महाराष्ट्र लोकसेवा आयोगाच्या परीक्षांमधील पेपरफुटी प्रकरण, रखडलेल्या भरत्या आणि विविध गैरकारभाराविरोधात पुण्यात स्पर्धा परीक्षेच्या विद्यार्थ्यांचे तीव्र आंदोलन सुरू आहे.अशातच यातील काही आंदोलनकर्त्यांनी आज राष्ट्रवादीचेसर्वेसर्वा शरद पवारांची भेट घेतली. दरम्यान मुख्यमंत्री देवेंद्र फडणवीस यांनी एमपीएससी विद्यार्थ्यांशी संवाद साधावा, त्यांच्या मागण्यांचा विचार करावा, विद्यार्थ्यांना न्याय देण्याची सरकारची नैतिक जबाबदारी आहे, अशी भूमिका मांडली. दुसरीकडे याच मुद्दयांवर बोट ठेवत केंद्रीय राज्यमंत्री मुरलीधर मोहोळ यांनी भाष्य करत आयोगाच्या अध्यक्षाचा राजीनामा हा विद्यार्थ्यांचे भविष्य होऊ शकत नाही, रोहित पवारांनी विद्यार्थ्यांच्या भविष्याचा विचार करावा. तसेच विद्यार्थ्यांचा राजकीय वापर करू नका असा सल्लाही त्यांनी दिला आहे.
राष्ट्रपतीकडे आयोगाच्या प्रमुखांच्या राजीनामाबाबत निर्णय घेतात
या विद्यार्थ्यांशी मी बोलत होतो. लोकशाही मार्गाने आंदोलन करण्याचा त्यांना आणि प्रत्येकाला अधिकार आहे. विद्यार्थी त्यांच्या मागण्या मांडत आहेत. एकच विद्यार्थ्यांच्या शिष्टमंडळाला मुख्यमंत्री यांनी भेट दिली. रोहित पवार यांनी पाठवलेल्या शिष्टमंडळाला मुख्यमंत्र्यांनी वेळ दिला, चर्चा केली. अध्यक्ष यांच्या राजीनाम्याबाबत मुख्यमंत्री यांनी शिष्टमंडळाला सांगितलं, अध्यक्ष यांचा राजीनामाबाबत राष्ट्रपती निर्णय घेत असतात. त्याबाबत तीन महिन्यांचा वेळ मागून घेतला. तर परीक्षा ऑफलाईन की ऑनलाईन? याबाबत विद्यार्थ्यांना विश्वासात घेऊन निर्णय घेणार. मात्र विद्यार्थ्यांना त्रास होईल, अशी प्रक्रिया नसणार असल्याचा विश्वास केंद्रीय राज्यमंत्री मुरलीधर मोहोळ यांनी विद्यार्थ्यांना दिल्याचे ते म्हणाले.
विद्यार्थ्यांच्या आडून राजकारण कुणी करतंय का?
विद्यार्थ्यांना विश्वासात घेऊन सरकार निर्णय घेणार आहे. रोहित पवारांनी पाठवलेल्या शिष्टमंडळाने आम्ही समाधानी असल्याचं सांगितलं, तसं लिहून दिलं. मग आंदोलन कशासाठी आणि कुणासाठी होतंय हा प्रश्न पुणेकरांना आणि विद्यार्थ्यांना पडलाय. मुख्यमंत्री संवेदशील आहेत. त्यांच्या भावनाचा आम्ही विचार करतोय. पण विद्यार्थ्यांच्या आडून राजकारण कुणी करतंय का? त्याठिकाणी सर्व राजकारणी आलेत, सर्व मुख्यमंत्री आणि मोदींवर टीका करतायत. हे काँग्रेसचे अधिवेशन आहे की काय? असं वाटतय, कारण आंदोलन स्थळी काँग्रेस नेते येत आहेत. आयोगाच्या अध्यक्षाचा राजीनामा हा विद्यार्थ्यांचे भविष्य होऊ शकत नाही. रोहित पवारांनी विद्यार्थ्यांच्या भविष्याचा विचार करावा, विद्यार्थ्यांचा राजकीय वापर करू नका. त्यांनी आंदोलन स्थगित करावं. असेही केंद्रीय राज्यमंत्री मुरलीधर मोहोळ म्हणाले.
एमपीएससी आंदोलनाला काँग्रेसच्या अधिवेशनाचे स्वरूप!
या आंदोलनाला काँग्रेसच्या अधिवेशनाचे स्वरूप आले असून, सकाळपासून संध्याकाळपर्यंत केवळ राजकीय नेते तिथे येऊन भाषणे ठोकत आहेत. विद्यार्थीशक्तीचा वापर करून कोणी आपली राजकीय पोळी भाजत आहे का, याचा विचार विद्यार्थी आणि त्यांच्या पालकांनी करण्याची वेळ आली आहे, याकडे त्यांनी लक्ष वेधले. स्पर्धा परीक्षेचे विद्यार्थी ग्रामीण भागातून व सामान्य परिस्थितीतून आलेले आहेत. त्यांच्या कष्टाचा सन्मान करत सरकारने सर्व मागण्या मान्य केल्याने, विद्यार्थ्यांनी आपल्या भविष्याचा विचार करून आंदोलन मागे घ्यावे, असे आवाहन मोहोळ यांनी केले.
