मुंबई मध्ये सार्वजनिक गणेशोत्सवाची मोठी धूम असते. यामध्येही लालबाग, परळ भागात सार्वजनिक गणेशोत्सव मोठ्या चैतन्यमय वातावरणामध्ये साजरा केला जातो. मुंबईत अनेक गणेशभक्तांना लालबागच्या राजाच्या दर्शनाची ओढ असते. चिंचोळ्या गल्लीत विराजमान लालबागच्या दर्शनाला दरवर्षी लाखो भाविक तासनतास रांगेत उभे असतात. यंदा बाप्पाची प्राणप्रतिष्ठा 14 सप्टेंबरच्या पहाटे होणार आहे. तत्पूर्वी मंडळाने आज लालबागच्या राजाचं प्रथम दर्शन सोहळा आहे. यामध्ये राजाच्या यंदाच्या रूपाची झलक दाखवण्यात आली आहे. लालबागचा राजा 14 सप्टेंबर पासून भाविकांच्या सेवेमध्ये रूजू होणार आहे. यंदा बाप्पा 10 ऐवजी 12 दिवस आले असल्याने 25 सप्टेंबर पर्यंत बाप्पाचं दर्शन खुलं असेल. लालबागच्या राजाला गर्दी पाहता विसर्जनाच्या तयारी साठी अनंत चतुर्दशीच्या एक दिवस आधी बाप्पाचं दर्शन भाविकांना बंद केले जाते.
लालबागच्या राजाला कसं याल?
लालबागचा राजा हा मुंबईतील लालबाग मार्केट भागात विराजमान होतो. तेथे पोहचण्याचा लोकल रेल्वे हा सर्वात सोप्पा मार्ग आहे.
लोकल ट्रेनने कसे पोहचाल?
लालबागच्या राजाला येण्याचा सर्वात सोयीचा पर्याय म्हणजे मध्य रेल्वेच्या परळ किंवा करी रोड स्थानकावर उतरणे. दोन्ही स्थानकांपासून मंडप साधारण १०-१५ मिनिटांच्या चालण्याच्या अंतरावर आहे.पश्चिम रेल्वेने जायचे असल्यास लोअर परळ स्थानकावर उतरून टॅक्सीने येता येईल. लालबाग, परळ, दादर टीटी या भागांतून अनेक बेस्ट बस थांबे जवळ आहेत. रस्ते मार्गाने येताना वाहतूकीमधील बदल आणि ट्राफिक याचा विचार करून येण्याचं आवाहन केले जाते.
मुख दर्शनासाठी सकाळी लवकर किंवा रात्री उशिरा गेल्यास रांग तुलनेने कमी असते. मंडळाकडून दरवर्षी अधिकृत वेबसाइट आणि सोशल मीडियावर दर्शनाच्या वेळा व रांगेचे नियोजन जाहीर केले जाते, ते आधी तपासून जाणे उपयुक्त ठरते. लालबागचा राजा मंडळाची स्थापना 1934 साली झाली असून, दरवर्षी गणेशोत्सवाच्या काही दिवस आधी मूर्तीचा प्रथम दर्शन सोहळा आयोजित केला जातो. देशभरातून लाखो भाविक या पहिल्या दर्शनासाठी मुंबईत दाखल होतात. काही भाविक मुख दर्शन रांगेतून, तर काही चरण दर्शन घेऊन आशीर्वाद घेतात.
