केंद्रीय निवडणूक आयोगात फूट पडल्याचं वृत्त समोर आल्यानंतर देशभरात मोठी खळबळ उडाली आहे. मुख्य निवडणूक आयुक्त ज्ञानेश कुमार यांनी विरोध डावलून आणि मनमानीपणे काही निर्णय घेतल्याची बातमी द इंडियन एक्सप्रेसने दिली आणि त्यानंतर देशभरातून ज्ञानेश कुमार यांच्यावर टीकेची झोड उठली आहे. ज्ञानेश कुमार यांच्या राजीनाम्याची मागणी विरोधकांनी केली आहे. या पार्श्वभूमीवर सीजेपीचे संस्थापक अभिजीत दिपके यांनी थेट देशव्यापी आंदोलनाचा इशारा दिला आहे.
या सर्व घडामोडी दरम्यान आता आणखी एक मोठी बातमी समोर आली आहे. मुख्य निवडणूक आयुक्त ज्ञानेश कुमार यांचे उत्तर प्रदेशातील मेरठ आणि वाराणसी येथील दौरे पुढे ढकलण्यात आले आहेत. निवडणूक आयोगातील वरिष्ठ सूत्रांनी दिलेल्या माहितीनुसार, हा निर्णय २१ सप्टेंबर रोजी घेण्यात आला. मात्र, ज्ञानेश कुमार यांचा हा दौरा पुढे ढकलण्याशी सध्या सुरू असलेल्या मतभेदांच्या चर्चेच्या वादाशी कोणताही संबंध नसल्याचं स्पष्टीकरण निवडणूक आयोगाकडून देण्यात आलं आहे. सूत्रांच्या माहितीनुसार, उत्तर प्रदेशातील या दोन्ही शहरांमधील जिल्हा प्रशासनाला ईमेलद्वारे याबाबत कळवण्यात आलं होतं. प्रशासकीय व स्थानिक कारणं तसेच मुख्य निवडणूक आयुक्तांच्या अधिकृत कार्यक्रमांमधील बदलांमुळे हे दौरे पुढे ढकलण्यात आल्याचं स्पष्टीकरण देण्यात आलं आहे. या संदर्भातील वृत्त इंडिया टुडेनी दिलं आहे.
वृत्तानुसार, आयोगाच्या सूत्रांनी सांगितलं की, हिमाचल प्रदेश, उत्तराखंड आणि लडाख येथील दौरेही पुढे ढकलण्यात आले होते. पर्यटनाचा हंगाम आणि परीक्षांमुळे हिमाचल प्रदेशातील कार्यक्रम स्थगित करण्यात आला होता. तसेच उत्तराखंडमधील तरुणांशी संवाद साधण्याचा कार्यक्रम एसआयआर प्रक्रिया पूर्ण झाल्यानंतर आयोजित केला जाईल, तर मानसरोवर येथील दुर्घटनेनंतर लडाखमधील कार्यक्रम पुढे ढकलण्यात आला होता.
अभिजीत दिपकेंचा मुख्य निवडणूक आयुक्तांना अल्टिमेटम
अभिजीत दिपके यांनी एक्सवर (ट्विटर) सविस्तर पोस्ट शेअर करत ज्ञानेश कुमार यांना आणखी एक अल्टिमेटम दिला आहे. मुख्य निवडणूक आयुक्त ज्ञानेश कुमार यांनी शनिवारपर्यंत राजीनामा न दिल्यास २ ऑक्टोबरपासून मुंबईतून आंदोलनाची सुरूवात करण्यात येईल, असा इशारा दिपके यांनी शुक्रवारी दिला. “जर ज्ञानेश कुमार यांनी शनिवारपर्यंत (२६ सप्टेंबर) राजीनामा दिला नाही, तर सीजेपी २ ऑक्टोबर रोजी मुंबईतून देशव्यापी आंदोलन सुरू करेल आणि ते आंदोलन भारतातील विविध शहरांत देखील केलं जाईल”, असं अभिजीत दिपके यांनी म्हटलं आहे.
