महाराष्ट्र विधान परिषदेच्या आगामी निवडणुकीसाठी महायुतीतील जागावाटपाचा तिढा अखेर सुटला आहे. प्रतिष्ठेच्या पुणे शिक्षक मतदारसंघावर भाजप, शिवसेना आणि राष्ट्रवादी काँग्रेसमध्ये सुरू असलेल्या रस्सीखेचीनंतर ही जागा भाजपच्या वाट्याला गेली आहे.त्यामुळे पुणे शिक्षक मतदारसंघातून भाजपचा उमेदवार निवडणूक लढवणार असल्याचे स्पष्ट झाले आहे.
महायुतीतील जागावाटपानुसार पुणे शिक्षक, पुणे पदवीधर आणि नागपूर पदवीधर या तीन जागा भाजपकडे राहणार आहेत. अमरावती शिक्षक मतदारसंघ शिवसेना (शिंदे गट), तर छत्रपती संभाजीनगर शिक्षक मतदारसंघ राष्ट्रवादी काँग्रेस (अजित पवार गट) लढवणार आहे.
भाजपकडून १५ नावांची यादी
पुणे शिक्षक मतदारसंघ भाजपच्या वाट्याला येताच पक्षातील उमेदवारीच्या हालचालींना वेग आला आहे. भाजप प्रदेशाध्यक्ष रवींद्र चव्हाण यांनी पक्षाचे राष्ट्रीय अध्यक्ष नितीन नवीन यांची भेट घेऊन तीन मतदारसंघांसाठी संभाव्य उमेदवारांची यादी सादर केल्याची माहिती आहे. भाजपने प्रत्येक मतदारसंघासाठी पाच संभाव्य उमेदवारांची नावे दिली असून, तीन जागांसाठी एकूण १५ नावांचा समावेश आहे. केंद्रीय नेतृत्वाकडून या नावांवर चर्चा करून अंतिम उमेदवार निश्चित केला जाणार आहे.
मित्रपक्षांतील इच्छुकांची समजूत काढणार
पुणे शिक्षक मतदारसंघावर शिवसेना आणि राष्ट्रवादी काँग्रेसमधील काही इच्छुकांनी दावा केला होता. मात्र, जागा भाजपकडे गेल्याने या इच्छुकांची नाराजी दूर करण्यासाठी महायुतीच्या वरिष्ठ नेत्यांकडून चर्चा केली जाणार असल्याचे सांगण्यात येत आहे.
महाविकास आघाडीतही पेच
दरम्यान, पदवीधर आणि शिक्षक मतदारसंघांच्या निवडणुकीसाठी काँग्रेसने तीन उमेदवारांची नावे जाहीर केली आहेत. काँग्रेसने मित्रपक्षांशी अंतिम चर्चा होण्यापूर्वी उमेदवार जाहीर केल्याने महाविकास आघाडीत नाराजी असल्याची माहिती आहे. शनिवारी आघाडीची बैठक झाली; मात्र जागावाटपावर अंतिम तोडगा निघाला नसल्याचे सूत्रांनी सांगितले आहे.
