बारामती भारतीय जनता पक्षाचे अपूर्ण स्वप्न या भागामध्ये विजय मिळवण्यासाठी गेली कित्येक वर्ष अतोनात प्रयत्न करणाऱ्या भारतीय जनता पक्षाने बारामतीत सध्या सुरू असलेल्या सोमेश्वर सहकारी साखर कारखान्याच्या निवडणुकीमध्ये तिहेरी लढत करण्याची अजब चाल खेळली आहे; परंतु मित्र पक्ष असलेल्या शिवसेनेच्या बापूंनी भारतीय जनता पक्षाला प्राधान्य न देता थेट उपमुख्यमंत्री सुनिता वहिनी पवार यांच्याबरोबर जाण्याला पसंती दिल्याने सध्या निवडणूक रंगत वळणावर आलेली आहे. भारतीय जनता पक्षात नव्याने आलेल्या माजी आमदारांच्या हातामध्ये विजयी गुलाल मिळवण्याचा संग्राम दिला असून यामध्ये भारतीय जनता पक्षाला कितपत यश येते ते आगामी काळात पहावे लागेल. पुणे भाजपच्या ‘मिशन बारामती’ मोहिमेला आतापर्यंत यश आले नसले तरी बारामतीत जिंकायचे असेल, तर दिवंगत उपमुख्यमंत्री अजित पवार यांच्या नावाशिवाय पर्याय नसल्याचे भाजपने बारामतीतील सोमेश्वर सहकारी साखर कारखान्याच्या निवडणुकीत पॅनेलला अजित पवार यांचेच नाव दिले आहे.
‘राष्ट्रवादी’त फूट पाडून बंडखोर गटाचा पाठिंबा घेत भाजपप्रणित ‘लोकनेते अजितदादा सोमेश्वर विकास पॅनेल’ निवडणुकीच्या रिंगणात उतरविण्याची खेळी भाजपने खेळल्याचे स्पष्ट झाले आहे. बारामतीकर या खेळीला साथ देणार का, याबाबत उत्सुकता असणार आहे. बारामतीत महायुतीतील मित्रपक्षांमध्येच उघडपणे लढत झाल्यास त्याचे पडसाद राज्यात उमटण्याची शक्यता असल्याने भाजपने खबरदारी घेतली. आहे. ‘राष्ट्रवादी’त फूट पाडायची आणि भाजपच्या नावाने पॅनेल उभे करण्याऐवजी अजित पवार यांच्या नावाने पॅनेल तयार करून निवडणूक लढविण्याची व्यूहरचना भाजपने आखली.
या मोहिमेची जबाबदारी पुरंदरचे माजी आमदार संजय जगताप यांच्यावर सोपविण्यात आली. कारखान्याचे विद्यमान अध्यक्ष पुरुषाेत्तम जगताप यांच्याशी संधान साधून ‘राष्ट्रवादी’त फूट पाडण्याची मोहीम फत्ते करण्यात आली. त्यानंतर भाजप आणि बंडखोर यांचे २१ उमेदवारांचे पॅनेल निश्चित करण्यात आले. या पॅनेलचे नेतृत्त्व संजय जगताप यांच्याकडे देण्याऐवजी बंडखोरी केलेले पुरुषोत्तम जगताप यांच्याकडेच देऊन भाजपने पडद्यामागून सूत्रे हलविण्याची खबरदारीही घेतली आहे. बारामतीत भाजपच्या पॅनेलच्या नावाने मतदारांकडे मते मागितल्यास सकारात्मक प्रतिसाद मिळण्याची शक्यता कमी असल्याने भाजपने अजित पवार यांच्या नावानेच पॅनेल तयार केले आहे. आता भाजपप्रणित ‘लोकनेते अजितदादा सोमेश्वर विकास पॅनेल’असणार आहे. या पॅनेलला मतदार किती साथ देणार, याबाबत उत्सुकता असणार आहे.
‘राष्ट्रवादी’चेही अजित पवारांच्या नावाने पॅनेल
राष्ट्रवादी काँग्रेस (अजित पवार) पक्षानेही दिवंगत उपमुख्यमंत्री अजित पवार यांच्या नावाने या कारखान्याच्या निवडणुकीसाठी ‘श्री सोमेश्वर विकासपुरुष अजितदादा पवार पॅनेल’ तयार केले आहे. या पक्षाकडून युवा नेते जय पवार यांच्या नेतृत्त्वाखाली निवडणूक लढविली जाणार आहे. पुरंदरचे शिवसेना (शिंदे) पक्षाचे आमदार विजय शिवतारे यांनी ‘राष्ट्रवादी’ला पाठिंबा दिला आहे. या कारखान्याचे कार्यक्षेत्र बारामतीसह, पुरंदर आणि फलटण हे तालुके आहेत. शिवसेनेच्या पाठिंब्यामुळे ‘राष्ट्रवादी’ची ताकद वाढली आहे. तसेच शेतकरी कृती समितीचे सतीश काकडे यांनीही ‘राष्ट्रवादी’ला पाठिंबा दिला आहे. या तिन्ही पक्षांनी एकत्र येऊन पॅनेलमध्ये उमेदवार उभे केले आहेत. भाजपप्रणित पॅनेलपुढे या पॅनेलचे आव्हान असणार आहे.
राष्ट्रवादी काँग्रेस (शरद पवार) पक्षाचे ‘सोमेश्वर शेतकरी विकास पॅनेल’
राष्ट्रवादी काँग्रेस (अजित पवार) पक्षात फूट पडली असताना, राष्ट्रवादी काँग्रेस (शरद पवार) पक्षानेही ‘सोमेश्वर शेतकरी विकास पॅनेल’ उभे करून निवडणूक लढविण्याचा निर्णय घेतला आहे. युवा नेते युगेंद्र पवार यांच्या नेतृत्त्वाखाली निवडणूक लढविण्यात येणार आहे. ‘सोमेश्वर शेतकरी विकास पॅनेल’ सर्व २१ जागा लढवणार आहे. बारामतीतील माळेगाव सहकारी साखर कारखान्याची निवडणूकही युगेंद्र पवार यांच्या नेतृत्त्वाखाली राष्ट्रवादी काँग्रेस (शरद पवार) पक्षाने लढविली होती. त्यामध्ये त्यांना अपयश आले होते. आता सोमेश्वर कारखान्याच्या निवडणुकीतील युगेंद्र पवार यांच्या नेतृत्त्वाचा कस लागणार आहे.
