पुण्यातील खराडी-शिवणे रस्त्याचे काम रखडले; पथविभागाचे अजूनही कागदी घोडेच प्रस्ताव पाठवला आणि बैठका सुरू

0

गेल्या १५ वर्षांहून अधिक काळापासून पश्‍चिम आणि पूर्व पुण्याला जोडणाऱ्या खराडी-शिवणे रस्त्याचे काम रखडले आहे. या रस्त्याच्या भूसंपादनात प्रचंड अडथळे आल्याने वाहतूक कोंडीचा प्रश्नही गंभीर झाला आहे.वडगाव शेरी येथे मुळा-मुठा नदीच्या काठाने हा रस्ता प्रस्तावित आहे. मात्र, शेतकऱ्यांकडून जागा उपलब्ध होत नसल्याने सुमारे एक किलोमीटरचा रस्ता रखडला आहे. या भागातील जमीन ताब्यात घेण्यासाठी सक्तीचे भूसंपादन केले जाणार असून, त्यासाठी महापालिकेला तब्बल ६३.५० कोटी रुपये मोजावे लागणार आहेत. यासंदर्भातील प्रस्ताव महापालिकेने शासनाकडे पाठवला आहे.

पुणे महापालिकेच्या १९८७ च्या विकास आराखड्यात शिवणेपासून खराडीपर्यंतचा भाग नदीकाठच्या रस्त्याने जोडण्यासाठी १७.२१ किलोमीटर लांबीच्या रस्त्याची तरतूद करण्यात आली होती. हा रस्ता सध्या तुकड्या-तुकड्यांत अस्तित्वात आहे. संगमवाडी ते खराडी दरम्यानचा ११.२१ किलोमीटरचा टप्पा अत्यंत महत्त्वाचा आहे. यापैकी ९.७० किलोमीटरचे काम पूर्ण झाले असून, ९.४० किलोमीटरचा रस्ता वाहतुकीसाठी खुलाही करण्यात आला आहे.

अधिक वाचा  चंद्रकांतदादा पाटील यांच्या संकल्पनेच्या ‘सुखदा’मध्ये १००० बालकांचा अनोखा बालदिन सोहळा मायेचा स्पर्श अन् आनंदाचा उत्सवही

मात्र, वडगाव शेरी येथील सर्वे क्रमांक ५, ५५, ५६ आणि ५९ मधील २४ मीटर रुंदीचा रस्ता भूसंपादनाअभावी तब्बल दीड दशकापासून रखडला होता. जागामालकांची जमीन ताब्यात येत नसल्याने या भागातील प्रत्यक्ष कामाला ब्रेक लागला होता. आता हा पेच सोडविण्यासाठी प्रशासनाने नवीन भूसंपादन कायदा २०१३ नुसार कायदेशीर प्रक्रिया राबविण्याचा निर्णय घेतला आहे.सुमारे एक किलोमीटर लांबीचा रस्ता करण्यासाठी बाधित शेतकऱ्यांची २४ हजार चौरस मीटर जागा सक्तीने संपादित केली जाणार आहे. भूसंपादनास विलंब झाल्याने महापालिकेला मोठा आर्थिक भुर्दंड सहन करावा लागणार आहे. सन २०२६-२७ च्या रेडीरेकनर दरानुसार प्रतिचौरस मीटर २६ हजार ४६० रुपये या दराने भूसंपादनासाठी तब्बल ६३ कोटी ५० लाख ४० हजार रुपयांची तरतूद करावी लागणार आहे.

अधिक वाचा  दिवंगत श्रीपाद ढेकणे स्मृतिप्रीत्यर्थ कोथरूडमध्ये ‘श्रीपाद स्मृती’ अभ्यासिका; ना. चंद्रकांतदादा पाटील यांचा पुढाकार

दोन स्वतंत्र प्रस्ताव जिल्हाधिकाऱ्यांकडे

महाराष्ट्र प्रादेशिक नियोजन व नगररचना अधिनियम १९६६ च्या कलम १२६ अन्वये भूसंपादनाचा प्रस्ताव राज्य शासनाकडे पाठविण्यात येणार आहे. यासाठी स्थायी समिती आणि मुख्य सभेची मंजुरी घेऊन वडगाव शेरी येथील सर्वे क्रमांक ५ साठी एक, तर सर्वे क्रमांक ५५, ५६ आणि ५९ साठी दुसरा, असे दोन स्वतंत्र प्रस्ताव जिल्हाधिकारी कार्यालयातील भूसंपादन शाखेकडे सादर करण्यात आले आहेत.

कर्वेनगरमधील भूसंपादनाला गती

शिवणे-खराडी रस्त्याच्या वारजे ते म्हात्रे पूल या टप्प्यातील कामही रखडले आहे. सध्या जावळकर उद्यान ते महालक्ष्मी लॉन्सदरम्यान सुमारे अडीच किलोमीटर रस्त्याच्या भूसंपादनासाठी प्रयत्न सुरू आहेत. पुढील दीड ते दोन महिन्यांत या भागातील अनेक जागा ताब्यात घेतल्या जाणार आहेत. त्यानंतर राजाराम पूल ते म्हात्रे पूल या दरम्यान काही ठिकाणी रस्ता अर्धवट असल्याने वाहतुकीसाठी अडथळे निर्माण झाले आहेत. तेथील जागांचेही भूसंपादन केले जाणार आहे, असे प्रशासनाकडून सांगण्यात आले.

अधिक वाचा  पुण्याच्या समाविष्ट 9 गावांच्या डीपीत 143 बदल! कुणाचे रस्ते झाले अरुंद, कुणाचे आरक्षण हटले? लोहगाव सर्वाधिक ३९ फेरबदल

खराडी-शिवणे प्रकल्पातील वडगाव शेरी येथील काही जागा ताब्यात आलेल्या नसल्याने सक्तीचे भूसंपादन केले जाणार आहे. त्यासाठीचा प्रस्ताव जिल्हाधिकारी कार्यालयाकडे पाठविण्यात आला आहे.

– राजेश बनकर, मुख्य अभियंता, पथ विभाग