मुंबईः भाजपची वाटचाल ‘वन नेशन वन इलेक्शन’ पासून ‘वन नेशन वन पार्टी’कडे चालली आहे. यासाठी आमदार-खासदारांच्या फोडाफोडीबरोबरच मतचोरी केली जात आहे. देशातील १३ कोटी नागरिकांची नावे मतदारयादीतून वगळण्यात आली असून ही मतचोरी मुख्य निवडणूक आयुक्त ज्ञानेशकुमार यांच्या माध्यमातून केली जात आहे. त्यामुळे ‘ज्ञानेशकुमार मस्ट गो’चा नारा देत केंद्र सरकारने ज्ञानेशकुमार यांचा राजीनामा घेतला नाही तर पुन्हा जंतरमंतरवर आंदोलन केले जाईल, तीन दिवस काय, तीन महिनेही तुरुंगात टाकण्यात आले तरी मी पुन्हा येईन, मी पुन्हा येईन, असा इशारा कॉक्रोच जनता पक्षाचे आंदोलक अभिजीत दीपके यांनी सरकारला दिला.
ज्ञानेशकुमार यांच्या राजीनाम्यासाठी काँग्रेस, शिवसेना, मनसेने आंदोलन पुकारले असतानाच कॉक्रोच जनता पार्टीकडून दादर येथील छत्रपती शिवाजी महाराज पार्क येथे आंदोलनाची हाक देण्यात आली. या आंदोलनात तरुणवर्ग मोठ्या प्रमाणावर मुंबईसह देशातील विविध भागातून सामील झाला. ज्ञानेशकुमार यांच्या राजीनाम्याच्या मागणीसाठी हातातील फलकांबरोबरच, रस्त्यांवर जलसे तसेच पथनाट्यही करण्यात येत होती. यावेळी मैदानाच्या सहा नंबर प्रवेशद्वारावर एका ट्रकलाच या आंदोलनाचे व्यासपीठ बनविण्यात आले होते. यावेळी अभिजीत दीपके यांनी मतदार विशेष पडताळणी मोहीम (एसआरआय) वरून केंद्र सरकारला लक्ष्य केले.
२०२४च्या लोकसभा निवडणुकीत अपेक्षित खासदारांची संख्या न आल्याने भाजपकडून महाराष्ट्र, दिल्ली, तामीळनाडू आणि पश्चिम बंगालमध्ये निवडणूक घोटाळा करण्यात आल्याचा आरोप त्यांनी केला. मोठ्या प्रमाणावर मतदारांची नावे कापण्यात आल्याने ममता बॅनर्जी, स्टॅलिन, अरविंद केजरीवाल यांना पराभवाचा सामना करावा लागला. मागील दोन वर्षांत १३ कोटी मतारांची नावे मतदारयादीतून वगळण्यात आल्याचे सांगताना मॅच फिक्सिंगप्रमाणेच काही राज्यांत विरोधकांचे सरकार येऊ दिले आणि महाराष्ट्र, दिल्ली यासारखी मोठी राज्ये स्वतःकडे राखण्याचे राजकारण भाजपने केल्याची टीका दीपके यांनी केली.
तर आमदार, खासदारांचा लिलाव करा
२०२२ ते २०२६ या कालावधीत निवडणूक जिंकल्यानंतर १११ विद्यमान खासदार-आमदारांनी पक्ष बदलल्याचे त्यांनी सांगितले. भाजपला प्रादेशिक पक्ष संपवायचे असल्याने त्यांनी आधी शिवसेना, मग राष्ट्रवादी आणि नंतर ममता बॅनर्जी यांचा पक्ष फोडला. अशा प्रकारे आमदार, खासदार जर फोडले जाणार असतील तर निवडणुकीचे गरजच काय त्यापेक्षा आमदार, खासदारांचा आयपीएल सामन्यांप्रमाणे लिलाव करा, अशी टीकाही त्यांनी केली. यावेळी त्यांनी एकनाथ शिंदे यांच्या बंडावर टीका करताना सूरत ते गुवाहाटी दौऱ्यावरूनही निशाणा साधला.
हिंदू-मुस्लिम मतभेदात जनतेला अडकवले
मागील १२ वर्षांत देशातील राजकारण हिंदू-मुस्लिम या मुद्द्यावर केंद्रित करण्यात आले. धर्माच्य नावावर भीती निर्माण करून नागरिकांना त्यात गुंतवून ठेवण्यात आले. २०२४मध्ये देशात सर्व पक्ष एकत्र आल्याने आता सत्ता मिळणार नाही या भीतीने मतविभाजन करण्यात आले. मात्र आता हिंदू-मुस्लिम हे मतभेद बाजूला ठेवून एकत्र येण्याची गरज असल्याचे सांगताना कोणत्याही पक्षाला समर्थन द्या, पण भारतीय म्हणून एकत्र येण्याची आज गरज आहे. देश वाचवण्याची ही लढाई आहे, या लढाईत आपण सर्वांनी एकत्र यायला हवे, असे आवाहन अभिजीत दीपके यांनी केले.
अन्यथा मोदींना पंतप्रधानपदाचा राजीनामा द्यावा लागेल
भाजपकडून मतचोरीसाठी ज्ञानेशकुमार यांचा वापर केला जात आहे. यामागचे सूत्रधार पंतप्रधान नरेंद्र मोदी असल्याचा आरोप त्यांनी केला. जर पंतप्रधान ज्ञानेशकुमार यांचा राजीनामा घेणार नसतील पंतप्रधान नरेंद्र मोदी यांच्या राजीनाम्यासाठी आंदोलन करू, ज्ञानेशकुमार जाणार नसतील पंतप्रधानांना राजीनामा द्यावा लागेल असे ते म्हणाले.
दिल्ली पोलीस जनरल डायर
दिल्लीतील आंदोलनादरम्यान पोलिसांनी आंदोलकांवर केलेल्या कारवाईचा संदर्भ देत दीपके यांनी दिल्ली पोलीस अधिकारी सचिन शर्मा यांच्यावर आक्रमक शब्दात निशाणा साधला. शर्मा पोलीस अधिकारी नसून अमित शाह यांचा जनरल डायर आहे, असा आरोप दीपके यांनी केला. छोट्या मुलांना मारहाण करणाऱ्या जनरल डायरसारखी भूमिका बजावत असून दिल्लीमध्ये आंदोलन करणाऱ्यांना फरफटत नेले जात असल्याचा दावा त्यांनी केला. जर तुम्ही संघाच्या विचारांचे असाल तर खाकी वर्दी घालू नका, खाकी चड्डी घाला आणि शाखेत जा, अशा शब्दात दीपके यांनी टीका केली.
सीजेपीच्या मागण्या
- मुख्य निवडणूक आयुक्त ज्ञानेशकुमार यांचा राजीनामा घ्या.
- एसआयआर प्रक्रियेची सखोल चौकशी करा
- २०२३ चा निवडणूक आयोग कायदा रद्द करा
या मागण्यांसाठी गोवा, बंगलोर, रांची, पटणा येथेही आंदोलन करणार असल्याचे आंदोलक सौरभदास, आशुतोष रांका यांनी सांगितले. या आंदोलनात सोम्या कोरडे, रत्ना सिंग, आफरीन नवाज, अजिंक्य शिंदे, प्रणय अहिरे आदि आंदोलकही सहभागी झाले.
मतदारयादीतून नाव वगळले तर आंदोलन होणारच – शबाना आझमी
मतदान हा आमचा संविधानाने दिलेला अधिकार आहे, आवाज आहे. जर मतदारयादीतूनच आमचे नाव वगळले जात असेल तर आम्ही आंदोलन करणारच, हा आमचा हक्क आहे, असा इशारा सिने अभिनेत्री शबाना आझमी यांनी दिला. दरम्यान, गायक विशाल ददलानी यांनी ‘मेरा रंग दे बसंती चोला’… या गाण्याच्या धर्तीवर मेरा रंग दे बसंती चोला… ग्यानू तू उठाले अपना झोला… असे विंडंबनात्मक गाणे सादर केले. यावेळी महात्मा गांधी यांचे नातू तुषार गांधी, हास्य कलाकार राजीव निगम, अभिनेत्री शर्लिन चोपडा हेही सहभागी झाले होते.
शिवसेनेचा पाठिंबा
या आंदोलनाला शिवसेना (ठाकरे) आमदार महेश सावंत यांनी उपस्थित राहत शिवसेना (ठाकरे) नेते आदित्य ठाकरे यांनी आंदोलनाला पाठिंबा दिला असल्याचे जाहीर केले. शिवसेना वगळता मनसे, काँग्रेस किंवा राष्ट्रवादी (शरद पवार) पक्षाचे कोणीही नेते या आंदोलनात सहभागी झाले नाहीत.
