रुग्णालयातील कथित अनियमिततेवर कारवाई न करण्यासाठी तसेच रुग्णालयाचे रजिस्ट्रेशन रद्द करण्याबाबतचा अहवाल वरिष्ठांकडे पाठवू नये, यासाठी तब्बल २० लाख रुपयांची लाच मागितल्याच्या आरोपावरून पुणे महापालिकेच्या क्षेत्रीय वैद्यकीय अधिकाऱ्याला ५० हजार रुपयांची लाच स्वीकारताना लाचलुचपत प्रतिबंधक विभागाने (ACB) रंगेहाथ पकडले.
डॉ. ज्ञानेश्वर शिवराम चकोर (वय ५०), क्षेत्रीय वैद्यकीय अधिकारी, वर्ग-२, नगर रोड क्षेत्रीय कार्यालय, पुणे महापालिका, असे एसीबीच्या जाळ्यात अडकलेल्या अधिकाऱ्याचे नाव आहे. एसीबीच्या पुणे पथकाने २६ सप्टेंबर २०२६ रोजी धानोरीतील भैरवनगर परिसरातील संबंधित रुग्णालयात सापळा रचून ही कारवाई केली.
तक्रारदाराच्या रुग्णालयातील कामकाजाबाबत नगर रोड क्षेत्रीय कार्यालयात तक्रार अर्ज प्राप्त झाला होता. या तक्रारीची चौकशी डॉ. चकोर यांच्याकडे होती. १८ सप्टेंबर रोजी त्यांनी रुग्णालयाची पाहणी केली. त्यावेळी आढळलेल्या त्रुटी दूर न केल्यास रुग्णालयाचे रजिस्ट्रेशन रद्द करण्यासाठी वरिष्ठांकडे अहवाल पाठविण्यात येईल, असे सांगितल्याचा आरोप आहे. हा अहवाल वरिष्ठांकडे पाठवू नये आणि पुढील कारवाई टाळावी, यासाठी २० लाख रुपयांची मागणी केल्याचा आरोप तक्रारदाराने केला आहे.
त्यानंतर तक्रारदाराने २१ सप्टेंबर रोजी पुणे लाचलुचपत प्रतिबंधक विभागाकडे तक्रार दाखल केली. तक्रारीच्या अनुषंगाने २४ सप्टेंबर रोजी पडताळणी करण्यात आली. या पडताळणीत डॉ. चकोर यांनी स्वतःसाठी तसेच ‘साहेबांसाठी’ ५० हजार रुपयांची मागणी केल्याचे निष्पन्न झाल्याची माहिती एसीबीने दिली.
त्यानुसार २६ सप्टेंबर रोजी धानोरीतील भैरवनगर येथील रुग्णालयात एसीबीच्या पथकाने सापळा रचला. तक्रारदाराच्या केबिनमध्ये ५० हजार रुपयांची लाच स्वीकारताना डॉ. चकोर यांना रंगेहाथ पकडण्यात आले. या प्रकरणी भ्रष्टाचार प्रतिबंधक कायदा, १९८८ अंतर्गत विश्रांतवाडी पोलीस ठाण्यात गुन्हा दाखल करण्याची प्रक्रिया सुरू असून पुढील तपास एसीबीकडून केला जात आहे.
ही कारवाई पोलीस अधीक्षक शिरीष सरदेशपांडे, अपर पोलीस अधीक्षक अजित पाटील यांच्या मार्गदर्शनाखाली पोलीस उपअधीक्षक निता मिसाळ, सतीश वाळके आणि एसीबीच्या पथकाने केली.
