुक्कीचा आरोप
स्थिती: प्राथमिक चौकशी सुरू

9. कॉपीराइट उल्लंघन प्रकरण (बंगळुरू)
घटना: भारत जोडो यात्रा थीम सॉंग बनवताना कॉपीराइटचे उल्लंघन
स्थिती: FIR नोंद, तपास सुरू

इंग्लंडविरुद्धच्या पाच कसोटी सामन्यांच्या मालिकेतील तिसऱ्या सामन्यात टीम इंडियाला लॉर्ड्स येथे २२ धावांनी पराभवाचा सामना करावा लागला. या पराभवानंतर भारत पुन्हा मालिकेत पिछाडीवर गेला असून इंग्लंड २-१ अशा आघाडीवर आहे. यासोबतच वर्ल्ड टेस्ट चॅम्पियनशिप 2025-27 च्या गुणतालिकेत भारत चौथ्या स्थानावर घसरला आहे, तर इंग्लंड तिसऱ्या स्थानावर पोहोचला आहे.

या पराभवानंतर भारताचा माजी अष्टपैलू खेळाडू आणि सध्याचा समालोचक इरफान पठान याने टीम इंडियाच्या प्रमुख वेगवान गोलंदाज जसप्रीत बुमराह याच्या कामगिरीवर आणि वापरावर प्रश्नचिन्ह उपस्थित केले आहेत.

इरफान पठानने त्याच्या यूट्यूब चॅनेलवर बोलताना सांगितले की, इंग्लंडचा कर्णधार बेन स्टोक्स पाचव्या दिवशी सलग 9.2 ओव्हर्सचा स्पेल टाकतो, फलंदाजी करतो आणि क्षेत्ररक्षण करताना ऋषभ पंतसारख्या खेळाडूला रनआउट करतो, पण त्याच्या वर्कलोडबाबत कोणीच बोलत नाही.

“बेन स्टोक्सच्या गेल्या वर्षी अनेक सर्जरी झाल्या तरीही तो सातत्याने गोलंदाजी करत आहे. मग बुमराहसारख्या गोलंदाजांचा वापर इतका मर्यादित का केला जातो?”, असा सवाल पठानने उपस्थित केला.

इरफान पठान म्हणाला, “बुमराह केवळ पाच ओव्हर्स टाकतो आणि जो रूट फलंदाजीला येईपर्यंत थांबतो, हे अयोग्य आहे. आपण सामना जिंकण्यासाठी खेळत असतो, तेव्हा वर्कलोड नव्हे, तर सामना जिंकणे हेच प्राथमिक उद्दिष्ट असले पाहिजे.” लॉर्ड्स टेस्टमध्ये बुमराहने ७ विकेट्स घेतल्या असल्या, तरी त्याचा मर्यादित वापर टीम इंडियाच्या धोरणावर प्रश्न उपस्थित करतो.

पठानने इंग्लंडच्या वेगवान गोलंदाज जोफ्रा आर्चर याच्या कामगिरीचं विशेष कौतुक करताना सांगितले की, “आर्चर जवळपास चार वर्षांनंतर कसोटी सामना खेळत होता, तरीही त्याने ४० ओव्हर्स टाकल्या आणि ५ विकेट्स घेतल्या.” अशा वेळी बुमराहसारख्या प्रमुख गोलंदाजाकडून जास्त अपेक्षा असणं स्वाभाविक आहे, असंही तो म्हणाला.

इरफान पठानने बेन स्टोक्सच्या नेतृत्वशैलीचं कौतुक करताना म्हटलं की, “त्याने कठीण परिस्थितीत हिट-द-डेक गोलंदाजी करत सामना इंग्लंडच्या बाजूने वळवला. जर स्टोक्स ९ ओव्हर्स सलग टाकू शकतो, तर भारतीय खेळाडूंना मागे का राहावं लागते?”

रणबीर कपूर सध्या ‘रामायण’साठी प्रभू श्रीरामाच्या भूमिकेमुळे चर्चेत असतानाच, याआधी ते संजय लीला भन्साळींच्या भव्य चित्रपटात अभिनेता विकी कौशलसोबत थरारक टक्कर देताना दिसणार आहेत! भन्साळींच्या आगामी ‘लव अँड वॉर’ या चित्रपटात रणबीर आणि विकी यांच्यात एक जबरदस्त फेस-ऑफ सीन असेल, जो भारतीय सिनेमा इतिहासातील सर्वात मोठ्या दृश्यांपैकी एक मानला जात आहे.

सूत्रांच्या माहितीनुसार, या महत्त्वाच्या सीनची तयारी जोरात सुरू झाली असून तो एका गुप्त आणि विशाल लोकेशनवर शूट करण्यात येणार आहे. या दृश्यमालिकेला एक पूर्ण सिनेमॅटिक इव्हेंट म्हणून डिझाइन करण्यात येत आहे. भन्साळींच्या भव्य कॅनव्हासवर रणबीर आणि विकी हे दोन पॉवरहाऊस कलाकार समोरासमोर भिडणार असल्यामुळे प्रेक्षकांसाठी ही एक विस्मयकारक अनुभूती ठरणार आहे.

२० मार्च २०२६ रोजी रिलीज होणाऱ्या ‘लव अँड वॉर’ मध्ये रणबीर कपूर, आलिया भट्ट आणि विकी कौशल ही स्टार तिकडी एकत्र झळकणार आहे. यामुळे या चित्रपटाची उत्सुकता प्रेक्षकांमध्ये प्रचंड वाढली आहे.

दरम्यान, रणबीर कपूरचा ‘रामायण’ हा भव्य महाकाव्य चित्रपट सध्या चर्चेचा विषय बनला असून, त्याचं बजेट जवळपास ४००० कोटी रुपये असल्याचं निर्माते नमित मल्होत्रा यांनी नुकतंच स्पष्ट केलं. हा चित्रपट जगातील सर्वात महागड्या चित्रपटांच्या यादीत स्थान मिळवण्याच्या मार्गावर आहे.

आलिया भट्ट सध्या YRF स्पाय युनिव्हर्स मधील ‘अल्फा’ या अॅक्शनपटासाठी तयारी करत आहे, जिथे ती जोरदार अॅक्शन सीन्स करताना दिसणार आहे. तर विकी कौशलला अलीकडेच ‘छावा’ मध्ये पाहिलं गेलं, आणि आता त्यांच्या झोळीत ‘महावतार: अन एपीक सागा’ हा महत्त्वाकांक्षी प्रोजेक्ट आहे, जो भगवान परशुरामांच्या जीवनावर आधारित आहे.

‘लव अँड वॉर’ मध्ये रणबीर-विकी यांच्यातील घमासान संघर्ष पाहण्यासाठी प्रेक्षक आतुर झाले आहेत. राम होण्यापूर्वी रणबीरचा रणसंग्राम, पडद्यावर प्रेक्षकांना अचंबित करणार यात शंका नाही!

बिस्किट आणि चॉकलेटच्या डब्यांत लपवून ६.२६ किलो कोकेन देशात आणण्याचा प्रयत्न करणाऱ्या एका भारतीय महिलेला मुंबई विमानतळावर अटक करण्यात आली. या अमली पदार्थाची किंमत काळ्या बाजारात तब्बल ₹६२.६ कोटी रुपये असल्याचे अधिकाऱ्यांनी सांगितले.

राजस्व गुप्तचर संचालनालय (DRI) ने दिलेल्या माहितीनुसार, ही कारवाई सोमवारी छत्रपती शिवाजी महाराज आंतरराष्ट्रीय विमानतळावर करण्यात आली. दोहा (कतार) येथून भारतात येणाऱ्या एका भारतीय महिलेकडून मोठ्या प्रमाणात कोकेन येणार असल्याची माहिती आधीच मिळाल्यानंतर अधिकाऱ्यांनी तिच्या हालचालींवर लक्ष ठेवले होते.

महिलेच्या सामानाची कसून झडती घेतल्यावर, ६ बिस्किटांचे आणि ३ चॉकलेटचे बॉक्स सापडले. त्यामध्ये एकूण ३०० कॅप्सूल्स आढळून आले. त्यामध्ये असलेल्या पांढऱ्या पावडरचे त्वरित रासायनिक परीक्षण करण्यात आले, ज्यामध्ये ती कोकेन असल्याचे स्पष्ट झाले.

NDPS कायद्याअंतर्गत जप्ती
DRI च्या अधिकाऱ्यांनी सांगितले की, “एकूण ६,२६१ ग्रॅम कोकेन जप्त करण्यात आले असून, याची अंदाजे बाजारमूल्य ₹६२.६ कोटी आहे. ही संपूर्ण कारवाई अमली पदार्थ प्रतिबंधक कायदा (NDPS Act, 1985) अंतर्गत करण्यात आली आहे.”

संबंधित महिलेला तात्काळ अटक करण्यात आली असून, ती एकटी होती की तिच्या मागे संपूर्ण जाळं कार्यरत आहे, याचा तपास सध्या सुरू आहे.

बिस्किटात विषारी खेळ, तर डोळ्यांतून तपासणीचा वेध – DRIच्या सतर्कतेमुळे देशात घातपात टळला, पण टोळीचा माग काढणं अजूनही गरजेचं आहे.

लोकमान्य बाळ गंगाधर टिळक यांचा विचारांचा वसा पुढे नेणारे, टिळक महाराष्ट्र विद्यापीठाचे कुलगुरू आणि केसरीचे संपादक डॉ. दीपक टिळक यांचं बुधवारी पुण्यात त्यांच्या निवासस्थानी निधन झालं. ते ७४ वर्षांचे होते.

लोकमान्यांच्या तेजस्वी परंपरेचा वारसा जपत, दीपक टिळक यांनी शिक्षण, पत्रकारिता आणि सामाजिक सेवा या क्षेत्रांत प्रदीर्घ योगदान दिलं. ‘केसरी’सारख्या ऐतिहासिक वृत्तपत्राच्या माध्यमातून त्यांनी राष्ट्रनिष्ठ विचार अधिक व्यापक पसरवले.

डॉ. टिळक हे टिळक स्मारक ट्रस्टचे अध्यक्ष व विश्वस्त होते. या ट्रस्टमार्फत दरवर्षी दिला जाणारा ‘टिळक राष्ट्रीय पुरस्कार’ हा त्यांच्या नेतृत्वाखाली देशातील मान्यवर व्यक्तींच्या हाती पोहोचला. त्यांच्या कार्यकाळात ट्रस्टने समाजोपयोगी अनेक उपक्रम हाती घेतले.

त्यांचे वडील जयंतराव टिळक हे गोवा मुक्ती आंदोलन आणि संयुक्त महाराष्ट्र चळवळीचे नेतृत्व करणारे नेते होते. या परंपरेचा दीपक टिळक यांनी गौरवाने आणि जबाबदारीने वारसा म्हणून स्वीकार केला होता.

महाराष्ट्राचे उपमुख्यमंत्री अजित पवार यांनी डॉ. टिळक यांच्या निधनाबद्दल दुःख व्यक्त करताना म्हटले, “लोकमान्यांच्या विचारांची ज्योत ते अखेरपर्यंत प्रज्वलित ठेवत राहिले. दीपक टिळक यांचे जाणे म्हणजे टिळक परंपरेतील विचारवंतांचा प्रकाशदिप हरपल्यासारखं आहे.”

पुणे शहर, पत्रकारिता, शिक्षण क्षेत्र आणि राष्ट्रनिष्ठ विचारसरणी यांचं एक अविभाज्य प्रतीक आज काळाच्या पडद्याआड गेलं.

मनी लॉंडरिंगचा धागा पकडत, अंमलबजावणी संचालनालयाने (ED) पुण्यातील तब्बल २०० कोटी रुपयांच्या मूल्याची जमीन जप्त करून मोठी कारवाई केली आहे. या बेनामी संपत्तीचा संबंध छांगूर पीर नावाच्या कथित गुंतवणूकदाराशी जोडला जात असून, ही कारवाई मनी लॉंडरिंग प्रतिबंधक कायदा (PMLA) अंतर्गत करण्यात आली आहे.

सूत्रांच्या माहितीनुसार, छांगूर पीर हा एका संशयित आर्थिक घोटाळ्यात गुंतलेला असून, त्याने अनेक बोगस नावांनी आणि बनावट दस्तऐवजांच्या आधारे जमिनी विकत घेतल्या होत्या. ही संपत्ती थेट त्याच्या नावावर नसली, तरी आर्थिक व्यवहार आणि दस्ताऐवजांच्या चाचणीत त्याचा थेट संबंध उघड झाला आहे.

ईडीच्या तपासात असे स्पष्ट झाले की, खरेदी व्यवहारात स्पष्टपणे बेनामी पद्धतीचा अवलंब झाला होता. एकाहून अधिक व्यक्तींच्या नावे जमीन घेण्यात आली असून, मूळ वित्तपुरवठा छांगूर पीरकडूनच झाला होता.

जप्त करण्यात आलेल्या जमिनीचे एकत्रित बाजारमूल्य सुमारे २०० कोटी रुपये आहे. या रकमेमध्ये विविध ठिकाणांवरील शहरी व उपनगरातील भूखंडांचा समावेश असून, त्यावर व्यावसायिक प्रकल्प उभे राहण्याची शक्यता होती.

या कारवाईसंदर्भात अद्याप कोणालाही अटक करण्यात आलेली नसली, तरी छांगूर पीरविरोधात आवश्यक पुरावे एकत्र करून पुढील कायदेशीर कारवाईची तयारी सुरू असल्याचे ईडीने स्पष्ट केले आहे.

ही कारवाई केंद्र सरकारच्या देशव्यापी मोहिमेचा भाग असून, बेनामी संपत्ती, काळा पैसा आणि मनी लॉंडरिंग विरोधात ईडी सध्या अधिक आक्रमक पावले उचलत आहे. छांगूर पीर प्रकरण हे मनी लॉंडरिंग विरोधातल्या लढ्याचं आणखी एक गाजणारं उदाहरण ठरतंय.

तळेगाव स्थानकावर सिंहगड एक्सप्रेसचा थांबा देण्यासाठी गेल्या अनेक वर्षांपासून सुरू असलेला संघर्ष आता न्यायालयीन वळणावर पोहोचला आहे. पुणे प्रवासी संघ या ६६ प्रवासी गटांच्या महासंघाने थेट मुंबई उच्च न्यायालयात याचिका दाखल करून, रेल्वे प्रशासनाविरोधात कायदेशीर लढा सुरू केला आहे.

या याचिकेत केंद्र सरकार, रेल्वे मंत्रालय, रेल्वे बोर्ड आणि पुणे रेल्वे विभागातील अधिकाऱ्यांवर प्रवाशांच्या मागणीकडे सातत्याने दुर्लक्ष केल्याचा आरोप करण्यात आला आहे. अ‍ॅड. नितीश नेवशे यांच्या मार्फत दाखल करण्यात आलेल्या याचिकेत सांगण्यात आले आहे की, तळेगाव ते पुणे दरम्यान प्रवास करणाऱ्या हजारो नागरिकांच्या दैनंदिन गरजांकडे प्रशासन डोळेझाक करत आहे.

तळेगाव हे केवळ एक स्थानक नसून, औद्योगिक, शैक्षणिक, धार्मिक आणि रोजगाराच्या दृष्टीने महत्त्वाचा केंद्रबिंदू आहे. येथून हजारो विद्यार्थी, कामगार, वयोवृद्ध, महिला आणि व्यवसायिक दररोज पुणे किंवा मुंबईकडे प्रवास करतात. सिंहगड एक्सप्रेसचा थांबा मिळाल्यास या नागरिकांचे आयुष्य सुकर होईल, असा प्रवाशांचा ठाम विश्वास आहे.

याचिकेत नमूद करण्यात आले आहे की, कोरोना महामारीनंतर लोणावळा-पुणे दरम्यानची अनेक लोकल गाड्या बंद झाल्या आणि त्या अद्यापही पुन्हा सुरू झालेल्या नाहीत. त्यामुळे प्रवाशांना परवडणाऱ्या पर्यायांची कमतरता आहे. विशेषतः मासिक पासधारकांना एक्सप्रेस गाड्यांमध्ये प्रवेश नाकारला जातो, ही बाब अन्यायकारक असल्याचं संघाचं म्हणणं आहे.

तळेगावमध्ये दोन MIDC, शिक्षण संस्थांचा मोठा क्लस्टर, प्रस्तावित विमानतळाचा कॉरिडॉर आणि भीमाशंकर, आळंदी, देहू यांसारख्या धार्मिक स्थळांकडे जाणाऱ्या भाविकांची वर्दळ आहे. त्या पार्श्वभूमीवर सिंहगड एक्सप्रेसचा थांबा ही केवळ मागणी नसून, गरज आहे, असं याचिकादारांचं म्हणणं आहे.

मुंबई उच्च न्यायालयाच्या न्यायमूर्ती रेवती मोहिते देरे आणि डॉ. नीला गोखले यांच्या खंडपीठाने या याचिकेची दखल घेत, रेल्वे प्रशासनाला नोटीस बजावली आहे.

“हजारो प्रवाशांचा आवाज आता न्यायालयाच्या दालनात पोहोचला आहे. आता रेल्वे येथे थांबते का, आणखी काही वेगळं होणार… पण प्रवाशांचा संघर्ष अजूनही सुरूच आहे.”

ब्रेमेन चौकाजवळील एमएसईडीसीएलच्या पॉवर रूममध्ये आढळले होते बेशुद्ध अवस्थेत

महाराष्ट्र राज्य वीज वितरण कंपनी लिमिटेडच्या (MSEDCL) पॉवर रूममध्ये दोन तरुणांचा संशयास्पदरीत्या शॉक लागून मृत्यू झाल्याची धक्कादायक घटना सोमवारी सकाळी उघडकीस आली. औंध येथील ब्रेमेन चौकाजवळ असलेल्या पॉवर कक्षात ही घटना घडली. दोघांनाही तातडीने रुग्णालयात नेण्यात आले, मात्र डॉक्टरांनी दाखल करण्यापूर्वीच मृत घोषित केले.

या घटनेत मृत्यू झालेल्यांची ओळख विनोद चिंतामण क्षीरसागर (वय २९, रा. कस्तुरबा गांधी वसाहत, औंध) आणि सौरभ विजय निखळजे (वय २७, रा. कोथरूड) अशी झाली आहे. या प्रकरणी चतु:श्रृंगी पोलीस ठाण्यात आकस्मिक मृत्यूची नोंद करण्यात आली आहे.

पोलीस सूत्रांच्या माहितीनुसार, विनोद हा रिक्षा चालक होता, तर सौरभ एका खासगी कंपनीत नोकरी करत होता. रविवारी संध्याकाळी साडेपाचच्या सुमारास विनोद रिक्षा घेऊन घरातून निघाला, पण घरी परतला नाही. रात्री साडेनऊच्या सुमारास त्याच्याशी संपर्क होऊ शकला नाही. त्यामुळे त्याची आई लीलाताई क्षीरसागर यांनी चतु:श्रृंगी पोलीस ठाण्यात तक्रार दाखल केली.

एमएसईडीसीएलचे पॉवर कक्ष हे ब्रेमेन चौकातील सार्वजनिक शौचालयाशेजारी आहे. सोमवारी सकाळी स्थानिक रहिवाशांना पॉवर कॅबिनमध्ये दोन व्यक्ती बेशुद्ध अवस्थेत दिसल्याने त्यांनी तात्काळ पोलिसांना माहिती दिली. पोलिसांनी घटनास्थळी धाव घेत एमएसईडीसीएलच्या कर्मचाऱ्यांच्या मदतीने वीज पुरवठा खंडित केला आणि दोघांना उपचारासाठी औंध रुग्णालयात हलवले. मात्र त्याआधीच डॉक्टरांनी त्यांना मृत घोषित केलं.

दोघांचाही मृत्यू नक्की कशामुळे झाला याबाबत स्पष्टता नसली, तरी वीज प्रवाह लागून मृत्यू झाल्याचा प्राथमिक संशय पोलिसांनी व्यक्त केला आहे. दोघांमध्ये काय संबंध होता आणि त्यांनी वीज कंपनीच्या बंदिस्त क्षेत्रात प्रवेश का केला, याचा तपास सुरू आहे.

या प्रकरणाचा तपास चतु:श्रृंगी पोलीस करत असून, वरिष्ठ पोलीस निरीक्षक उल्हास कदम यांनी ही आकस्मिक मृत्यूची नोंद असून सर्व शक्यता तपासल्या जात असल्याची माहिती दिली.