संघटन सृजन अभियानांतर्गत निवड झालेल्या राज्यातील काँग्रेसच्या ७८ नवनियुक्त जिल्हाध्यक्षांच्या निवासी प्रशिक्षण शिबिराचा समारोप बुधवारी लोकसभेतील विरोधी पक्षनेते राहुल गांधी यांच्या विशेष मार्गदर्शनाने होणार आहे. राहुल गांधी साडेचार तास शिबिरस्थळी उपस्थित राहणार आहेत. या दहा दिवसीय शिबिरात सर्व जिल्हाध्यक्षांना दिल्लीहून आलेल्या खास प्रशिक्षकाकडून जपानी मार्शल आर्ट्सचे प्रशिक्षण देण्यात आले. या खेळात आधीपासूनच पारंगत असलेले राहुल गांधी नवनियुक्त जिल्हाध्यक्षांसोबत मार्शल आर्ट्सचा सामना रंगवणार असल्याची माहिती आहे.
काँग्रेसचे संघटन सक्षम, प्रभावी आणि जनतेशी थेट जोडणारे करण्याच्या उद्देशाने गंगापूर धरण येथील एमटीडीसी रिसॉर्टमध्ये हे निवासी प्रशिक्षण शिबिर सुरू आहे. काँग्रेसचे प्रदेशाध्यक्ष हर्षवर्धन सपकाळ यांच्यासह राज्यातील ७८ नवनियुक्त जिल्हाध्यक्ष शिबिरात सहभागी झाले आहेत. त्यात चार महिलांचाही समावेश आहे. अखिल भारतीय काँग्रेस कमिटीच्या प्रशिक्षण विभागाच्या नेतृत्वाखाली आयोजित या शिबिरात प्रशिक्षणार्थींना सैद्धांतिक, मानसिक आणि शारीरिक प्रशिक्षणासह रागावर नियंत्रण मिळवण्याचे धडे देण्यात आले.
या शिबिराचे वैशिष्ट्य म्हणजे प्रशिक्षणार्थींना देण्यात आलेले शारीरिक प्रशिक्षण.
सर्व प्रशिक्षणार्थींना दररोज सकाळी पावणेसात वाजता मैदानावर उपस्थित राहावे लागत असे. सकाळी सात वाजता ध्वजवंदन झाल्यानंतर प्रशिक्षणार्थी सभागृहात पोहोचत असत. राहुल गांधी यांचे प्रशिक्षक ‘अरुण’ यांनी प्रशिक्षणार्थींना शारीरिक प्रशिक्षण दिले. ध्यानधारणेने प्रशिक्षणाची सुरुवात होत असे. सभागृहात विस्तीर्ण मॅटची व्यवस्था करण्यात आली असून, त्यावर प्रशिक्षणार्थींकडून जपानी मार्शल आर्ट्स या अहिंसक युद्धकलेचे प्रशिक्षण आणि शारीरिक कौशल्याचा सराव करून घेण्यात आला.
या प्रशिक्षणादरम्यान केवळ शारीरिक कसरतींवर भर न देता शरीरासोबत मन शांत ठेवणे, आत्मनियंत्रण राखणे आणि रागावर नियंत्रण कसे मिळवायचे, याचेही धडे देण्यात आले. काँग्रेसचे शहराध्यक्ष निलेश (बबलू) खैरे यांनी ही माहिती दिली.
साडेचार तास शिबिरात उपस्थिती
लोकसभेतील विरोधी पक्षनेते राहुल गांधी बुधवारी शिबिराच्या समारोप कार्यक्रमासाठी नाशिकमध्ये दाखल होणार आहेत. सकाळी ११ वाजता त्यांचे शिबिरस्थळी आगमन होईल. वरिष्ठ नेत्यांशी चर्चा केल्यानंतर ते जिल्हाध्यक्षांशी संवाद साधतील. साडेचार ते पाच तास ते शिबिरात उपस्थित राहणार आहेत. या काळात सभागृहातील मॅटवर राहुल गांधी आणि नवनियुक्त जिल्हाध्यक्ष यांच्यात जपानी मार्शल आर्ट्सचा सामना रंगणार असल्याची माहिती वरिष्ठ सूत्रांनी दिली. राहुल गांधी यांनी आयकिडो आणि जिऊ-जित्सूसारख्या मार्शल आर्ट्सचा सराव आपल्या दिनचर्येचा भाग केला आहे. पारंपरिक जपानी, पकड आधारित आत्मसंरक्षण कलांवर त्यांचा भर असल्याचे यापूर्वीही समोर आले आहे. राहुल गांधी यांचे दिल्लीतील प्रशिक्षक अरुण यांनीच महाराष्ट्रातील नवनियुक्त जिल्हाध्यक्षांना प्रशिक्षण दिले. त्यामुळे राहुल गांधी आणि महाराष्ट्रातील जिल्हाध्यक्ष यांच्यातील मार्शल आर्ट्सच्या सामन्याबाबत प्रशिक्षणार्थींमध्ये उत्सुकता आहे.
