कोथरूड : कोथरूडमधील वाढते अपघात आणि चांदणी चौकशी वाहतूक कोंडी सोडवण्यासाठी सुमारे 1000 कोटी रुपये खर्च करून चांदणी चौकात उड्डाणपुले अन् नागमोडी वळणे बांधण्यात आली परंतु स्थानिक नागरिक व लोकप्रतिनिधी यांच्या अनुभवाच्या सूचनाला तंत्रज्ञानाच्या नावाने वाटण्याचा अक्षदा लावल्यामुळे पुन्हा स्थानिक लोकांना ‘मनस्ताप’सहन करण्याशिवाय कोणताही पर्याय राहिला नाही. चांदणी चौकातील घाईच्या कामांमध्ये वरिष्ठ पातळीवरून लक्ष दिल्यामुळे संबंधित अधिकाऱ्यांनी स्थानिक नागरिकांच्या मूळ मूलभूत सूचनांना वाटण्याच्या अक्षदा लावण्याला प्राधान्य दिले केंद्रीय मंत्री नितीन गडकरी तत्कालीन मुख्यमंत्री एकनाथ शिंदे उपमुख्यमंत्री अजित पवार या ग्लॅमर नेतृत्वाबरोबरच चर्चा करण्यास प्राधान्य दिल्यामुळे या भागातील पावसाच्या पाण्याचा निचरा अन्य रस्त्यांची कनेक्टिव्हिटी आणि उतार करताना दिशाहीन नियोजन केल्यामुळे आज चांदणी चौक एक फसलेला प्रयोग! अशी चर्चा सुरू झाली आहे तर वरून डोंगरावरून भले मोठे पाण्याचे लोट भुसारी कॉलनीतील सोसायटीमध्ये घुसत असल्याने स्थानिक नागरिकांना मनस्ताप करण्याशिवाय कोणताही पर्याय राहिला नाही.

चांदणी चौक चे थाटामाटात उद्घाटन झाल्यानंतरही चांदणी चौकातील अपघाताचे सत्र सुरूच आहे. राष्ट्रीय महामार्ग प्राधिकरण आपली ‘हट्टवादी’ भूमिका सोडत नाही पुणे महापालिका जबाबदारी घेण्यास तयार नाही त्यामुळे ही अपघाताची मालिका बंद होण्याचे नाव घेत नाही. चांदणी चौकाकडून कोथरूडच्या दिशेने जाताना एका (पुणे महापालिकेतील सन्माननीय सदस्य)विशेष व्यावसायिकाला या नव्याने सुरू करण्यात आलेल्या रस्त्याचा थेट संपर्क व्हावा यासाठी सेवा रस्त्याची उंची नियमापेक्षा जास्त ठेवून ‘निष्ठता’ पाळण्यात अधिकाऱ्यांनी धन्यता मारल्यामुळे आज वाहतूक कोंडी आणि सततच्या अपघातांचा सामना स्थानिक नागरिकांना करावा लागत आहे.

चांदणी चौकाच्या उड्डाणपूलाचे भूमिपूजन २०१७ मध्ये झाले होते. दोन- तीन वर्षात काम पूर्ण होणे अपेक्षित होते. परंतु आता सहा वर्षांनी आगामी २५ वर्षांचा विचार करून चांदणी चौक 6 वर्षांनी १२ ऑगस्ट रोजी उद्घाटन करताना उड्डाणपुलाचा आराखडा ‘आयआयटी’ मुंबईकडून तयार करून घेतला आहे. तज्ज्ञ संस्थांकडून तपासून घेतला. पुढच्या २५ वर्षांचा विचार करून हा आराखडा तयार करण्यात आला आहे असे भूमिपूजन प्रसंगी गडकरी यांनी सांगितले होते. परंतु उद्घाटनानंतर या भव्यदिव्य आराखड्याच्या समस्या स्थानिक नागरिकांना जाणू लागल्या. पुलाच्या कामासाठी सुमारे २७ हेक्‍टर जागेचे संपादन करावे लागले या प्रकल्पामुळे ११६ कुटुंबे बाधित झाली त्यांचे पुनर्वसन केले.

तीव्र उत्तरामुळे मान्सूनपूर्व पावसातच गाड्या घसरण्याच्या प्रकारामध्ये सुरुवात झाली आहे. पावसाळी पाणी जाण्यासाठी कुठलीही कनेक्टिव्हिटी नसल्यामुळे रस्त्यावरून पाण्याचे लोट आणि गुडघाभर पाण्यातून सर्वसामान्य नागरिकांना प्रवास करावा लागत आहे. या प्रकल्पातील मुख्य चूक म्हणजे बावधनकडून  वारजे ‘सेवा रस्ता’ खंडित झाल्यामुळे या भागातील वाहतुकीचा पूर्ण बोजवारा उडला आहे. मुख्य पौड रस्ता व नव्याने बांधण्यात आलेल्या चांदणी चौक पुलाखाली वाहतूक कोंडीचा नित्य सामना करावा लागत आहे. याबरोबरच पादचारी मार्ग बनवतानाही कोणताही मार्मिक विचार न घेता फक्त सोयीस्करित्या व्यवसायिकांना फायदा देण्याचे हेतूनेच पादचारी मार्गाचे नियोजन करण्यात आले आहे.

सक्तवसुली संचालनालय (ईडी) हे सर्व मर्यादा ओलांडत असून त्यामुळे सुशासनाच्या संघराज्य संकल्पनेचे उल्लंघन होत असल्याचे निरीक्षण नोंदवितानाच सर्वोच्च न्यायालयाने मनी लाँड्रिंगप्रकरणी तमिळनाडूसरकार विरोधात सुरू असलेल्या चौकशीला आज स्थगिती दिली. मद्य दुकानांच्या परवान्यांचे वाटप करताना राज्य विपणन निगमकडून मोठ्या प्रमाणावर भ्रष्टाचार झाल्याचा आरोप करण्यात आला होता. तमिळनाडूत मद्यालय परवान्यांचे वाटप करण्याची जबाबदारी या निगमकडे (टासमॅक) सोपविण्यात आली आहे.

न्यायालयाने तमिळनाडू सरकार आणि ‘टासमॅक’यांनी दाखल केलेल्या याचिकेवर सुनावणी करताना ‘ईडी’ला नोटीस बजावली आहे. सरन्यायाधीश भूषण गवई आणि न्या. ऑगस्टीन जॉर्ज मसीह यांच्या पीठासमोर याप्रकरणी सुनावणी पार पडली. अतिरिक्त सॉलिसिटर जनरल एस.व्ही. राजू यांनी तपास संस्थेच्यावतीने युक्तिवाद केला. मनी लाँड्रिंग प्रतिबंधक कायद्याचा ‘ईडी’कडून वारंवार (पीएमएलए) गैरवापर होत असल्याचे ताशेरे न्यायालयाच्या विविध खंडपीठांनी ओढले असल्याकडेही सरन्यायाधीशांनी लक्ष वेधले. विरोधी पक्षांनी देखील या कायद्यातील तरतुदींचा गैरवापर होत असल्याचा आरोप केला असल्याचे सरन्यायाधीश म्हणाले. तमिळनाडू सरकार आणि ‘टासमॅक’च्यावतीने ज्येष्ठ विधिज्ञ कपिल सिब्बल आणि अमित आनंद तिवारी यांनी युक्तिवाद केला. तपास संस्थेचे वकील राजू यांनी मात्र हा गैरव्यवहार तब्बल एक हजार कोटी रुपयांचा असून तपास संस्थेने कोठेही मर्यादा ओलांडली नसल्याचे म्हटले आहे. मध्यंतरी तपास संस्थेकडून ‘टासमॅक’च्या कार्यालयांवर छापेही घालण्यात आले होते, तुम्ही कोणत्या अधिकारात ही कारवाई केली अशी विचारणा न्यायालयाकडून ‘ईडी’ला करण्यात आली.

हायकोर्टाकडून दिलासा नाहीच

सक्तवसुली संचालनालयाच्या (ईडी) छाप्यांच्या कारवाईला आक्षेप घेत राज्य सरकारने मद्रास उच्च न्यायालयात याचिका दाखल केली होती. मात्र त्याठिकाणी सरकारला दिलासा मिळाला नव्हता. यावर सरकारने सर्वोच्च न्यायालयात दाद मागितली होती. मद्याची वाहतूक, बार परवाने देणे यात मोठा गैरव्यवहार झाल्याचा संशय ‘ईडी’ला आहे. मद्य निर्मात्या कंपन्यांसोबत संधान साधून कोट्यवधी रुपये हडप केले जात असल्याचेही तपास संस्थेचे म्हणणे आहे. लोकांविरोधात तुम्ही गुन्हे नोंदवू शकता. पण महामंडळाविरोधात कशासाठी गुन्हा नोंदविण्यात आला ? अशी विचारणा करत सरन्यायाधीश गवई यांनी ‘ईडी’च्या कारवाईला स्थगिती दिली. दरम्यान राजकीय बदला घेण्याच्या हेतूने महामंडळावर कारवाई केली जात असल्याचा आरोप तमिळनाडूतील ‘द्रमुक’ सरकारकडून करण्यात आला होता.

पुणे शहरात गेल्या चार दिवसांपासून सुरू असलेल्या मॉन्सूनपूर्व पावसाचा जोर गुरुवारी (ता. २२) काहीसा ओसरला असला, तरी पुढील दोन दिवस शहराला ‘ऑरेंज अलर्ट’ देण्यात आला आहे. भारतीय हवामानशास्त्र विभागाने दिलेल्या माहितीनुसार, शुक्रवार (ता.२३) आणि शनिवारी (ता. २४) पुणे शहर आणि जिल्ह्यात मेघगर्जना, विजांचा कडकडाट आणि वादळी वाऱ्यासह मुसळधार पाऊस पडण्याची शक्यता आहे.

गेल्या चार दिवसांपासून पुण्याला मॉन्सूनपूर्व पावसाने झोडपून काढले आहे. मंगळवारी शिवाजीनगर परिसरात ४०.५ मिमी पावसाची नोंद झाली, तर बुधवारी राष्ट्रीय संरक्षण प्रबोधिनी (एनडीए) परिसरात १०३ मिमी पाऊस झाला. पावसामुळे अनेक रस्त्यांना नद्यांचे स्वरूप आले होते. झाडे उन्मळून पडली, फलक कोसळले आणि दुचाकींचे मोठे नुकसान झाले.

पाणी साचल्यामुळे नागरिकांना मोठा मनस्ताप सहन करावा लागला. दरम्यान, गुरुवारी पावसाने थोडी उसंत घेतल्याने शहराला काहीसा दिलासा मिळाला. कमाल तापमानातही किंचित घट होऊन ते ३१ अंश सेल्सिअसवर आले, तर किमान तापमान २२.६ अंश सेल्सिअस नोंदवले गेले. पुढील दोन दिवसांसाठी ‘ऑरेंज अलर्ट’ असल्याने नागरिकांनी सतर्क राहावे आणि आवश्यक ती खबरदारी घ्यावी, असे आवाहन प्रशासनाने केले.

पुणे आणि परिसरात शुक्रवार (ता. २३) आणि शनिवारी (ता. २४) कमाल तापमान अनुक्रमे ३१ आणि ३२ अंश सेल्सिअस, तर किमान तापमान २२ अंश सेल्सिअस नोंदविण्यात येणार आहे. आकाश अंशतः ढगाळ राहील आणि मेघगर्जना, विजांचा कडकडाट आणि ताशी ४० ते ५० किलोमीटर वेगाने वादळी वाऱ्यासह मध्यम ते जोरदार स्वरूपाचा पाऊस पडण्याची शक्यता आहे.

रविवारी (ता. २५) आकाश अंशतः ढगाळ राहून मेघगर्जना, विजांचा कडकडाट आणि ताशी ३० ते ४० किलोमीटर वेगाने वादळी वाऱ्यासह हलक्या ते मध्यम स्वरूपाचा पाऊस पडण्याची शक्यता हवामानशास्त्र विभागाने वर्तवली आहे.

पुण्यातील मुळशी तालुक्यातील वैष्णवी हगवणे यांच्या मृत्यू प्रकरणात फरार असलेले राजेंद्र हगवणे आणि सुशील हगवणे यांना अखेर अटक झाली आहे. या प्रकरणात वैष्णवीचा पती शंशाक, सासू लता आणि नणंद करिश्मा यांना यापूर्वीच अटक झाली होती. वैष्णवीचे वडील आनंद कस्पटे यांनी मुलीच्या मृत्यूप्रकरणात पोलिसांकडे फिर्याद दिली होती. त्यानंतर १७ मे रोजी गुन्हा दाखल झाला होता.

असा रचला सापळा

वैष्णवी हिचे लव्ह मॅरेज होते. घरच्या मंडळीचा विरोध असताना तिच्या हट्टामुळे शंशाकसोबत लग्न लावून दिले. लग्नात ५१ तोळे सोने, फॉर्च्यूनर गाडी आणि इतर अनेक गृहउपयोगी वस्तू दिल्या होत्या. त्यानंतरही तिचा हुंड्यासाठी छळ होत होता, असे वैष्णवीचे वडील आनंद कस्पटे यांनी म्हटले. या प्रकरणात १७ मे रोजी गुन्हा दाखल झाल्यानंतर तिघांना अटक झाली होती. परंतु सासरा राजेंद्र हगवणे आणि दीर सुशील हगवणे हे फरार होते. गुरुवारी मावळ तालुक्यातील तळेगाव येथे एका हॉटेलमधील सीसीटीव्हीमध्ये ते दिसले. राजेंद्र हगवणे मित्रांसोबत हॉटेलमध्ये जेवण करत होते. त्यानंतर काही अंतरावर असलेल्या रस्त्यावरुन सुशील निघून गेला. पोलिसांना ही माहिती समजाल्यानंतर पोलिसांनी नाकाबंदी सुरु केली. संपूर्ण परिसरात झडती घेतली. अखेर शुक्रवारी सकाळी ५.३० वाजता पिंपरी चिंचवड पोलिसांनी अटक केली आहे.

पोलिसांनी वाढवली होती पथके

पोलिसांनी दोन दिवसांत वेगाने तपास सुरु केला. उपमुख्यमंत्री अजित पवार यांनी गुरुवारी बारामती येथील सभेतच राजेंद्र हगवणे आणि सुशील हगवणे यांना अटक होईल, असे सांगितले होते. त्यासाठी पोलिसांची पथके वाढवल्याचे अजित पवार यांनी म्हटले होते. दरम्यान, वैष्णवीचे काका मोहन कस्पटे यांनी दोघांना अटक केल्याबद्दल पोलिसांचे आभार मानले आहे. उशीर झाला, पण आता आमच्या मुलीस न्याय मिळावा. या लोकांना मोक्का लावून, फाशी दिली पाहिजे, अशी मागणी मोहन कस्पटे यांनी केली आहे. हगवणे कुटुंबातील मोठी सुन मयुरी हिनेही गुरुवारी तिचा छळ झाल्याची माहिती दिली होती.

निलेश चव्हाणवर गुन्हा दाखल-

कस्पटे कुटुंबीयांच्या तक्रारीवरुन निलेश चव्हाणच्या विरोधात पुण्यातील वारजे पोलीस ठाण्यात गुन्हा दाखल करण्यात आला आहे. कस्पटे कुटुंबीयांना धमकावल्याबद्दल आणि पिस्तुलाच्या सहाय्याने दहशत निर्माण केल्याबद्दल हा गुन्हा दाखल करण्यात आला आहे. 20 मे रोजी वैश्नवीच्या माहेरचे लोक तीच्या नऊ महिन्यांच्या बाळाला घेण्यासाठी कर्वे नगर भागातील निलेश चव्हाणच्या घरी गेले असता निलेश चव्हाणने त्यांना पिस्तुलाचा धाक दाखवून हीसकाऊन लावले होते‌ . कस्पटे कुटुंबीयांनी बाळाचा ताबा मागीतल्यावर तो देण्यास त्याने नकार दिला होता. वैश्नवीचे काका मनोज कस्पटे यांनी निलेश चव्हाण विरोधात वारजे पोलीसांकडे बाळाला बेकायदेशीर डांबून ठेवल्याची तक्रार दीली. मात्र पोलीसांनी धमकावल्याच्या आरोपाखाली निलेश चव्हाण विरोधात गुन्हा दाखल केलाय. निलेश चव्हाण हा वैनवीचा नवरा शशांक आणि वैश्नवीची नणंद करिश्मा हगवणेचा मित्र आहे.

नेमकं प्रकरण काय?

संपूर्ण राज्याला हादरवणाऱ्या वैष्णवी हगवणे आत्महत्या प्रकऱणी पोलिसांनी अखेर सासरा राजेंद्र हगवणेला अटक केलीय. त्याचसोबत वैष्णवीचा दीर सुशीललाही अटक झालीय. वैष्णवीने सासरच्या छळाला कंटाळून आत्महत्या केल्यावर सात दिवसांपासून राजेंद्र आणि सुशील मोकाट होते. पोलीस त्यांचा शोध घेत होते. अखेर आज पहाटे साडेचारच्या सुमाराला या दोघांना बावधन पोलिसांनी अटक केलीय. वैष्णवीचा नवरा शशांक, नणंद करिश्मा आणि सासू लता हगवणे यांनाही आधीच अटक झालीय. वैष्णवी हगवणे हिने शुक्रवारी (16 मे) राहत्या घरात गळफास घेतला. वैष्णवी यांचे वडील आनंद कस्पटे यांनी दिलेल्या फिर्यादीनुसार, वैष्णवीच्या लग्नात 51 तोळे सोने, फॉर्च्यूनर गाडी, चांदीची भांडी देण्यात आली. त्यानंतर लग्नाच्या दुसऱ्या दिवसापासून शशांक व तिचे सासू-सासरे यांनी घरातील किरकोळ कामाच्या वादातून तिच्याबरोबर भांडण सुरू केले. तिच्या चारित्र्यावरून बोलणं वैष्णवीला सासऱ्याच्या लोकांनी शारीरिक व मानसिक त्रास देणं चालू केलं होतं. पती, सासू-सासरे, नणंद, दीर यांनी हुंड्यासाठी मानसिक छळ करून कुर वागणूक दिली. पोस्ट मार्टममध्ये वैष्णवीच्या अंगावर मारहाणीचे व्रण आढळले होते.

पुणे: दिनांक ०७/०८/२०२० रोजी विश्रांतवाडी पोलिस ठाण्याच्या हद्दीत कस्तुरबा सोसायटीमध्ये ७ किलो गांजा विक्रीसाठी बाळगल्याच्या प्रकरणात पुणे सत्र न्यायालयाने दोघा आरोपींना निर्दोष मुक्त केले आहे. हा निकाल मा. जिल्हा व सत्र न्यायाधीश आर. एन. हिवसे यांनी अमली पदार्थ विरोधी कायद्यांतर्गत दिला.

गुन्हे शाखेच्या अमली पदार्थ विरोधी पथकाने ७ किलो गांजा बाळगल्याच्या संशयावरून दोन आरोपी आणि दोन अल्पवयीन मुलांना अटक केली होती. मुख्य आरोपी रोहित प्रकाश लंके व त्याचे वडील प्रकाश लंके यांना गांजा विक्रीसाठी प्रवृत्त केल्याच्या आरोपाखाली ताब्यात घेण्यात आले होते.

येरवडा कारागृहात असताना आरोपींनी पुणे जिल्हा विधी सेवा प्राधिकरणाकडे वकिलांसाठी अर्ज केला होता. सचिव सोनल पाटील यांच्या मार्गदर्शनाखाली उप मुख्य लोकभिरक्षक अँड. मयूर दोडके आणि नासीर शेख यांची नियुक्ती करण्यात आली.

सरकार पक्षाने या प्रकरणात एकूण ८ साक्षीदार तपासले. अंतिम युक्तिवादाच्या वेळी, अँड. मयूर दोडके यांनी तपास प्रक्रियेतील त्रुटींवर प्रश्न उपस्थित केले. एनडीपीएस कायद्याच्या तरतुदींचे पालन न झाल्याचे आणि जप्ती पंचनाम्यात विश्रांतवाडी पोलिस ठाण्याचे नेहमीचे पंच वापरण्यात आल्याने पुराव्याची विश्वासार्हता धोक्यात आल्याचे त्यांनी नमूद केले.

साक्षीदारांच्या जबाबातील विसंगती, तपासातील त्रुटी आणि ठोस पुराव्याचा अभाव या सर्व बाबींचा विचार करून न्यायालयाने दोन्ही आरोपींना निर्दोष मुक्त करण्याचा निर्णय दिला.