जेवढे उपाय गरजेचे तेवढेच करा ‘माशी मारण्यासाठी आपण हातोडा वापरू शकत नाही’; सर्वोच्च न्यायालयाने सुनावले

नवी दिल्ली – माशी मारण्यासाठी हातोडा वापरू शकत नाही असे सर्वोच्च न्यायालयाने सुनावले आहे. कॉकरोच जनता पार्टीतर्फे (सीजेपी) १० ऑक्टोबर रोजी जंतरमंतर येथे होणाऱ्या आंदोलनाच्या पार्श्वभूमीवर ५७ मेट्रो स्थानके बंद करणे, नवी दिल्ली व हजरत निजामुद्दीन रेल्वे स्थानकांकडे येणाऱ्या गाड्या रद्द करण्याच्या निर्णयाबाबत सर्वोच्च न्यायालयाने तीव्र चिंता व्यक्त केली. वाहतूक साधनांवर अशा प्रकारे संपूर्ण बंदी घालता येणार नाही, असेही न्यायालयाने स्पष्ट केले.

शुक्रवारी रात्री ९ वाजल्यापासून पुढील आदेश येईपर्यंत ही मेट्रो स्थानके पूर्णपणे बंद ठेवणे आणि रेल्वेगाड्या रद्द करणे या निर्णयाबाबत सरन्यायाधीश सूर्य कांत, न्या. जॉयमाल्या बागची, न्या. व्ही. मोहना यांच्या खंडपीठाने तीव्र नाराजी व्यक्त केली. या खटल्यात केंद्र सरकारची बाजू सॉलिसिटर जनरल तुषार मेहता यांना मांडली. मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी कॉक्रोच जनता पार्टी (सीजेपी) आणि विरोधी पक्षांनी जाहीर केलेल्या आंदोलनापूर्वी दिल्लीकडे येणाऱ्या रेल्वेगाड्या आणि राजधानीतील मेट्रो सेवा स्थगित करण्याच्या निर्णयाला आव्हान देणाऱ्या याचिकेवर सर्वोच्च न्यायालय सुनावणी घेत होते.

‘… लोकांनी आंदोलन सुरु ठेवावे’ नेत्यांना अटक झाली तरी लोकांनी आंदोलन सुरू ठेवावे असे आवाहन ऑल इंडिया स्टुडंट्स असोसिएशनच्या अध्यक्ष नेहा बोरा यांनी शुक्रवारी केले. पत्रकारितेची स्वतःची भूमिका आहे; ती गुंडाळली जाऊ नये, असे दिल्ली पोलिसांनी म्हटले आहे. काही आंदोलक एक दिवस पत्रकार म्हणून येतात आणि दुसऱ्या दिवशी आंदोलनात सहभागी होतात, त्यावर पोलिसांनी टिप्पणी केली.

‘आंदोलनांसाठी पर्यायी ठिकाणाचा विचार करा’ दिल्लीत शांततापूर्ण आंदोलने करण्यासाठी जंतरमंतरऐवजी पर्यायी ठिकाण निश्चित करण्याबाबत विचार करण्याचे निर्देश सर्वोच्च न्यायालयाने शुक्रवारी सरकारला दिले. सर्वोच्च न्यायालयाने आंदोलकांसाठी मूलभूत सुविधा उपलब्ध असलेल्या ठिकाणाची आवश्यकता अधोरेखित केली. सरकारने जंतरमंतर ऐवजी अन्य ठिकाण निश्चित करण्याबाबत सक्षम प्राधिकरण विचार करेल, असे न्यायालयाला सांगितले होते.

‘जेवढे गरजेचे आहेत तेवढेच उपाय अमलात आणा’ न्यायालयाने सरकारला, काही गोष्टी रोखणे आवश्यक आहे. त्यासाठी जेवढे उपाय गरजेचे आहेत, तेवढेच करा. मात्र, याचा अर्थ माशी मारण्यासाठी हातोडा वापरावा असा होत नाही. हे तत्त्व लक्षात ठेवले पाहिजे असे सांगितले.