पुणे (प्रतिनिधी) – राज्य लोकसेवा आयोगाच्या अध्यक्ष व सचिवांचा औषधं निरीक्षक परीक्षेतील गैरप्रकाराच्या पार्श्वभूमीवर राजीनामा द्यावा यांसह विविध मागण्यांसाठी पुण्यात एमपीएससी परीक्षार्थी विद्यार्थ्यांच्या सुरू असलेल्या आंदोलनास आज माजी मंत्री आ. धनंजय मुंडे यांनी भेट देऊन पाठिंबा दिला.
आयोगाच्या अध्यक्ष व सचिवांचा राजीनामा तसेच परीक्षा पद्धतीत विविध सुधारणा करून कालबद्ध कार्यक्रम आखणे, वार्षिक कॅलेंडर तयार करून त्याचे अनुसरण करणे, वर्णनात्मक परीक्षा पद्धतीत अभ्यासासाठी पुरेसा वेळ देणे, ऑफलाईन पद्धतीने परीक्षा घेणे, यांसह विविध न्याय्य मागण्यांच्या अनुषंगाने आपण राज्याचे मुख्यमंत्री देवेंद्र फडणवीस यांच्याशी फोनवरून चर्चा केली असून, पुढील आठवड्यात विद्यार्थी प्रतिनिधींच्या शिष्टमंडळाला घेऊन मुंबई येथे मुख्यमंत्री महोदयांची भेट घेऊन सदर बैठकीत सकारात्मक निर्णय घेण्यासाठी आपण प्रयत्न व पाठपुरावा करणार असल्याचे धनंजय मुंडे यांनी यावेळी विद्यार्थ्यांशी संवाद साधताना म्हटले आहे.
परीक्षा व अन्य प्रक्रियेचे वार्षिक कॅलेंडर तयार केले जावे तसेच पेपरफुटी सारख्या गंभीर प्रकरणांमध्ये गुन्हेगारांना कठोर शिक्षा व्हावी, यासाठी आगामी अधिवेशनात विशेष कायदा आणला जावा, याबाबतही आपण या बैठकीत चर्चा करणार असल्याचे धनंजय मुंडे पुढे बोलताना म्हणाले.
दरम्यान विद्यार्थ्यांच्या पाठीशी आपण उभे असून या आंदोलनाच्या माध्यमातून नक्कीच न्याय मिळेल असा विश्वास त्यांनी व्यक्त केला यावेळी ओबीसी आंदोलक ॲड. मंगेश ससाणे, विद्यार्थी आंदोलक अरविंद वालेकर, मनोज पिंगळे, राम कदम, अनिल देवकाते, नितीन आंधळे, धुळदेव टेळे यांसह हजारो विद्यार्थी आंदोलक उपस्थित होते.
