पुणे शहरात सध्या सुरू असलेल्या बावधन कीर्तन सोहळ्यात अक्रुर महाराज साखरे यांनी संत तुकाराम महाराजांच्या तुकाराम गाथेतील ‘आपुलिया हिता जो असे जागता। धन्य माता पिता तयाचिया’ तून श्रावणबाळ महंतीतून ‘उत्तम पुत्र’ ची विवेचन करण्यात आले. सुप्रसिद्ध गायक पंढरीनाथमहाराज आरु, कुंदन महाराज बोरसे आळंदी यांच्या सुमधुर आवाजात – 
“आपुलिया हिता जो असे जागता । धन्य माता पिता तयाचिया ॥ कुळीं कन्यापुत्र होतीं जीं सात्त्विक। तयाचा हरिख वाटे देवा ॥ गीता भागवत करिती श्रवण । आणीक चिंतन विठोबाचें ॥”या ओळींचा संदर्भ देत महाराजांनी संततीच्या आचरणातून आई-वडिलांचे खरे भाग्य ठरते, असे स्पष्ट केले. रंगलेल्या या कीर्तनात सात्त्विक, भक्तिमय आणि सदाचारी संततीबाबत कबीर दोहे, कृष्ण राधा, संतश्रेष्ठ ज्ञानेश्वर महाराज यांच्या जीवनगाथेसह असंख्य उदाहरणातून व्यक्त केले. यावेळी नगरसेवक दिलीप वेडेपाटील, व्यंकोजी खोपडे, विलास वेडेपाटील, रमेश वेडेपाटील, डॉ.दीपक वेडेपाटील, राजेंद्र वेडेपाटील, नंदकुमार फणसे, पल्लवीताई वाल्हेकर, पल्लवीताईं जगताप, नगरसेविका पिंपरी चिंचवड, बाळासाहेब चांदेरे, सायलीताई देशमुख, सरपंच सुभाष कुटे, निलेश थोरात यांच्यासह मान्यवर उपस्थित होते.
कीर्तनातून बोलताना अक्रूर महाराज साखरे यांनी केवळ धार्मिक ग्रंथांचे श्रवण करून न थांबता, त्यातील विचार प्रत्यक्ष जीवनात उतरविण्याचे आवाहन केले. आई-वडिलांची सेवा हीच खरी ईश्वरसेवा असून, आपल्या पालकांच्या सुख-दुःखाची जाणीव ठेवणारी संततीच खऱ्या अर्थाने सात्त्विक असते, असा संदेश त्यांनी दिला.
“आपुलिया हिता जो असे जागता धन्य माता पिता तयाचिया” मधून जो मनुष्य आपल्या खऱ्या हिताचा विचार करून जागरूकपणे सदाचार, भक्ती आणि चांगल्या मार्गाने जीवन जगतो, त्याचे आई-वडील धन्य आहेत. येथे ‘हित’ म्हणजे केवळ सांसारिक सुख नव्हे, तर आत्मिक कल्याण आणि ईश्वरप्राप्तीचा मार्ग असल्याचे सांगितले तर “कुळी कन्या पुत्र होती जे सात्विक
तयाचा हरिक वाटे देवा” मधून ज्या कुळामध्ये सद्गुणी, सात्त्विक, संस्कारी मुलगा किंवा मुलगी जन्माला येते, त्या संततीमुळे त्या कुटुंबाचे जीवन पवित्र होते. अशा संततीचा जन्म हा देवाच्या कृपेचे फल असल्याची भावना व्यक्त केली.
“गीता भागवत करीती श्रवण” तून भगवद्गीता आणि श्रीमद्भागवताचे श्रवण म्हणजे केवळ धार्मिक ग्रंथ ऐकणे नव्हे. त्यातील विचार जीवनात उतरवणे महत्त्वाचे आहे. गीता कर्म, कर्तव्य, आत्मसंयम आणि निष्काम भाव शिकवते, तर भागवत भक्ती, नामस्मरण आणि ईश्वराशी प्रेमभाव शिकवते असे सांगत “अखंड चिंतन विठोबाचे” मधून वारकरी संप्रदायाच्या दृष्टीने जीवनाचे अंतिम ध्येय विठ्ठलनाम, भक्ती आणि सतत ईश्वरस्मरण हे आहे. संसारातील कर्तव्ये पार पाडतानाही मनाने विठ्ठलाचे चिंतन करावे, असा अभंगाचा संदेश आहे.संत तुकाराम महाराजांनी पालकत्व, संस्कार, संतती आणि भक्ती यांचा अतिशय सुंदर संबंध मांडल्याचेही अक्रुर महाराज साखरे यांनी सांगितले.
श्रावणबाळाचा आदर्श आजही तितकाच महत्त्वाचा
आजच्या धावपळीच्या जीवनात वृद्ध आई-वडिलांकडे दुर्लक्ष होण्याचे प्रमाण वाढत असल्याची खंत व्यक्त करताना त्यांनी श्रावणबाळाच्या मातृ-पितृभक्तीचा आदर्श नव्या पिढीसमोर ठेवण्याची गरज अधोरेखित केली. आई-वडिलांची सेवा करण्यासाठी वेळ देणे, त्यांची मनापासून काळजी घेणे आणि त्यांच्या भावनांचा आदर करणे हीच खरी संस्कृती असल्याचे त्यांनी सांगितले .“संतती मोठी झाली म्हणून पालक धन्य होत नाहीत; तर संतती सद्गुणी, सात्त्विक, भक्तिमान आणि समाजोपयोगी झाली, तर त्या पालकांचे जीवन धन्य झाले”, हा या रचनेचा गाभा आयोजक बापू दगडे यांनी सार्थकी लावल्याचे सांगितले.
संस्कारक्षम पिढी घडविण्याचे आवाहन
गीता, भागवत आणि संत साहित्याचे नियमित श्रवण केल्याने मनाला दिशा मिळते. मात्र या ग्रंथातील शिकवण कुटुंबातील वागणुकीत, पालकांच्या सेवेत आणि समाजाप्रतीच्या जबाबदारीत दिसली पाहिजे, असेही अक्रूर महाराज साखरे यांनी स्पष्ट केले. बावधनमधील या कीर्तन सोहळ्याला भाविकांचा उत्स्फूर्त प्रतिसाद मिळाला. भक्ती, संस्कार आणि मातृ-पितृसेवेचा संदेश देणाऱ्या या कीर्तनामुळे उपस्थितांमध्ये आत्मचिंतनाची भावना निर्माण झाली. कै. ज्ञानोबा बाबुराव दगडेपाटील मुकादम यांच्या द्वितीय पुण्यस्मरणानिमित्त या भव्य कीर्तन सोहळ्याचे आयोजन श्री बापूसाहेब ज्ञानोबा दगडेपाटील (मुकादम) यांच्या वतीने करण्यात आले होते.
